ចាន់ វឌ្ឍនាកា ជួយបឹងកេត ឡើងវគ្គផ្ដាច់ព្រ័ត្រ ស្របពេលជប៉ុន ចង់បានខ្លាំង

ភ្នំពេញ៖ ខ្សែប្រយុទ្ធវ័យក្មេង ចាន់ វឌ្ឍនាកា បានជួយក្រុមបាល់ទាត់ តំណាងប្រទេសកម្ពុជា បឹងកេតអង្គរ ឲ្យឡើង វគ្គផ្ដាច់ព្រ័ត្រពាន TOYOTA Mekong Club Championship ជាបន្ដ បន្ទាប់ពីរកបាន ៣គ្រាប់ម្នាក់ឯង ក្នុងជ័យជម្នះលើ ក្រុមជើងឯក លីកកំពូលវៀតណាម Becamex Binh Duong ដោយលទ្ធផល ៣-២ កាលពីយប់ថ្ងៃទី០៦ ខែធ្នូ ឆ្នាំ ២០១៥ម្សិលមិញ នៅលើទឹកដីម្ចាស់ផ្ទះវៀតណាម ។

ស្របពេលព័ត៌មាននៃការចង់បាន ខ្សែប្រយុទ្ធវ័យ ២២ឆ្នាំរបស់បឹងកេតខាងលើ ទៅលេងនៅលីកជប៉ុន កំពុងទទួល បានការចាប់អារម្មណ៍ខ្លាំងនោះ ឥលូវនេះ ចាន់ វឌ្ឍនាកា បានបន្ថែមនូវភាពភ្ញាក់ផ្អើល ដ៏អស្ចារ្យទៀតហើយ ដោយ ការធ្វើបាន Hat-Trick ចំនួន ៣គ្រាប់ម្នាក់ឯង ទៅលើក្រុមជើងខ្លាំងវៀតណាម ដែលជាអតីតម្ចាស់ពាន TOYOTA Mekong Club Championship កាលពីឆ្នាំ២០១៤កន្លងទៅ ។

ជំនួបពាក់កណ្ដាលផ្ដាច់ព្រ័ត្រខាងលើនេះ តង់ទី១ រយៈពេល ១៣នាទីដំបូង ក្រុមម្ចាស់ផ្ទះ Becamex Binh Duong បានទទួលគ្រាប់បាល់ នាំមុខមុន ១គ្រាប់ ដែលធ្វើសម្រេចដោយកីឡាករ Nsi Amougou ប៉ុន្ដែនៅនាទីទី៤០ ចាន់ វឌ្ឍនាកា បានជួយក្រុមតំណាងប្រទេស ខ្លួនតាមស្មើវិញ ១-១ ដោយការទាត់បាល់ពិន័យ ១១ម៉ែត្រ ។ លុះចូល តង់ទី២ តារាបាល់ទាត់វ័យក្មេង កម្ពុជារូបនេះ បានបន្ថែម ២គ្រាប់ទៀត ធ្វើសម្រេចនៅនាទីទី៥៤ និងទី៨០ មុននឹង ក្រុមម្ចាស់ផ្ទះវាយបកបាន ១គ្រាប់ចុងក្រោយ ដោយកីឡាករ Nguyen Anh Doc  នៅនាទីទី៨៩ ធ្វើឲ្យចប់ការប្រកួត ក្រុមបឹងកេត ឈ្នះ ៣-២ តែម្ដង ។

សម្រាប់ជ័យជម្នះដ៏អស្ចារ្យនេះបានជួយ ក្រុមបឹងកេត ឲ្យបន្ដដំណើរទៅវគ្គផ្ដាច់ព្រ័ត្រ ដោយត្រូវជួបក្រុមជើងឯក លីកកំពូលថៃ Buriram United នៅថ្ងៃទី២០ ខែធ្នូខាងមុខ នៅលើទីលាននៃទីក្រុងបាងកក ប្រទេសថៃ ដើម្បីប្រជែង តំណែងជើងឯក នៃពានរង្វាន់អនុតំបន់ ទន្លេមេគង្គខាងលើ ។

ងាកមកចាប់អារម្មណ៍ជាមួយនឹង ខ្សែប្រយុទ្ធវ័យក្មេង ចាន់ វឌ្ឍនាកា វិញ ខណៈនេះរូបគេ កំពុងត្រូវបានភ្នាក់ងារ ដោះដូរកីឡាកររបស់ជប៉ុន ទាក់ទងចង់បានទៅលេង នៅលីកជប៉ុន តែមិនទាន់ដឹងក្លឹបណា ឬលីកកម្រិតណា នោះទេ ។ ជាមួយនឹងការបង្ហាញទម្រង់លេង ដ៏ល្អមួយរយៈពេលចុងក្រោយនេះ វឌ្ឍនាកា កាន់តែទទួលបានការ ចាប់អារម្មណ៍ ពីអ្នកស្នេហាវិស័យកីឡា ហើយភ្នាក់ងារដោះដូកីឡាករ អន្ដរជាតិនោះ ក៏ព្យាយាមទាក់ទង វឌ្ឍនាកា តាមរយៈក្លឹបបឹងកេត ជាច្រើនលើកផងដែរ ។

បើតាមការលើកឡើងរបស់លោក បែ មករា អ្នកចាត់ការក្រុមបឹងកេត បានបញ្ជាក់ថា ភ្នាក់ងារដោះដូរកីឡាករ របស់ជប៉ុននោះ ទំនងជាចង់បានកីឡាករ ចាន់ វឌ្ឍនាកា ខ្លាំង ទើបបានជាគេចំណាយ ពេលវេលាជាច្រើន ដើម្បី ទាក់ទងខ្សែប្រយុទ្ធ ស្នូលរបស់ក្លឹបបឹងកេតអង្គររូបនេះ ទៅលេងនៅលីកជប៉ុន ៕

ចាន់ វឌ្ឍនាកា ជួយបឹងកេត ឡើងវគ្គផ្ដាច់ព្រ័ត្រ ស្របពេលជប៉ុន ចង់បានខ្លាំង

ចាន់ វឌ្ឍនាកា ជួយបឹងកេត ឡើងវគ្គផ្ដាច់ព្រ័ត្រ ស្របពេលជប៉ុន ចង់បានខ្លាំង

ចាន់ វឌ្ឍនាកា ជួយបឹងកេត ឡើងវគ្គផ្ដាច់ព្រ័ត្រ ស្របពេលជប៉ុន ចង់បានខ្លាំង