MH17៖ ​«កាំជ្រួច​រ៉ូស្សី» ជា​មូលហេតុ​ដែល​ធ្វើ​ឲ្យ​យន្ដហោះ​ធ្លាក់

១៥ខែ ក្រោយការធ្លាក់យន្ដហោះ ម៉ាឡេស៊ី MH17 នៅភាគខាងកើត នៃប្រទេសអ៊ុយក្រែន សេចក្ដីសន្និដ្ឋាន ចេញ​ពីការ​ស៊ើប​អង្កេត​មួយ ត្រូវបានប្រកាសឲ្យដឹង ជាផ្លូវការនៅរសៀលថ្ងៃទី១៣ ខែតុលា ឆ្នាំ២០១៥នេះ។ យន្ដហោះ​ដែល​កំពុង​ហោះ ត្រូវ​បាន​បាញ់​កំទេច នៅក្នុងអាកាស ដោយកាំជ្រួចបាញ់ពីដី ផលិត​នៅ​ប្រទេស​រ៉ូស្សី។ ប៉ុន្តែ​គួរ​ឲ្យ​ស្ដាយ ដែល​ជន​នៅ​ពី​ក្រោយ នៃ​ទង្វើ​នេះ នៅមិនទាន់ដឹង ពីអត្តសញ្ញាណនៅឡើយ។
MH17៖ ​«កាំជ្រួច​រ៉ូស្សី» ជា​មូលហេតុ​ដែល​ធ្វើ​ឲ្យ​យន្ដហោះ​ធ្លាក់
រូបភាពរបស់ការិយាល័យស៊ើបអង្កេតហូឡង់ បង្ហាញពីកាំជ្រួចផ្ទុះ នៅលើយន្ដហោះ។ (រូបថតផ្តិតពីវីដេអូ)

យ៉ាងណាក៏ដោយ ក៏លទ្ធផលនៃការស៊ើបអង្កេតនេះ មិនបាននិយាយដល់ ពីការដាក់មន្ទិលសង្ស័យ ទៅ​លើ​ក្រុមណាមួយនោះ នៅឡើយដែរ។ ប៉ុន្តែអ្នកស៊ើបអង្កេត បានថ្លែងថា រដ្ឋាភិបាលក្រុងគៀវ (អ៊ុយក្រែន) គួរ​តែបិទផ្លូវហោះហើរ នៅពីលើតំបន់នោះ មិនឲ្យមានចរាចរណ៍យន្ដហោះ អាចឆ្លងកាត់បាន។

យន្ដហោះប៊ូអីង (Boeing) របស់ក្រុមហ៊ុនម៉ាឡេស៊ីអ៊ែរឡាញ (Malaysia Airlines) ដែលភ្ជាប់ជើងហោះហើរ (MH17) ពីរាជធានី អាមស្ទែដាម ប្រទេសហូឡង់ ឆ្ពោះទៅរដ្ឋធានី កូឡាឡំពួរ ប្រទេសម៉ាឡេស៊ី កាលពី​ថ្ងៃ​ទី១៧ ខែកក្កដា ឆ្នាំ២០១៤ ត្រូវបានបាញ់កំទេច នៅពេលកំពុងហោះហើរ ពីលើតំបន់ប្រទាញប្រទង់ និង​ពោរ​ពេញដោយសង្គ្រាម រវាងកងទ័ពអ៊ុយក្រែន និងពួកនិយមបំបែកទឹកដី នៅភាគខាងកើត នៃប្រទេស​អ៊ុយក្រែន។ បំណែកយន្ដហោះ បានធ្លាក់នៅក្នុងតំបន់ ដែលកាន់កាប់ដោយក្រុមអ្នកបំបែកខ្លួន និង​គ្មាន​អ្នក​ដំណើរ​ណាម្នាក់ នៅរួចរស់ជីវិតនោះទេ។

កាំជ្រួច ដែលបានកំទេចយន្ដហោះស៊ីវិល ដឹកអ្នកដំណើរចំនួន២៩៨នាក់ (ភាគច្រើន ជាជនជាតិហូឡង់) ក្នុង​អាកាសនេះ ជាកាំជ្រួចប្រដេញធុន «Buk» បាញ់ចេញពីដី និងផលិតនៅប្រទេសរ៉ូស្សី។ នេះបើតាម​របាយ​ការណ៍​ស៊ើបអង្កេត របស់ការិយាល័យ សុវត្ថិភាពផ្លូវអាកាស របស់ប្រទេសហូឡង់ ដែលបានចេញផ្សាយ ជា​ផ្លូវ​ការ នៅរសៀលថ្ងៃអង្គារម្សិលម៉ិញ។ នាយកការិយាល័យស៊ើបអង្កេត លោក «Tjibbe Joustra» បាន​ប្រកាស នៅក្នុងសន្និសីទសារព័ត៌មានថា៖ «យន្ដហោះ MH17 បានធ្លាក់ ដោយសារការផ្ទុះកាំជ្រួចមួយ នៅ​ខាង​ក្រៅ​យន្ដហោះ តែនៅជាប់ខាងឆ្វេង នឹងបន្ទប់របស់អ្នកបើកបរ»។

អ្នកណា ជាអ្នកបាញ់កាំជ្រួចនេះ?

អ្នកស៊ើបអង្កេត បានកំណត់ទីកន្លែង ដែលកាំជ្រួច​ត្រូវ​បាន​បាញ់​ពីដី នូវផ្ទៃក្រឡា ៣២០គីឡូម៉ែត្រក្រឡា។ ប៉ុន្តែ​មិន​បានអះអាងថា តើកងទ័ពអ៊ុយក្រែន ឬក្រុមអ្នកនិយមបំបែកទឹកដី ជាអ្នកបាញ់​កាំជ្រួច​នេះ​ឡើយ ខណៈ​បំណែក​ទឹកដី​នៅតំបន់នោះ ស្ថិតនៅក្រោមការគ្រប់គ្រង របស់ក្រុមទាំងសងខាង។ ដោយឡែក ​សារព័ត៌មាន «Volkskrant» នៅ​ក្នុង​ប្រទេស​ហូឡង់ បានស្រង់ប្រភពមួយ ស្និតនឹងការស៊ើបអង្កេត មកបង្ហើប​ថា កាំជ្រួច​ត្រូវ​បាន​​បាញ់​​ចេញ ពី​តំបន់​ដែល​គ្រប់គ្រង​ដោយ ពួកនិយមបំបែកទឹកដី។

» របាយការណ៍ជាវីដេអូ ដែលផលិតដោយក្រុមអ្នកស៊ើបអង្កេត៖

នាយករដ្ឋមន្ត្រីហូឡង់ លោក «Mark Rutte» បានប្រកាសនៅពេលបន្ទាប់មកដែរថា អាទិភាពនៅពេលនេះ គឺ​ត្រូវ​រក​ឲ្យឃើញ អ្នកប្រព្រឹត្តិ នៅក្នុងការស៊ើបអង្កេតព្រហ្មទណ្ឌមួយទៀត ដែលចាត់ចែង ដោយប្រទេស​ហូឡង់​ដូចគ្នា។ លោក «Mark Rutte» បានថ្លែងថា៖ «គេត្រូវមានការប្រយ័ត្នប្រយែង ជាទីបំផុត។ ខ្ញុំយល់​ពី​មនុស្ស​មួយ​ចំនួន ដែលចង់ឲ្យមានសេចក្ដីសន្និដ្ឋាន ឲ្យបានឆាប់បំផុត (...) ប៉ុន្តែផ្លូវដើរ ឆ្ពោះទៅកាន់យុត្តិធម៌  បាន​បង្ក​ភាព​ស្មុគ្រស្មាញជាច្រើន រួចទៅហើយ។ អញ្ចឹង យើងត្រូវជៀសវាង កុំឲ្យរឿង​កាន់តែស្មុគ្រស្មាញ​បន្ថែម​ទៀត។»

លោកនាយករដ្ឋមន្ត្រី បានឲ្យដឹងបន្ថែមថា របាយការណ៍មួយទៀត ទាក់ទងនឹងករណីព្រហ្មទណ្ឌដ៏សំខាន់ កំពុង​មានដំណើរការទៅមុខ ហើយលោកបានអំពាវនាវឲ្យប្រទេសរ៉ូស្សី ធ្វើការសហការក្នុងរឿងនេះ ឲ្យបាន​ពេញ​លេញ​បំផុត។

រ៉ូស្សីច្រានចោល ការស៊ើបអង្កេត...

ចំណែកឯរដ្ឋាភិបាលក្រុងម៉ូស្គូវិញ បានច្រានចោលនៅ​មុន ការផ្សាយរបាយការណ៍​ស៊ើបអង្កេត ទាក់ទង​នឹង​ការ​លើក​ឡើង ពីការប្រើប្រាស់កាំជ្រួចធុន «BUK» នេះ។ ឧបនាយករដ្ឋមន្ត្រី និងជារដ្ឋមន្ត្រីការបរទេសរ៉ូស្សី លោក «Sergueï Riabkov» បានបរិហា​ពីរបាយការណ៍នេះ ថាមានចរឹត​«បង្វិល»​ខុសពីការពិត ដើម្បី​ទិសដៅ​«នយោបាយ»។

រដ្ឋាភិបាលក្រុងគៀវ និងក្រុងម៉ូស្គូ បានចោទគ្នាទៅវិញទៅមក ទាក់ទងនឹងការទទួលខុសត្រូវ នៃការ​បាញ់​ទម្លាក់​យន្ដហោះស៊ីវិល ដែលកំពុងហោះហើរ នៅលើអាកាសមួយនេះ។ រដ្ឋាភិបាលអ៊ុយក្រែន បាន​ទម្លាក់​កំហុស ទៅ​ក្រុមនិយមបំបែកទឹកដី ស្និតនឹងប្រទេសរ៉ូស្សី ខណៈរដ្ឋាភិបាលរ៉ូស្សី បានចង្អុលទៅ​កងទ័ព​អ៊ុយក្រែន ថា​ជា​អ្នក​ធ្វើ​រឿងនេះ។ កាលពីថ្មីៗនេះ នាយករដ្ឋមន្ត្រីអ៊ុយក្រែន លោក «Arseni Iatseniouk» ​បាន​បរិហាក្រុម​ចារកម្ម របស់​ប្រទេសរ៉ូស្សី ថាស្ថិតនៅពីក្រោយ ការបាញ់ទម្លាក់យន្ដហោះនេះ នោះ​ទៀត។ លោកនាយក​រដ្ឋមន្ត្រី បាន​​ថ្លែង​​ឲ្យ​ដឹងថា៖ «ខ្ញុំគ្មានការសង្ស័យទេ ពីករណីដែលថា វាជា​យុទ្ធនាការ ដែល​មាន​ការ​រៀបចំ​​​ទុក​​ជា​មុន​មួយ ពី​សំណាក់​ក្រុមចារកម្មរ៉ូស្ស៊ី ដើម្បីបាញ់ទម្លាក់យន្ដហោះ»៕