រថយន្ត​ក្រុង​ដឹក​អ្នក​ដំណើរ​បើក​កៀរ និង​កិន​ក្មេង​ប្រុស​ម្នាក់​ស្លាប់​លើ​ផ្លូវ​សហ​ព័ន្ធ​រុស្ស៊ី

រាជ​ធានី​ភ្នំពេញ​ ៖ សេចក្តី​រាយការណ៍បាន​ឱ្យដឹង​ថា កាល​ពី​វេលា​ម៉ោង​១ និង​៣០​នាទី​រសៀល ថ្ងៃ​ទី​២៥ តុលា នេះ ក្មេង​ប្រុស​អាយុ​១៣​ឆ្នាំ​ម្នាក់​ត្រូវ​រថយន្ត​ក្រុង​ដឹក​អ្នក​ដំណើរ​ក្នុង​រាជ​ធានី​ភ្នំពេញមួយ​គ្រឿង​​បើក​កៀរ​ និង​កិន​ស្លាប់ភ្លាមៗ​នៅ​កន្លែង​លើ​ផ្លូវ​សហ​ព័ន្ធ​រុស្ស៊ី​ មុខ​វត្ត​វង្កុដ​បុរី​ ស្ថិត​ក្នុង​សង្កាត់​ទឹក​ថ្លា ខណ្ឌ​សែន​សុខ​។

ក្មេង​ប្រុសរង​គ្រោះ​ឈ្មោះ​រស់ រត្នបញ្ញា អាយុ​១៣​ឆ្នាំ ស្នាក់​នៅ​ភូមិ​ផ្សារ​ទឹក​ថ្លា សង្កាត់​ទឹក​ថ្លា ខណ្ឌ​សែន​សុខ​ ជិះ​ម៉ូតូ​ម៉ាក​Today ពណ៌ស ពាក់​ស្លាក​លេខ​ភ្នំពេញ​១FD៧៨៥៣ ចំណែក​រថយន្ត​ក្រុង​ដឹក​អ្នក​ដំណើរ​ម៉ាក​ហ៊ី​យ៉ាន់​ដាយ ពណ៌​ខៀវ ពាក់​ស្លាក​លេខ​រដ្ឋ៣៧៣០០៤៩ មាន​លេខ​សម្គាល់​០៣។

ប្រភព​បាន​ឱ្យ​ដឹង​ថា មុន​ពេល​កើត​ហេតុ​គេ​ឃើញ​រថយន្ត​ខាងលើ​ធ្វើ​ដំណើរ​ពី​លិច​ទៅ​កើត​ ពេល​ដល់​ចំណុច​កើតហេតុ​រថយន្ត​បាន​បើក​អែប​ចូល​ចិញ្ចើម​ផ្លូវ​​បម្រុង​​ដាក់​អ្នក​ដំណើរ​ស្រាប់​តែ​កៀរ​​ក្មេង​ប្រុស​រង​គ្រោះ​ដែល​កំពុង​ជិះ​ម៉ូតូ​​ស្រប​ទិស​គ្នា​បណ្តាល​ឱ្យ​ដួល រួច​​កិន​​ក្មេង​ប្រុស​រង​គ្រោះ​ស្លាប់​ភ្លាមៗ​តែ​ម្តង​។

ក្រោយ​កើតហេតុ​អ្នក​បើក​បរ​រថយន្ត​បាន​រត់​គេច​ខ្លួន​បាត់​ស្រមោល ចំណែក​រថយន្ត និង​ម៉ូតូ​ត្រូវ​បាន​សមត្ថ​កិច្ច​បញ្ជូន​ទៅ​ការិយាល័យ​រង់​ចាំ​ដោះ​ស្រាយ​តាម​ផ្លូវ​ច្បាប់​ ៕