ថែរក្សា​រាងកាយ​ដោយ​ការហាត់​ប្រាណ​

​ដើម្បី​ទទួលបាន​សុខភាព​ល្អ​ទាំង​ព្រម លំ​ហាត់ប្រាណ​គឺជា​កត្តា​ដែល​មិនអាច​ខ្វះ​បាន ។ ប្រការ​គួរ​យល់ដឹង​នោះ​គឺថា​លំ​ហាត់ប្រាណ​មាន​ច្រើនបែប​ច្រើនយ៉ាង ហើយ​គុណប្រយោជន៍​ក៏​ខុសៗ​គ្នា​ទៅតាម​នោះដែរ ដូចនេះ​អ្នក​ពុំគួរ​ហាត់ប្រាណ​តែមួយ​បែប​ដដែលៗ​នោះទេ ហើយ​គួរ​ផ្លាស់ប្តូ​រទាំង​ទម្លាប់ ទីកន្លែង និង សម្រប​លំ​ហាត់ប្រាណ​ទៅតាម​ស្ថានភាព​សុខភាព​របស់ខ្លួន​ផង​ទើប​ជាការ​ប្រសើរ ។​

១. លំ​ហាត់ប្រាណ​បែប​ជំនួយ​បេះដូង ៖
​មាន​សារៈសំខាន់​ចំពោះ​សុខភាព និង រាងកាយ​ទាំងមូល ដែល​អ្នក​គួរ​ហាត់​ជាប្រចាំ ។ លំ​ហាត់ប្រាណ​បេ​ប​នេះ​ជួយ​សម្រួល​អារម្មណ៍ គេង​លក់​ស្រួល សម្រួល​ចរន្តឈាម គ្រប់គ្រង​ការឡើង​ទម្ងន់ កាត់បន្ថយ​ការឡើង​សម្ពាធ​ឈាម គ្រប់គ្រង​កម្រិត​អាំង​ស៊ុយ​ឡាំង និង ជាតិ​ខ្លាញ់​ក្នុង​ឈាម ថែមទាំង​បន្ថែម​ថាមពល​ដល់​រាងកាយ និង រក្សា​រាង​ឱ្យ​សមសួន​ទៀតផង ។ ជាការ​ល្អ គួរ​ហាត់ប្រាណ​បែបនេះ​ឱ្យបាន​សរុប​ជា​មធ្យម ១៥០​នាទី ក្នុង​មួយ​សប្តាហ៍ ។ លំ​ហាត់ប្រាណ​ជំនួយ​បេះដូង​មានដូចជា ដើរ រត់​ត្រឹកៗ រត់ រាំ ហែល​ទឹក រាំ​អ៊ែ​រ៉ូ​ប៊ិក ជិះ​កង់ ។​ល​។​

ថែរក្សា​រាងកាយ​ដោយ​ការហាត់​ប្រាណ​

២. ការហ្វឹកហាត់​សាច់ដុំ ៖
​បន្ថែម​ពីលើ​ការហាត់​ជំនួយ​បេះដូង លំ​ហាត់ប្រាណ​សាច់ដុំ​ក៏​ជួយ​ដល់​សុខភាព​រាងកាយ​ផងដែរ ដូចជា ពង្រឹង​សាច់ដុំ និង​ជំនួយ​សុខភាព​ឆ្អឹង ។ អ្នកជំនាញ​ណែនាំ​ឱ្យ​ហាត់ ២ ថ្ងៃ​ក្នុង​មួយ​សប្តាហ៍ ដោយ​ផ្តោតលើ​សាច់​ដុំដៃ ទ្រូង ខ្នង ពោះ និង ជើង ។ លំ​ហាត់ប្រាណ​ប្រភេទ​នេះ មានដូចជា លើក​ទម្ងន់ ឧបករណ៍​ទាញ​ឬ​លើក​ទម្ងន់ ជាដើម ។​

ថែរក្សា​រាងកាយ​ដោយ​ការហាត់​ប្រាណ​

៣. ចលនា ៖
​ចំណុច​សំខាន់​មិនអាច​ខ្វះ​បាន​ដែល​ប្រៀបដូចជា​ការហាត់​ប្រាណ​ដែរនោះ គឺ​ចលនា​នៃ​រាងកាយ មានន័យថា អ្នក​គួរ​មាន​ចលនា​ជាប្រចាំ មិន​ថា​ការដើរ​ទៅនេះ​ទៅនោះ ចុះឡើង​ជណ្តើរ​ជើង ពត់ពេន​ខ្លួន ឬ​ធ្វើ​កិច្ចការ​ផ្ទះ ជាជាង​ការ​អង្គុយ​សំកុក​មើល​ទូរទស្សន៍ លេង​ហ្គេម ឬ ធ្វើការ​ភ្លឹក​តែ​ពីមុខ​កុំ​ព្យូ​រ​ទ័​រ​យូរពេក ។ តាម​ការស្រាវជ្រាវ​បាន​បង្ហាញថា ការ​នៅ​ស្ងៀម​មិន​ធ្វើ​ចលនា អាច​ជះឥទ្ធិពល​អាក្រក់​ដល់​សុខភាព ដូចជា កាត់បន្ថយ​ចរន្តឈាម ពន្យឺត​ដល់​ការ​កម្ចាត់​កាឡូរី និង​ពិបាក​ក្នុងការ​គ្រប់គ្រង​សុខភាព​ជាពិសេស​អ្នកមាន​ជំងឺ​រ៉ាំរ៉ៃ (​លើសឈាម ឬ ទឹកនោមផ្អែម​) ។ ជាការ​ល្អ គួរ​ងើប​ដើរ ឬ ធ្វើ​ចលនា​ពីរ​ទៅ​បី​នាទី​រៀងរាល់ ១ ម៉ោង​ម្តង ៕​លក្ខិណា​

ថែរក្សា​រាងកាយ​ដោយ​ការហាត់​ប្រាណ​