ទូរទស្សន៍​រុស្ស៊ី​ច្រឡំ​ចាក់​ផ្សាយ​​ផែន​ការ​នុយក្លេអ៊ែរ​​សម្ងាត់​របស់​រុស្ស៊ី


ទូរទស្សន៍​រុស្ស៊ី​ច្រឡំ​ចាក់​ផ្សាយ​​ផែន​ការ​នុយក្លេអ៊ែរ​​សម្ងាត់​របស់​រុស្ស៊ី

ប៉ុស្តិ៍​ទូរទស្សន៍​របស់​រុស្ស៊ី​​​បាន​​​ចាក់​ផ្សាយ​អំពី​​គ្រោង​ការ​សម្ងាត់​មួយ​​ដែល​ទាក់​ទង​នឹង​ផែន​ការ​គ្រាប់​បែក​នុយក្លេអ៊ែរ​របស់​​​រុស្ស៊ី​​​​​​​​​​ដោយ​​​​ការ​យល់​​​ច្រឡំ​​​​​​ដោយ​អចេតនា។ នេះ​បើ​តាម​ការ​ចុះ​ផ្សាយ​របស់​​សារព័ត៌មាន The Guardian ។

 

ទូរទស្សន៍​រុស្ស៊ី​ច្រឡំ​ចាក់​ផ្សាយ​​ផែន​ការ​នុយក្លេអ៊ែរ​​សម្ងាត់​របស់​រុស្ស៊ី
 

ខាង​វិមាន​ក្រឹមឡាំង (Kremlin) ​​​បាន​ទទួល​ស្គាល់​​​​​​ថា​ទូរទស្សន៍​​​រុស្ស៊ី​បាន​​ចាក់​ផ្សាយ​​ពី​ផែន​ការ​ខាង​លើ​​នោះ​មែន។ ប៉ុស្តិ៍​ទូរទស្សន៍​ពីរ​ NTV និង Channel One ដែល​ស្ថិត​ក្រោម​ការ​គ្រប់​គ្រង​របស់​វិមាន​ក្រឹម​ឡាំង​​បាន​បញ្ចាំង​​​​នូវ​​​វីដេអូ​​ឯកសារ​យោធា​ដែល​បង្ហាញ​ពី​ប្លង់​​គម្រោង​លម្អិត​នៃ​ប្រព័ន្ធ​សព្វាវុធ​​ឈ្មោះ​ថា Status-6 រៀប​ចំ​ដោយ​ក្រុមហ៊ុន​សាង​សង់​នាវា​មុជ​ទឹក​ប្រើ​ថាមពល​​នុយក្លេអ៊ែរ​​ Rubin ​មូលដ្ឋាន​នៅ​ទី​ក្រុង St Petersburg ប្រទេស​រុស៊្សី។

 

​​​​​​​​​​​ការ​ផ្សាយ​ក្នុង​ប៉ុស្តិ៍​ទូរទស្សន៍​​រយៈ​ពេល​តែ​ប៉ុន្មាន​វិនាទី បាន​បង្ហាញ​​ពី​​​ប្រព័ន្ធ​សព្វាវុធ​​នោះ​គឺ​ជា​គ្រាប់​បែក​នុយក្លេអ៊ែរ​ដែល​​​បាញ់​ចេញ​ពី​នាវា​មុជ​ទឹក ហើយ​​អាច​បង្ក​ជា​ដែន​វិទ្យុ​សកម្ម​​​​ក្នុង​រយៈ​ពេល​យូរ​មួយ។ វីដេអូ​នោះ​គឺ​បាន​ថត​​​ឡើង​ក្នុង​អំឡុង​ពេល​កិច្ច​ប្រជុំ​របស់​ប្រធានាធិបតី​ វ៉្លាឌីមៀ​ ពូទីន ​​ជា​មួយ​ថ្នាក់​ដឹក​នាំ​​យោធា​រុស្ស៊ី​​ក្នុង​ទី​​ក្រុង​ Sochi តំបន់​​សមុទ្រ​ Black Sea កាល​ពី​ថ្ងៃ​ចន្ទ​កន្លង​ទៅ។

 

ការ​ចាក់​ផ្សាយ​​ដោយ​បញ្ហា​ច្រឡំ​​នេះ​​បាន​កើត​​ឡើង​កាល​ពី​ថ្ងៃ​អង្គារ​កន្លង​ទៅ​​ក្រោយ​មក​វា​ត្រូវ​បាន​គេ​លុប​ចោល​វិញ​ ប៉ុន្តែ​សារព័ត៌មាន​ជា​ច្រើន​បាន​ចាប់​អារម្មណ៍​ពី​រឿង​នេះ​ និង​បាន​​​​បង្ហោះ​នូវ​រូប​ភាព​ផ្ដិត​ជាប់​បាន​ទៀត​ផង។

 

“វា​ជា​ការ​ពិត​ ទិន្នន័យ​សម្ងាត់​មួយ​ចំនួន​​ត្រូវ​បាន​ផ្សាយ ប៉ុន្តែ​វា​ត្រូវ​បាន​គេ​លុប​វិញ។ ថ្ងៃ​ខាង​មុខ​វា​នឹង​មិន​កើត​មាន​ឡើង​ទៀត​ឡើយ”។ នេះ​បើ​តាម​អ្នក​នាំ​ពាក្យ​លោក​ប្រធានាធិបតី​រុស្ស៊ី គឺ​លោក Dmitry Peskov បាន​ប្រាប់​ទៅ​សារព័ត៌មាន។

 

ទូរទស្សន៍​រុស្ស៊ី​ច្រឡំ​ចាក់​ផ្សាយ​​ផែន​ការ​នុយក្លេអ៊ែរ​​សម្ងាត់​របស់​រុស្ស៊ី
 

​​​​​រហូត​មក​ដល់​ពេល​នេះ​ ​ដើម​ហេតុ​នៃ​បញ្ហា​​​ការ​​ច្រឡំ​ចាក់​ផ្សាយ​ពី​ផែន​ការ​សម្ងាត់​​​រុស្ស៊ី​តាម​ប៉ុស្តិ៍​ទូរទស្សន៍​ មិន​ទាន់​មាន​ការ​បញ្ជាក់​ឲ្យ​​ដឹង​ច្បាស់​លាស់​នៅ​ឡើយ​ទេ៕

 

ចុចអាន៖ មេដឹកនាំ​៣រូប​ ជាប់​​ជា​បុគ្គល​មាន​ឥទ្ធិពល​បំផុត​ក្នុង​លោក​​ឆ្នាំ២០១៥

 

ប្រែ​សម្រួល៖ មាន រតនា
ប្រភព៖ theguardian ​​​​​​