ព័ត៌មាន​អន្តរជាតិ &raquo សេដ្ឋកិច្ច​សាកល

ប្រទេស​មី​យ៉ា​ន់​ម៉ា ៖  អ្នកទិញ​អចលនទ្រព្យ​ភាគច្រើន​បាន​ធ្វើ​កិច្ចសន្យា​ទិញ​-​លក់​មិន​ផ្លូវការ ជា​ហេតុ​ធ្វើ​ឲ្យ​មានការ​ធ្លាក់​ចុះ​ក្នុង​ការ​ផ្ទេរសិទ្ធិ​ជា​ម្ចាស់​ស្របច្បាប់ និង​អាច​បាត់បង់​សិទ្ធិ​ជា​ម្ចាស់​នៅ​ពេល​ឡើង​តុលាការ ។ នេះ​បើ​យោង​តាម​ប្រសាសន៍​របស់​លោក​មន្ត្រីជាន់ខ្ពស់​នៃ​អគ្គនាយកដ្ឋាន​ប្រាក់​ចំណូល​ផ្ទៃក្នុង បាន​ប្រាប់​មី​យ៉ា​ន់​ម៉ា​ថែម​ស៍។

មន្ត្រី​ដែល​មក​ពី​អគ្គនាយកដ្ឋាន​ពន្ធ និង​ប្រាក់​ចំណូល​ឲ្យ​ដឹង​ថា ៖ « ការ​ទិញ​អចលនទ្រព្យ ដែល​រួម​មាន​ទាំង​ខុន​ដូ​ផង​នោះ ជា​ធម្មតា​គឺ​ត្រូវ​បាន​ធ្វើ​ឡើង​តាម​កិច្ចសន្យា​មិន​ផ្លូវការ ។ វិធី​នេះ​ទៀត​សោត នឹង​អាច​ធ្វើ​ឲ្យ​អ្នកបញ្ជា​ទិញ​រង​នូវ​ហានិភ័យ ប្រសិនបើ​តុលាការ​តម្រូវ​ឲ្យ​ពួក​គេ​បង្ហាញ​ភាព​ជា​ម្ចាស់ទ្រព្យ​នៅ​តុលាការ » ។

លោក​បន្ត​ថា ៖ « នៅ​ក្នុង​ប្រតិបត្តិការ​អចលនទ្រព្យ ទោះបីជា​អ្នកបញ្ជា​ទិញ​ជា​ម្ចាស់ទ្រព្យ​រួច​ហើយ​ក៏​ដោយ តែ​ពួក​គេ​ត្រូវ​តែ​ឆ្លងកាត់​ដំណាក់កាល​មួយ​ចំនួន​ដើម្បី​ទទួល​បាន​សិទ្ធិ​ជា​ម្ចាស់​ស្របច្បាប់ ។ ប៉ុន្តែ​ពួក​គេ​មិន​ទាន់​ដឹង​នៅឡើយ​ទេ​ថា នៅ​ពេល​ដែល​ពួក​គេ​ឡើង​តុលាការ​ដើម្បី​សាកសួរ​ថា តើ​ពួក​គេ​ជា​ម្ចាស់​ស្របច្បាប់​ឬ​អត់ ពួក​គេ​នឹង​អាច​បាត់បង់​សិទ្ធិ​នោះ ព្រោះតែ​ពួក​គេ​បាន​ប្រើ​កិច្ចសន្យា​មិន​ផ្លូវការ » ។

គួរ​បញ្ជាក់​ផង​ដែរ​ថា ដើម្បី​ទទួល​បាន​សិទ្ធិ​ស្របច្បាប់ អ្នកបញ្ជា​ទិញ​ត្រូវ​តែ​ដាក់​ឯកសារ​មួយ​ចំនួន​ដូច​ជា សៀវភៅ​គ្រួសារ លិខិត​ចម្លង​អត្តសញ្ញាណប័ណ្ណ រូបថត​អចលនទ្រព្យ និង​លិខិត​ចុះ​កិច្ចសន្យា​រវាង​អ្នកបញ្ជា​ទិញ និង​អ្នកលក់ ទៅ​ដល់​ក្រុមការងារ​វាយតម្លៃ​អចលនទ្រព្យ​ក្នុង​តំបន់ ។

ជំហាន​បន្ទាប់​ទៀត អ្នកបញ្ជា​ទិញ​ត្រូវ​តែ​បង់ពន្ធ​លើ​សេវា​ឯកសារ និង​ពន្ធ​ប្រាក់​ចំណូល​ទៅ​កាន់​នាយកដ្ឋាន​ពន្ធដារ ។ បន្ទាប់​មក ពួក​គេ​ត្រូវ​ចុះបញ្ជី​នៃ​ការ​ទូទាត់​ប្រាក់​ពន្ធ​ដែល​ត្រូវ​បង់​។ ក្រោយ​ពី​ពួក​គេ​មាន​ឯកសារ​គ្រប់គ្រាន់​ហើយ នោះ ពួក​គេ​នឹង​អាច​ចុះ​ឈ្មោះ​សុំ​សិទ្ធិ​ជា​ម្ចាស់​ស្របច្បាប់​នៅ​មន្ទីរ​ស្រុក ។

លោក​រដ្ឋមន្ត្រី​មាន​ប្រសាសន៍​ឲ្យ​ដឹង​ទៀត​ថា ៖ « ពួក​យើង​កំពុង​តែ​ជំរុញ​ឲ្យ​អ្នកបញ្ជា​ទិញ​ទាំងអស់​ឲ្យ​ចុះ​ឈ្មោះ​ដើម្បី​សុំ​សិទ្ធិ​ជា​ម្ចាស់​ស្របច្បាប់ និង​បង់ពន្ធ​លើ​អចលនទ្រព្យ​នោះ​ផង​ដែរ ពីព្រោះ​ប្រាក់​ចំណូល​រដ្ឋ​បាន​ធ្លាក់​ចុះ​យ៉ាង​ខ្លាំង ខណៈ​ដែល​មាន​អ្នកបញ្ជា​ទិញ​មួយ​ចំនួន​តូច​ប៉ុណ្ណោះ​បាន​សុំ​សិទ្ធិ​ជា​ម្ចាស់​ស្របច្បាប់ » ។

អ្នកបញ្ជា​ទិញ​អចលនទ្រព្យ​ដែល​ប្រើប្រាស់​កិច្ចសន្យា​មិន​ផ្លូវការ​កាលពី​ឆ្នាំ​មុន បាន​នាំ​គ្នា​មក​សុំ​សិទ្ធិ​ស្របច្បាប់​ដែល​តម្រូវ​ឲ្យ​ពួក​គេ​បង់ថ្លៃ​សេវា និង​ប្រាក់​ចំណូល​ពន្ធ​ដូច​អ្នកបញ្ជា​ទិញ​ថ្មី​ដែរ ។ ប៉ុន្តែ​ពួក​គេ​អាច​ជួប​ប្រទះ​បញ្ហា​ខ្លះ ដោយសារ​តែ​អ្នកលក់​មួយ​ចំនួន​អាច​នឹង​ទាមទារ​ថ្លៃ​ចុះហត្ថលេខា​ទៅ​លើ​អចលនទ្រព្យ​កាលពី​ឆ្នាំ​មុន ហើយ​ទើបតែ​ចង់​ផ្ទេរ​ឈ្មោះ​នា​ពេល​នេះ ។

ដូច្នេះ លោក​រដ្ឋមន្ត្រី ក៏​បាន​ស្នើ​ឲ្យ​អ្នកបញ្ជា​ទិញ​មក​ធ្វើការ​ផ្ទេរ​ឈ្មោះ​ឲ្យ​បាន​ឆាប់ បន្ទាប់​ពី​បាន​ទិញ​អចលនទ្រព្យ​ហើយ ។

ទោះជា​យ៉ាងណា អនុប្រធាន​សមាគម​អចលនទ្រព្យ​មី​យ៉ា​ន់​ម៉ា លោក Than Oo មាន​ប្រសាសន៍​ថា ៖ « ម្ចាស់​អា​ផាត​មិន​ភាគច្រើន​ទិញ ឬ​លក់​អចលនទ្រព្យ​របស់​គេ​បាន​ប្រើប្រាស់​ហត្ថលេខា​ម្ចាស់​ដី​ធំ​បំផុត ហើយ​មាន​តិចតួច​ប៉ុណ្ណោះ​ដែល​សុខចិត្ត​ផ្ទេរ​ឈ្មោះ​ដើម្បី​ទទួល​សិទ្ធិ​ស្របច្បាប់ » ។

លោក Than Oo បន្ត​ថា ៖ « ច្បាប់​ដែល​បញ្ជាក់​ពី​ម្ចាស់​កម្មសិទ្ធិ​នេះ អាច​នឹង​ធ្វើ​ឱ្យ​អ្នកបញ្ជា​ទិញ​ដ៏​មាន​សក្តានុពល​ទទួល​បាន​កម្ចី​ឥណទាន​ផង​ដែរ ។ ប៉ុន្តែ​ច្បាប់​ស្តី​ពី​អា​ផាត​មិន​នេះ ហាក់ដូចជា​មិន​អាច​បង្កើត​បាន​ភ្លាម​ៗ​ឡើយ ដោយសារ​តែ​ការ​ខ្វះខាត​លើ​បញ្ហា​ហិរញ្ញវត្ថុ​របស់​អ្នកបញ្ជា​ទិញ ដែល​ជំរុញ​ឲ្យ​ពួក​គេ​មិន​ចង់​ផ្ទេរសិទ្ធិ​ស្របច្បាប់ ដែល​តម្រូវ​ឲ្យ​បង់ពន្ធ​។ បច្ចុប្បន្ន​នេះ អា​ផាត​មិន​ដែល​បាន​សាងសង់​ឡើង​ដោយ​ក្រុមហ៊ុន គឺ​អ្នកបញ្ជា​ទិញ​គ្រាន់តែ​ឲ្យ​ប្រាក់​ទៅ​ខាង​ក្រុមហ៊ុន ដោយ​គ្មាន​ការ​ចុះ​កិច្ចសន្យា​ជា​ផ្លូវការ​អ្វី​ទាំងអស់ » ។

ក្នុង​នោះ​ដែរ កាលពី​ខែមេសា ឆ្នាំ​២០១៥ អត្រាពន្ធ​នៃ​ចំណូល​នៃ​អ្នកបញ្ជា​ទិញ​អចលនទ្រព្យ ដែល​ទាប​ជាងគេ​បំផុត គឺ​ទទួល​បាន​៣% គិត​ជា​ទឹកប្រាក់​មាន​ចំនួន​១០០​លាន​ខ្យា​ដ ឡើង​ទៅ​ដល់​៥% ដែល​មាន​ទឹកប្រាក់​សរុប​ចំនួន​៥០០​លាន​ខ្យា​ដ និង​ក្នុង​ពាណិជ្ជកម្ម​ឡើង​រហូត​ដល់​១០% ស្មើនឹង​ទឹកប្រាក់​ចំនួន​១.០០០​លាន​ខ្យា​ដ ៕