ឃាតកកាប់សម្លាប់មួយគ្រួសារ នៅខេត្តព្រះសីហនុ ត្រូវចាប់ខ្លួន នៅស្រុកមុខកំពូល នៅព្រឹក ៧មករា

កណ្តាល៖ ទីបំផុតឃាតកដែលបានកាប់សម្លាប់ សមាជិកគ្រួសារ៧នាក់ នៅក្បាលឆាយ ខេត្តព្រះសីហនុ នាថ្ងៃទី២៩ ខែធ្នូ ឆ្នាំ២០១៥ កន្លងមកនេះ ត្រូវបានកម្លាំងនគរបាលធ្វើការឃាត់ខ្លួនបានហើយ នៅព្រឹកថ្ងៃទី៧ ខែមករា ឆ្នាំ២០១៦ នេះ ស្ថិតនៅ ស្រុកមុខកំពូល ខេត្តកណ្តាល។

សេចក្តីរាយការណ៍បានឲ្យដឹងថា ឃាតកដែលបានកាប់សម្លាប់ប្រជាពលរដ្ឋមួយគ្រួសារនៅក្បាលឆាយ នេះ ត្រូវបានឃាត់ខ្លួន នៅម៉ោងប្រមាណ៩ ព្រឹកថ្ងៃទី៧ ខែមករា ឆ្នាំ២០១៦ នេះ ស្ថិតនៅស្រុកមុខកំពូល ខេត្តកណ្តាល។

សវតារឿង៖ ស្នងការនគរបាល ខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានឲ្យដឹងថា ករណីកាប់ប្រហារដោយពូថៅ លើជនរងគ្រោះមួយគ្រួសារ នៅតំបន់ក្បាលឆាយ នៅក្រុម២១ ភូមិ១ សង្កាត់១ ក្រុងព្រះសីហនុនោះ ផ្តើមចេញពីរឿងគំនុំ ហើយបណ្តាលឲ្យជនរងគ្រោះ ចំនួន៧នាក់ ស្លាប់ និងរងរបួសធ្ងន់ស្រាល ត្រូវបានបញ្ជូនទៅសង្គ្រោះនៅមន្ទីរពេទ្យបង្អែក។

យោងតាមគេហទំព័រ របស់អគ្គស្នងការដ្ឋាន នគរបាលជាតិ បានឲ្យដឹងថា លោកឧត្តមសេនីយ៍ស្នងការ បានមានប្រសាសន៍ថា ករណីឃាតកម្មនេះ បង្កឡើងដោយជនសង្ស័យម្នាក់ ប្រើខ្នងពូថៅវាយទៅលើជនរងគ្រោះ ហើយនៅពេលនេះ កម្លាំងនគរបាលជំនាញ សហការជាមួយកម្លាំងអធិការ និងកម្លាំងប៉ុស្តិ៍ កំពុងធ្វើការស្រាវជ្រាវយ៉ាងយកចិត្តទុកដាក់បំផុត ដើម្បីតាមចាប់ឃាតក យកមកផន្ទាទោស។

លោកឧត្តមសេនីយ៍ទោ ជួន ណារិន្ទ បានបន្ថែមថា ជនរងគ្រោះ៧នាក់ (ប្រុស២ ស្រី៥) រួមមាន ទី១.ជីដូន អាយុ ៦៥ឆ្នាំ មិនស្គាល់ឈ្មោះរបួសក្បាលធ្ងន់, ទី២.ឈ្មោះ អ៊ុ ផាន់ណា ភេទស្រី អាយុ ៣២ឆ្នាំ, ទី៣.ឈ្មោះ គង់ ផាន់ណារីន ភេទស្រី អាយុ ១៣ឆ្នាំ របួលក្បាលធ្ងន់, ទី៤.ឈ្មោះ គង់ ផាន់ណារី ភេទស្រី អាយុ១០ឆ្នាំ របួសក្បាលធ្ងន់, ទី៥.ឈ្មោះ គង់ ផាន់ណាសុន ភេទប្រុស អាយុ ៥ឆ្នាំ របួសក្បាលធ្ងន់, ទី៦.ក្មេងប្រុសមិនស្គាល់ឈ្មោះ អាយុ ៣ឆ្នាំ របួសក្បាលធ្ងន់ និងទី៧.ក្មេងស្រីមិនស្គាល់ឈ្មោះអាយុ១ឆ្នាំ។

សូមបញ្ជាក់ថា ហេតុការណ៍កាប់ប្រហារ ដោយពូថៅនេះ បានកើតឡើង កាលពីវេលាម៉ោង១:៣០នាទីយប់ ថ្ងៃទី២៩ ខែធ្នូ ២០១៥ នៅភូមិ១ សង្កាត់១ ក្រុង-ខេត្តព្រះសីហនុ ខណៈបុរសជាប្តី និងជាឪពុកចេញទៅនេសាទបាត់៕

ឃាតកកាប់សម្លាប់មួយគ្រួសារ នៅខេត្តព្រះសីហនុ ត្រូវចាប់ខ្លួន នៅស្រុកមុខកំពូល នៅព្រឹក ៧មករា