​លំ​ហាត់ប្រាណ​ពង្រឹង​ផ្នែក​លើ​ឲ្យ​រឹងមាំ​

Sanofi

ដើម្បី​ពង្រឹងកំលាំង និង ធ្វើឱ្យ​រាងកាយ​ពាក់កណ្តាល​ចង្កេះ​ឡើង​ទៅលើ​មាន​សភាព​រឹងមាំ អ្នក​គួរ​អនុវត្តតាម​លំ​ហាត់ប្រាណ​ដូចខាងក្រោម ព្រោះ​វា​មិន​ត្រឹមតែ​អាចជួយ​ឱ្យ​អ្នកមាន​រូបរាងសមសួន​ប៉ុណ្ណោះ​ទេ ថែមទាំង​ពង្រឹងសមត្ថភាព​ឆ្អឹងខ្នង ចង្កេះ និង ស្មា ឱ្យ​រឹងមាំ​ថែម​ទៀតផង ។

១ – ហាត់​រាង​ក្តារបន្ទះ

​វិធី​ហាត់​នេះ ជួយ​ឱ្យ​ក្បាលពោះ និង ខ្នង​ផ្នែក​ខាងក្រោម​ចង្កេះ​មាន​លំនឹង ។ វិធី​ហាត់​គឺ​ត្រូវអនុវត្ត​ដូច​ក្នុង​រូប ដោយ​យក​ម្រាម​ចុងជើង​ជុច នឹង​ដី និង បត់​សណ្តូក​ដៃ​ទប់​លំនឹង​ខ្លួន​ដោយ​ធ្វើ​ចលនា​បន្ទាបខ្លួន​ប្រឹង ស្មា​ធ្វើ​ចលនា​ចុះឡើងៗ តែ​ត្រូវ​រក្សា​ដងខ្លួន​ឱ្យ​ត្រង់​ជានិច្ច ។ អនុវត្ត​ឱ្យ បាន ១ នាទី​ម្តង ។

២ – ផ្តេក​សំកាំង​ខ្លួន

​វិធី​ហាត់​គឺ​អ្នក​ត្រូវ​គេង​ផ្ងារ និង សំកាំង​ដៃជើង​កម្ពស់ ៣០ សង់ទីម៉ែត្រ ឱ្យ​ផុតពី​ដី និង រក្សា​លំនឹង​ជើង​ផ្អឹប​គ្នា​ឱ្យ​ត្រង់​ជានិច្ច ។ ចំណែក​ដៃ​ត្រូវ​លើក​ឱ្យ​ផុត​ក្បាល​បន្តិច ។ អ្នក​ត្រូវ​ហាត់​លើកដៃ និង ជើង​ចុះឡើងៗ​ដូច​ក្នុង​រូបភាព​ឱ្យបាន​រយៈពេល ១ នាទី ។

៣ – អង្គុយ​អង្កុញ​ខ្លួន​

​នេះ​ជា​វិធី​សាមញ​ជួយ​ពង្រឹង​សាច់ដុំ​ពោះ និង ខ្នង ។ អ្នក​ត្រូវ​អង្គុយ​អង្កុញ​ដូច​ក្នុង​រូបភាព​រាង​ជា​អក្សរ «V» និង រក្សា​ស្មា ដងខ្លួន ឱ្យមាន​លំនឹង ពត់​លំនឹង​ខ្នង​អែន​ទៅមុខ​យឺតៗ​ចុះឡើងៗ អនុវត្ត​ចុះ ឡើងៗ​ឱ្យបាន ១ នាទី ។

៤ – សំកាំង​ផ្កាប់មុខ​

នេះ​ជា​វិធី​ហាត់​ដោយ​ផ្កាប់មុខ​ក្នុង​ចលនា​ផ្ទុយគ្នា​ពី​ចំណុច​ទី ២ ខាងលើ ក្នុង​កម្រិត ៤៥ ដឺ​ក្រេ ពី​ផ្ទៃរាប ។ វិធី​ហាត់​គឺ​ត្រូវ​ផ្អឹប​ជើង​ទាំងពីរ​ទន្ទឹមគ្នា និង សំកាំងដៃ​បោះ​ទៅមុខ ត្រូវ​រក្សា​លំនឹង​ខ្លួន​ដោយ​យក​ក្បាលពោះ​ទល់នឹង​ដី ( ដូច ក្នុង​រូប ) រួច​ធ្វើ​ចលនា​ទម្លាក់​ដៃ និង ជើង​ចុះឡើងៗ ។ អនុវត្ត​ឱ្យបាន ១ នាទី ។​

៥ – រាង​ក្តារបន្ទះ​

​វិធី​ហាត់​បែបនេះ​ជួយ​ឱ្យ​អ្នករក្សា​លំនឹង​ខ្លួន សាច់ដុំ​គូទ ខ្នង និង ជើង រឹងមាំ ។ វិធី​ហាត់​អ្នក​ត្រូវ​ហាត់​ដូច​ចលនា​ក្នុង​រូប យកដៃ​បោះ​ទៅក្រោយ​ទប់​លំនឹង​ខ្លួន​ដោយ​លា​ម្រាមដៃ​ច្រត់​លើ​ផ្ទៃរាប ចំណែក​ជើង​ត្រូវ​បែរ​ម្រាមជើង ចង្អុល​ឡើងលើ កែងជើង​ទល់​ដី ។ អ្នក​ត្រូវ​ហាត់​ដកដង្ហើម​ចេញចូល និង លើក​ដងខ្លួន​ចុះឡើងៗ​ផុតពី​ដី និងរក្សា​លំនឹង​ឱ្យ​ត្រង់​ពេល​លើកខ្លួន​ម្តងៗ។ អនុវត្ត​ឱ្យបាន ១នាទី។

៦ – រាង​ក្តារបន្ទះ​ចំហៀង​

​វិធី​ហាត់​នេះ​ក្រៅពី​ជួយ​ឱ្យ​សាច់ដុំ​ស្មា និង ចង្កេះ​រឹងមាំ​ហើយ វា​ក៏​អាចជួយ​កាត់បន្ថយ​កម្រិត​កាឡូរី​ក្នុង​ខ្លួន​បាន​ផងដែរ ។ អ្នក​ត្រូវ​ហាត់​ដូច​ក្នុង​រូបភាព ដោយ​ផ្អៀងខ្លួន​មួយ​ចំហៀង​ទប់​ជង្គង់​ឱ្យ​ត្រង់ និង រក្សា​ដងខ្លួន​ឱ្យ​ខ្ពស់​លើ​កែង ដៃ​ដែល​ទប់​លំនឹង​ខ្លួន​លើដី ។ ចំណែក​ដៃ​ម្ខាង​ទៀត​ត្រូវ​សំកាំង​ទៅលើ ។ អ្នក​ត្រូវ​ហាត់​ដកដង្ហើម​ចេញចូល លើក​ត្រគាក ជង្គង់​ឱ្យ​ផុតពី​ដី​ចុះឡើងៗ និង រក្សា​ដងខ្លួន​ឱ្យ​ត្រង់​ជានិច្ច ។ អនុវត្ត​ឱ្យបាន ១ នាទី ៕

Related