ហ្វឹកហាត់​ខួរក្បាល​ដើម្បីឱ្យ​ឆាប់​គេង​លក់​ត្រឹម ៣០​វិនាទី

Sanofi

​បញ្ហា​ដំណេក ជះឥទ្ធិពល​ខ្លាំង​ដល់​សុខភាព ការបំពេញ​ការងារ ក៏ដូចជា អារម្មណ៍​ប្រចាំថ្ងៃ​។ មនុស្ស​ភាគច្រើន​ប្រឈម​នឹង​ការ​គេង​មិន​លក់ ចំណាយពេល​យូរ​ទើប​លក់ ឆាប់​ភ្ញាក់ ឬ គេង​បាន​តិច រហូត​ស្ទើរ​ក្លាយជា​ទម្លាប់ និង​មាន​ជំងឺ​គេង​មិន​លក់​ទៅហើយ​។ ប្រសិនបើ​អ្នកចំណាយ​ពេល​លើសពី​១​ម៉ោង ទើប​អាច​គេង​លក់​នោះ បើ​គិត​ទៅក្នុង​១​សប្តាហ៍ អ្នក​ខាត​អស់ ៤០​ម៉ោង​លើ​រឿង​អត់​ប្រយោជន៍ និង​គួរឱ្យ​ធុញទ្រាន់​នេះ​។ ទោះជា​យ៉ាងណា សូមកុំ​បារម្ភ យើង​សូម​ណែនាំ​វិធី​ហ្វឹកហាត់​ខួរក្បាល​ដើម្បី​ឆាប់​គេង​លក់ និង​មាន​ដំណេក​គ្រប់គ្រាន់​លង់លក់​សុ​បិ​ន្ត​ល្អ​។

​ជាដំបូង គួរ​ចាប់ផ្តើម​ពី​ការកែប្រែ​ទម្លាប់​អាហារ​ជាមុនសិន ដោយ​តម​កាហ្វេ កាហ្វេ​ទឹកដោះគោ តែ​ដែលមាន​ជាតិ​កាហ្វេ​អ៊ី​ន (​តែ​បៃតង តែ​ស និង​សូម្បីតែ​គ្មាន​ជាតិ​កាហ្វេ​អ៊ី​ន​) សូកូឡា (​រួមទាំង កូ​កាវ និង​កា​កាវ​ផងដែរ​) និង​ភេសជ្ជៈ​តែ ។ កាហ្វេ ជា​បុព្វហេតុ​ធ្វើឱ្យ​អ្នក​ពិបាក​នឹង​គេង​លក់ លក់​មិនបាន​ស្កប់ និង​ឆាប់​ភ្ញាក់ ទោះជា​អ្នក​គ្រាន់តែ​ផឹក​ក្នុង​បរិមាណ​តិចតួច​នៅពេល​ព្រឹក​ក្តី ហើយ​នៅពេល​ភ្ញាក់ឡើង​អ្នកនឹង​មាន​អារម្មណ៍នឿយហត់ ហើយ​ចង់​គេង​បន្តទៀត​។ ប្រសិនបើ​អ្នក​ចូលចិត្ត​កាហ្វេ អ្នក​អាចអនុវត្ត​វិធី​ហ្វឹកហាត់​ខួរក្បាល​ឱ្យ​គេង​លក់​ស្រួល​នេះ​សិន ចាំ​ត្រឡប់មក​ផឹក​កាហ្វេ​វិញ ព្រោះ អាចអនុវត្ត​បាន ជា​អ្នក​ផឹក​កាហ្វេ​ប៉ុន្មាន​ពែង ក៏​នៅតែ​អាច​គេង​លក់​ស្រួល​ដែរ​។

-​ដំណើរ​ហ្វឹកហាត់​ដើម្បី​គេង​លក់​ឆាប់​

៣០​វិនាទី​ក៏​គេង​លក់​នេះ មិនជា​ការពិបាក​នោះទេ ប៉ុន្តែ​ទាមទារ​ពេលវេលា​យូរ​គួរសម អាច​ច្រើន​ខែ ឬ​ឆ្នាំ បន្ទាប់ពីនោះ អ្នក​ប្រាកដជា​អាច​គេង​លក់បាន​ស្រួល​ដោយ​គ្មាន​ការបារម្ភ​។ វិធី​នេះ នឹងធ្វើ​ឱ្យ​អ្នក​គេង​លក់​ស្រួល​ជាធម្មតា លើកលែង​ថ្ងៃ​ដែល​អ្នក​បាន​ប្រឈម​នឹង​ស្មុគស្មាញ​ច្រើន​។ ​ជាធម្មតា មនុស្ស​ទូទៅ​ច្រើនតែ​ងាយ​នឹង​គេង​លក់ នៅពេល​បាន​មើល​ទូរទស្សន៍ ឬ​មើលសៀវភៅ ដូចគ្នា​ទេ នេះ​គឺជា​ទម្លាប់ ចំណែក​វិធី​នេះ​ក៏​ជាការ​ទម្លាប់ខ្លួន​មួយ​ដែរ​។ ខួរក្បាល​បន្ស៊ាំ​ទៅនឹង​ទម្លាប់ ដូចនេះ​ប្រសិនបើ​អ្នកធ្វើ​កិច្ចការ​មុននឹង​ចូល​គេង​ដដែល​រាល់ថ្ងៃ អ្នកនឹង​ឆាប់​គេង​លក់​ជាង​ធ្វើ​អ្វី​ផ្សេង​។ ផ្ទុយទៅវិញ បើ​អ្នក​ពិបាក​នឹង​គេង​លក់ មានន័យថា អ្នក​មិនមាន​ទម្លាប់​ជាក់លាក់​មុន​ចូល​គេង​ទេ​។

ចំណុច​សំខាន់​នៃ​វិធី​នេះ គឺ​ជំ​រុញឱ្យ​ខួរក្បាល​ទម្លាក់ចោល​នូវ​សកម្មភាព​នានា ហើយ​ត្រលប់មក​ផ្តោតលើ​ការ​គេង​តែមួយ​មុខ​។ ប្រសិនបើ​អ្នក​នៅ​គិតពី​រឿង​ស្មុគស្មាញ​មុននឹង​ចូល​គេង នោះ​ខួរក្បាល​ក៏​ទម្លាប់​តែ​នឹង​បញ្ហា​ស្មុគស្មាញ​មុន​ចូល​គេង​រហូត​ក្លាយជា​ទម្លាប់​។ នៅពេល​ទម្រេត​ខ្លួន​គេង​រង់ចាំ​ពេល​គេង​លក់ អ្នក​គិតថា​អ្នក​កំពុង​ប្រើ​ខួរក្បាល​ឱ្យ​ឈប់​គិត ប៉ុន្តែ​ជាក់ស្តែង​អ្នក​កំពុង​គិត និង​កំពុង​ប្រើ​ខួរក្បាល​ឱ្យ​គិត​។ ការបន្ត​ការគិត​យូរៗ​ទៅ ចេះតែ​ចេញ​ជា​គំនិត​បន្តបន្ទាប់ ហាក់​ដាស់​ផ្នែក​គិត​នៃ​ខួរក្បាល​ឱ្យធ្វើ​ការ លែង​គិតពី​ដំណេក ដូចនេះ ទើប​អ្នក​ត្រូវ​ចំណាយពេល​យូរ​ទើប​អាច​គេង​លក់​។ ​វិធី​នេះ​ជួយ​បង្វឹក​ការគិត​របស់​អ្នក​ឱ្យ​ផ្អាក​គិត មក​ផ្តោតលើ​ដំណេក​វិញ ហើយ​វិធី​នេះ​ក៏​ទាមទារ​ឱ្យមាន​ការ​គេង​ថ្ងៃ​ដែរ​។​

-​ដំណាក់កាល​ដំបូង ៖ គេង​ថ្ងៃ​​

ប្រសិនបើ​អ្នក​ងោកងុយ​នៅពេល​ថ្ងៃ រសៀល ឬ​ល្ងាច អ្នក​គួរ​គេង​មួយស្របក់ (​ប្រមាណ ២០​នាទី​) ដោយ​ដាក់​ម៉ោង​រោទិ៍ ហើយ​ងើប​ភ្លាម​នៅពេល​ម៉ោង​រោទិ៍ កុំ​រេរា​បន្ត​គេង សូម្បីតែ​១​នាទី​ទៀត​ក៏ដោយ​។ គួរ​ចង់ចាំ​ថា គួរ​គេង​ថ្ងៃ​តែ​មួយដង​ប៉ុណ្ណោះ​ក្នុង​១​ថ្ងៃ និង​អាច​២​ទៅ​៣​ដង​សម្រាប់​ថ្ងៃ​ចុង​សប្តាហ៍​។

-​ដំណាក់កាល​ទី​២ ៖ការ​ងើប​ពី​ដំណេក​ទៀងទាត់

​​ការហ្វឹកហាត់​ខួរក្បាល​បន្ទាប់ គឺ​ត្រូវ​ភ្ញាក់​ពី​គេង​នៅពេល​នាឡិការោទិ៍ តាម​ម៉ោង​ដដែលៗ​ជា​រៀងរាល់ថ្ងៃ​នៃ​សប្តាហ៍​។ ជាធម្មតា អ្នក​ចាំបាច់​ត្រូវ​កំណត់​ម៉ោង​ចូល​គេង ដើម្បី​គេង​ឱ្យ​គ្រប់​ម៉ោង​ក្នុង​១​ថ្ងៃ ហោចណាស់​បាន ៧​ម៉ោង ដូចនេះ អ្នក​គួរ​គិត​ម៉ោង​ឱ្យបាន​ត្រឹមត្រូវ​ដើម្បី​កំណត់​ម៉ោង​រោទិ៍ និង​ម៉ោង​ចូល​គេង លៃ​យ៉ាងណា​កុំឱ្យ​ខ្វះ​។ ការ​គេង និង​ភ្ញាក់​ជា​ទៀងទាត់ ប្រៀបដូចជា​ការផ្ញើ​សារ​ទៅកាន់​ខួរក្បាល មានន័យថា បើ​អ្នក​ចូល​គេង​មិន​ទៀងទាត់ ឬ​ភ្ញាក់​មិន​ទៀងទាត់ ធ្វើឱ្យ​ខួរក្បាល​ម​មិន​ទម្លាប់​នឹង​ពេលវេលា​ជាក់លាក់​ណាមួយ​ដែល​ត្រូវ​គេង និង​ភ្ញាក់ ហើយ​អ្នក​អាច​នឹង​គេង​មិន​គ្រប់​ម៉ោង​ទៀត ទាំង​ភ្ញាក់ឡើង​នៅពេល​ព្រឹក​ជាមួយ​អារម្មណ៍​ហត់នឿយ មិន​ស្កប់ស្កល់​។

ការកំណត់​ម៉ោង​រោទិ៍ ធ្វើឱ្យ​ខួរក្បាល​ចំណាំបាន​ថា​ពេលណា​ត្រូវ​ភ្ញាក់ ហើយ​អាចឱ្យ​ខួរក្បាល​ដឹងបាន​ថា ប្រសិនបើ​អ្នកនឹង​ភ្ញាក់​នៅ​ម៉ោង​ណាមួយ​ជាក់លាក់ នោះ​អ្នកនឹង​ងងុយគេង​នៅពេល​ជា​ទៀងទាត់​នៅពេល​យប់​។ អ្នក​អាចមាន​អាកា​រៈ​ងោកងុយ​នៅពេល​ចាប់​ផ្តើមដំបូងៗ តែ​អ្នក​អាច​តបស្នង​ដោយ​ការ​គេង​ថ្ងៃ​ខ្លះ ហើយ​ការ​គេង​ថ្ងៃនេះ​អាច​បន្ថយ​មក​ត្រឹម ១៥ ឬ​១០ ឬ​៥​នាទី នៅពេល​អ្នក​អាច​ទម្លាប់​បាន​ហើយ​។​

-​ដំណាក់កាល​ទី​៣ ៖ ជោគជ័យ

​បន្ទាប់ពី​រាងកាយ​ទម្លាប់​នឹង​ម៉ោង​គេង ហើយ​អាច​គេង​ស្រួល​ហើយ​នោះ អ្នក​អាច​ត្រលប់មក​ចាប់​ទម្លាប់​ដើម​វិញ​បាន ដោយ​កុំ​ចាប់ផ្តើម​គំហុក​ពេក តែ​ត្រូវអនុវត្ត​បន្តិច​ម្តងៗ ទើប​មិន​បណ្តាលឱ្យ​ការព្យាយាម​ទាំង​អំបាលម៉ាន​ប្រែជា​អសារ​បង់​។ នៅពេល​អ្នកទទួលបាន​ជោគជ័យ អ្នក​អាច​បក​មក​ទទួលទាន​កាហ្វេ និង​មិនចាំបាច់​កំណត់​ម៉ោង​រោទិ៍​ទៀត​ទេ ប៉ុន្តែ​មុននឹង​ត្រលប់មក​ទម្លាប់​ចាស់ កុំ​ភ្លេច​ហ្វឹកហាត់​ឱ្យបាន​យ៉ាងតិច ៤​ទៅ​៥​ខែ​ជាមុនសិន​។ គួរ​យល់​ដឹងថា ក្នុងដំណាក់កាល​ហ្វឹកហាត់​១ និង​២ ចាំបាច់​ត្រូវអនុវត្ត​ឱ្យបាន​ខ្ជាប់ខ្ជួន​តាម​ពេលវេលា​កំណត់ ពុំ​នោះទេ​អ្នក​មិនអាច​ឈានដល់​ដំណាក់កាល​ទី​៣​ទេ​។ ​លើសពីនេះ ដើម្បី​បង្កើន​ប្រសិទ្ធភាព ក៏ដូចជា​ជំនួយ​ដល់​ការហ្វឹកហាត់​ខួរក្បាល អ្នក​គួរ​ធ្វើ​លំ​ហាត់ប្រាណ ដើម្បី​សុខភាព​រាងកាយ​ផង​៕លក្ខិណា

Related