អាហារ​ជួយ​ឲ្យ​ស្រក​ទម្ងន់ ឬ ធាត់​

Sanofi

​នៅពេលដែល​យើង​ក្រឡេក​ភ្នែក​ទៅ​មើល​តាម​ថ្នាក់ៗ​លក់​របស់​នៅក្នុង​ផ្សារ​ទំនើប​យើង នឹង​ឃើញ​ប្រភេទ​អាហារ​សុខភាព​គ្រប់គ្រង​ផ្ទៃ​កន្លែង​ជាង​ពាក់កណ្តាល ប៉ុន្តែ​វា​ជា​ការពិត​ដែរឬទេ ដែលថា​វា​ជា​អាហារ​សុខភាព​នោះ ឬក៏​គ្រាន់តែ​ជាការ​ឃោសនា​ផ្សាយពាណិជ្ជកម្ម​ឲ្យ​យើង​ជឿជាក់​ដែល​គេ​សរសេរ​ដាក់​ចំហៀង​ប្រអប់ ។​ យើង​សាកល្បង​មក​តាមដាន​អាហារ​អស់ទាំង​នេះ​ព្រមទាំង​រក​ជម្រើស​ណាមួយ​ដែល​ល្អ ចំពោះ​សុខភាព​យើង​ផង ។​

១-​ទឹកដោះគោ​ជូរ​ខ្លាញ់​ទាប​
​ពាក្យ​ថា​ខ្លាញ់​ទាប​នៅទីនេះ​អាច​មានន័យថា​មាន​ជាតិ​ខ្លាញ់​ក្នុង​បរិមាណ​តិចជាង​ទឹ​ដោះ​គោ​ជូរ​ធម្មតា​ពិតមែន ប៉ុន្តែ​អាច​បន្ថែម​ដោយ​ទឹក​ផ្អែម​ពី​ផ្លែឈើ​ឬ​ស្ករ​ដើម្បី​ផ្សំ​រសជាតិ​ក៏​ថា​បាន ។ ដូច្នេះ​បើ​ចង់​សម្រក​ទម្ងន់​ពិតមែន​គួរតែ​ពិនិត្យ​ស្លាក​ជាមុនសិន​ថា តើ​វា​មាន​ស្ករ​ច្រើន ឬតិច​កម្រិតណា?

២-«​តែ​»​ត្រជាក់
​ក្នុង «​តែ​» មាន​ភ្នាក់ងារ​ជួយ​ការពារ មេរោគ​ជាច្រើន ថែមទាំង​មាន​អុកស៊ីដកម្ម និង មាន​សារធាតុ​ដែល​ជំនួយការ ចងចាំ ប៉ុន្តែ​ការផឹក «​តែ​» ត្រជាក់​ពី​ដប​ក្នុង​បរិមាណ​ច្រើនៗ​អាចមាន​ផលអាក្រក់​ចំពោះ​រាងកាយ​ច្រើនជាង​ផល​ល្អ ព្រោះ​ក្នុង «​តែ​» នោះ​មាន ស្ករ​ច្រើនណាស់ ។ ដូច្នេះ «​តែ​» មួយ​ដប​គួរតែ​ចែកគ្នា​ផឹក ២ នាក់ ឬ​រំលែក​ផឹក ២ ដង ល្អ​ជាង ។

៣-​ទឹកដោះគោ
​ទឹកដោះគោ​ល្អ​ពិតៗ ព្រោះ មាន​ទាំង​ប្រូតេអ៊ីន កាល់ស្យូម វីតាមីន A និង វីតាមីន D ប៉ុន្តែ​សូម​កុំភ្លេចថា ទឹកដោះគោ មួយ​កែវ​មាន​ដល់​ទៅ ១៥០ កាឡូរី និង មាន​ជាតិ​ខ្លាញ់​ដល់​ទៅ ៨ ក្រាម ឯណោះ ។ សូម​ប្តូរ​ទៅ​ផឹក​ពពួក​ទឹកដោះគោ Non-Fat Low-Fat នឹង​អាច​បន្ថយ​បាន​ដល់​ទៅ ៧០ កាល់​ឡូរី ក្នុង​មួយ​កែវ ។

៤-​ទឹក​ប៉េងប៉ោះ
​ត្រូវបាន​ចាត់ទុកជា​អាហារ​ដែលមាន​ជាតិ​ខ្លាញ់ ០ ភាគរយ ហើយ​សម្បូរ​ទៅដោយ​វីតាមីន A និង វីតាមីន C ប៉ុន្តែ​ភ្លេច​គិតថា​រសជាតិ​ហឹរ​ដែលមាន​នៅក្នុង​ទឹក​ប៉េងប៉ោះ​នោះបាន​មកពី​ការ​លាយ​ផ្សំ​ស្ករ និង អំបិល​សុទ្ធសាធ​ដែលជា​ឧបសគ្គ​ចំពោះ​ការរំលាយ​អាហារ​ខ្លាំងណាស់ ។​ គិត​ជាមុនសិន មុននឹង​ច្របាច់​ហូរហៀរ​ចេញពី​ដប ហើយ​ត្រូវ​ញ៉ាំ​មួយដង​មួយ​ស្លាបព្រា​បាយ​ជាការ​សមល្មម ។​

៥-​តៅហ៊ូ​
​ចាត់ទុកជា​អាហារ​ពេញនិយម​បំផុត​សម្រាប់​អ្នក​ញ៉ាំ​បួស ឬ ត្រូវការ​សម្រក​ទម្ងន់ ព្រោះ​វា​ជា​អាហារ​ដែល មាន​ប្រូតេអ៊ីន​ខ្ពស់ ហើយ​ថែមទាំង​មាន​សារធាតុ​អាហារ​ដូចជា​ធាតុដែក និង កាល់ស្យូម​ពោលគឺ​តៅហ៊ូ​មួយ ដុំ​ធំ​មាន​ត្រឹមតែ ១០០ កាឡូរី ប៉ុណ្ណោះ ប៉ុន្តែ​បញ្ហា​ធំ​នៅត្រង់ថា​តៅហ៊ូ​អាច​បឺត​ស្រូបយក​ខ្លាញ់​ដែល យើង​ប្រើ​ក្នុងការ​ចៀន​បាន​យ៉ាងច្រើន​មហាសាល​តែម្តង ។

ដូច្នេះ​អាហារ​សុខភាព​មួយ​នេះ​ប្រសិនបើ​យើង​ប្រើ​វិធី​ខុស​ក៏​ក្លាយជា​អាហារ​ឡើង​ទម្ងន់​វិញ ។​ថ្លឹង​វាល់​វាស់​បរិមាណ​ខ្លាញ់​ដែល​ប្រើ​ក្នុង​ការចៀន​ឲ្យ​ល្អ ។ គួរតែ​កំណត់​ត្រឹមតែ ១ ស្លាបព្រា​បាយ ប៉ុណ្ណោះ ឬ អាច​សាកល្បង​ធ្វើ​ឆ្លាស់​ពី​ការចៀន​ទៅជា​ការ​ស្ងោរ​ដូចជា​មុខម្ហូប​ស្ងោរ​តៅហ៊ូ​លាយ​សារាយ ក៏​ឆ្ងាញ់​មិន​ចាញ់​គ្នា​ប៉ុន្មាន​ដែរ ។​

៦-​ផ្លែឈើ​រសជាតិ​ផ្អែម
​អាច​ទៅ​បានទេ​ដែល​រាងកាយ​នឹងត្រូវ​បំពេញ​ដោយ​របស់​ល្អៗ​ដូច​យ៉ាង​ផ្លែឈើ​ដែល​សម្បូរ​ទៅដោយ​ជាតិ​សរសៃទឹក វីតាមីន និង អុកស៊ីដកម្ម ។ ប៉ុន្តែ​ប្រសិនបើ​អ្នក​ញ៉ាំ​ច្រើនពេក ផ្លែឈើ​ប្រភេទ​ខ្លះ​អាច​នឹង​ផ្តល់​ទុក្ខទោស​ដល់​រាងកាយ ជាពិសេស​ផ្លែឈើ​ដែលមាន​រសជាតិ​ផ្អែម​ដែលមាន​ជាតិ​ស្ករ​ច្រើន​មានដូចជា ទុរេន ស្វាយ ខ្នុរ ទំពាំងបាយជូរ ចេក និង ឆឺ​រី ជាដើម ។

ផ្លែឈើ​ទាំងនេះ​បើ​ហ៊ាន​តែ​ញ៉ាំ​ច្រើន​ប្រាកដ​ណាស់​ថា​ទម្ងន់​នឹង​កើនឡើង​ស្រឺ​តៗ​ជាក់​ជាពុំខាន ។ អ្នក​គួរតែ​កំណត់​ផ្លែឈើ​ត្រឹម តែ ២ ចាន ក្នុង​មួយថ្ងៃ​ប៉ុណ្ណោះ​ក៏​គ្រប់គ្រាន់​ហើយ ។​

៧-​ទឹកដូង​
​អ្នកខ្លះ​សម្អាងថា​ទឹកដូង​ជា​ទឹក​ពី​ធម្មជាតិ​ដែលមាន​កាឡូរី​ទាប ហើយ​សម​ចំពោះ​ការផឹក​ដើម្បី​ទូទាត់​ការបាត់បង់​ថាមពល​ក្រោយ​ហាត់ប្រាណ​បានល្អ​ជាង​ការផឹក​ទឹកអំបិល​រ៉ែ​ទៅទៀត ។​​អ្នកខ្លះ​ក៏​យល់ថា​ជួយ​សម្រក​ទម្ងន់ មាន​សារធាតុ​ទប់ទល់​នឹង​ភាព​ចាស់ ហើយ​ថែមទាំង​ជួយ ទប់ស្កាត់​រោគ​មួយចំនួន​បាន​ទៀតផង ។

អ្នកខ្លះ​ជឿថា​ទឹកដូង​ជា​ភ្នាក់ងារ​ជួយ​បំពេញ​សំណើម​ដល់​រាងកាយ ប៉ុន្តែ​លទ្ធផល​នៃ​ការស្រាវជ្រាវ​ផ្នែក​នេះ​មាន​តិច​ណាស់​រហូត​ទាល់តែ​មិនអាច​ពិសោធ​បាន ។ ទឹក​ផឹក​ដ៏​វិសេស​បំផុត​គឺ​ទឹកស្អាត​ធម្មតា​ឯណោះ​ទៅវិញ​ទេ ព្រោះ​វា​មិនមាន​កាឡូរី
​និង ជួយ​ទ្រទ្រង់​រាងកាយ​បាន​យ៉ាង​ប្រសើរ​តែម្តង ។​

​ត្រូវ​ផឹកទឹក​ស្អាត​ធម្មតា​ឲ្យ​បាន​ច្រើន និង ផឹក​ទឹកដូង​ក្នុង​បរិមាណ​កំណត់​ល្អ​ជាង ។ កត្តា​សំខាន់​នៅពេល​ហាត់ប្រាណ​លើសពី​មួយ​ម៉ោង​ឡើងទៅ​គួរតែ​ទូទាត់​សូ​ដ្យូ​ម​ឲ្យ​រាងកាយ​ដោយ​ភេសជ្ជៈ​ប្រភេទ អំបិល​រ៉ែ​ច្រើនជាង​ការផឹក​ទឹកដូង​ដែលមាន​ប៉ូ​តា​ស្យូ​ម​ខ្ពស់ ។​

៨-​បន្លែ​អប់​ស្រួយ​
​អាចធ្វើ​ពី​បន្លែ​ដែលមាន​ប្រយោជន៍​ដូចជា ត្រាវ ស្ពៃ​ប្រ៊ូ​ក​ខូ​លី ពោត ឬ ការ៉ុត ប៉ុន្តែ​មិនមែន​បានសេចក្តីថា វា​ល្អ​ចំពោះ​សុខភាព​អ្នក ព្រោះ​ក្នុង​មួយ​ស្បោង​ជួនកាល​មាន​កាឡូរី​ខ្ពស់ជាង​ដំឡូងបារាំង​អប់​ស្រួយ​ទៅទៀត ថែមទាំង​មាន​អំបិល​ដល់​ទៅ ៤០០ មិ​ល្លី​ក្រាម ក្នុង​បរិមាណ​បន្លែ​អប់​ស្រួយ ១០០ ក្រាម​ឯណោះ ។ ហើយ​បើ​គេ​សម្អាងថា​ប្រាសចាក​គ្លុយ​ទីន (Gluten) និង សារធាតុ​ការពារ​នៅ​ស្លា​កលើ​ស្បោង​ក៏​ដឹង​ចុះ​ថា ដំឡូងបារាំង​អប់​ស្រួយ​ក៏​អាច​ធ្វើបាន​ដូចគ្នា ។​

៩-​ស៊ុត​ស​
​អ្នកខ្លះ​អាច​រអ៊ូ​ថា​ស្អី​គេ​គ្រាន់តែ​ស៊ុត​ស​ក៏​ធ្វើ​ឲ្យ​ធាត់​បានដែរ​ឬ ? រួច​ចុះ​ហ្វី​ត​នេស​ដែល​ជំរុញ​ឲ្យ​ញ៉ាំ​ស៊ុត ក្រឡុក​ដែល​ធ្វើ​ពី​ស៊ុត​ស​យ៉ាងម៉េច​ទៅវិញ ព្រោះ​គេ​ប្រាប់ថា​វា​ជា​ប្រភព​ប្រមូលផ្តុំ​នៃ​ប្រូតេអ៊ីន​ល្អ ។ ប៉ុន្តែ​បើ​អ្នក​មិន​ញ៉ាំ​ស៊ុត​ក្រហម​សោះ​គឺ​បានសេចក្តីថា​អ្នក​រលាស់​ចោល​គុណប្រយោជន៍​ពី​ខា​រ៉ូ​ទីណ​យ ដែល​ល្អ​ចំពោះ​សុខភាព​ភ្នែក ខូលីន (Choline) ដែល​ជំនួស​ខួរក្បាល និង ថ្លើម និង សារធាតុ​អាហារ​ល្អៗ​ជាច្រើន​ទៀត ដែល​រាងកាយ​ត្រូវការ ។​

​ញ៉ាំ​ស៊ុត​ទាំងមូល​តែម្តងទៅ​ដើម្បី​ឲ្យ​បាន​ប្រយោជន៍​ពី​ស៊ុត​ទាំងមូល​តែម្តង​ដើម្បី​ឲ្យ​បាន​ប្រយោជន៍​ពី​ស៊ុត​ក្រហម​ផង ប៉ុន្តែ​ត្រូវ​បន្ថយ​បរិមាណ​ប្រូតេអ៊ីន​ពី​ប្រភព​ផ្សេងៗ​វិញ ៕​ឆាន់​-​ចំ​រ៉ា​


Related