ព័ត៌មាន​អន្តរជាតិ &raquo សេដ្ឋកិច្ច​សាកល

បណ្តាញ​ក្រុមហ៊ុន​គណនេយ្យ​កិច្ច​សកល ហៅ​កាត់​ថា BDO បាន​ព្យាករ​ថា នៅ​ឆ្នាំ​២០១៦​នេះ គឺជា​ឆ្នាំ​ដែល​ទីផ្សារ​ហិរញ្ញវត្ថុ​តំបន់​អាស៊ាន​ស្ថិត​នៅ​ក្នុង​ភាព​មិន​ប្រាកដប្រជា ខណៈ​ដែល​អត្រា​ការ​ប្រាក់​ដុល្លារ និង​ការ​ចុះ​ខ្សោយ​នៃ​សេដ្ឋកិច្ច​ចិន បាន​ធ្វើ​ឲ្យ​មាន​ភាព​រង្គោះរង្គើ​ដល់​ភាព​វិជ្ជមាន​ក្នុង​ឆ្នាំ​២០១៥ ។ នេះ​បើ​យោង​តាម​ប្រសាសន៍​របស់​លោក Solly Benaim ប្រធាន​ក្រុមហ៊ុន​គណនេយ្យ​កិច្ច​អចលនទ្រព្យ​សកល បាន​ប្រាប់​ទស្សនាវដ្តី​អចលនទ្រព្យ​ពិភពលោក ។

លោក Solly Benaim បន្ថែម​ថា ៖ «​ទោះជា​បែប​នេះ​ក្តី ក៏​នៅ​មានឱកាស​ខ្លះ​ទៀត​ដែល​បើកចំហ​ចំពោះ​វិស័យ​អចលនទ្រព្យ​ក្នុង​តំបន់​អាស៊ី​ដែរ​ដូច​ជា ប្រតិបត្តិការ​លើ​ទ្រព្យសកម្ម​មិនមែន​ប្រពៃណី ជាដើម ។ ការ​យល់​ដឹង​ច្បាស់​ពី​វិស័យ​អចលនទ្រព្យ​លើ​ទីផ្សារ​នីមួយ​ៗ អាច​នឹង​ក្លាយជា​កូនសោ​សំខាន់​ដើម្បី​ជំរុញ​ដល់​កំណើន​អចលនទ្រព្យ​ក្នុង​ឆ្នាំ​២០១៦ » ។

លោក​បន្ត​ទៀត​ថា ៖ « ការ​កើនឡើង​នៃ​តម្លៃ​អត្រា​ការ​ប្រាក់​ដោយ​ធនាគារ​បម្រុង​អា​មេ​រិ​ក គឺ​ស្ថិត​ក្នុង​ការ​អង្កេត​ទី​មួយ ប៉ុន្តែ​ការ​រឹត​បន្តឹង​ប្រាក់​ដុល្លារ គឺ​មិនមែន​ជា​កត្តា​ដែល​ជះ​ឥទ្ធិពល​ដល់​វិស័យ​អចលនទ្រព្យ​ឡើយ ។ មូលធន​ដែល​ត្រូវ​បាន​វិនិយោគ​នឹង​ត្រូវ​កើន​ឡើងជា​បន្តបន្ទាប់ ដូច្នេះ​ពេល​ដែល​អត្រា​ប្រាក់​ដុល្លារ​ស្ថិត​នៅ​ចំណុចសូន្យ​នោះ វិនិយោគិន​នឹង​សម្លឹង​មើល​ឱកាស​ដើម្បី​រក​ប្រាក់​ចំណេញ​បន្ថែម​ទៀត » ។

ឥណ្ឌា​បាន​សម្លឹង​ឃើញ​ការ​វិនិយោគ​ធំ​ៗ​ពី​លោក​ខាងលិច ខណៈ​ដែល​បណ្តា​ទីក្រុង​ធំ​ៗ​នៅ​ក្នុង​អាស៊ី​ដូច​ជា ក្រុង​ម៉ានីល និង​ក្រុង​បាងកក ក៏​សម្លឹង​ឃើញ​កា​រិ​និ​យោគ​ពី​លោក​ខាងលិច​ដូច​គ្នា​។ ទោះបីជា​វា​នឹង​មាន​ផល​ប៉ះពាល់​អវិជ្ជមាន​លើ​រូបិយប័ណ្ណ​ក្នុងស្រុក​ក្តី ក៏​ការ​វិនិយោគ​ជា​ប្រាក់​ដុល្លារ​នឹង​បន្ត​ហូរ​ចូល​ក្នុង​ទីផ្សារ ដែល​នឹង​ធ្វើ​ឲ្យ​សេដ្ឋកិច្ច​រើប​ឡើង​វិញ​នៅ​ពាក់កណ្តាល​ឆមាស​ឆ្នាំ​២០១៦ ។ ទន្ទឹម​នឹង​នេះ ម៉ា​ឡេ​ស៊ី និង​សិង្ហ​បុរី គឺជា​អ្នក​ទទួល​ផង ចំណែក​បណ្តា​ប្រទេស​ដែល​សុខចិត្ត​ទទួលយក​ប្រាក់​ចំណេញ​ទាប​វិញ ក៏​អាច​នឹង​មានឱកាស​ទទួល​មូលធន​ចំណេញ​លើ​ការ​រើប​ឡើង​វិញ​នៃ​ការ​វិនិយោគ​នៅ​ដំណាច់ឆ្នាំ​២០១៦ ផង​ដែរ ។

ជាមួយ​គ្នា​នេះ​ដែរ ការ​ធ្លាក់​ចុះ​នៃ​កំណើនសេដ្ឋកិច្ច​ចិន បាន​ក្លាយជា​ប្រធានបទ​មួយ​ដ៏​ក្តៅ​គគុក​សម្រាប់​វិនិយោគិន និង​សហគ្រិន​ធំ​ៗ​ជា​ច្រើន​នៅ​ដំណាច់ឆ្នាំ​២០១៥​កន្លង​មកនេះ ហើយនឹង​អាច​ជះ​ឥទ្ធិពល​អាក្រក់​ដល់​ទស្សនវិស័យ​វិនិយោគ​លើ​វិស័យ​អចលនទ្រព្យ​នៅ​ក្នុង​តំបន់​អាស៊ាន​នៅ​ឆ្នាំ​២០១៦ ផង​ដែរ ។ ជា​ពិសេស សិង្ហ​បុរី​នឹង​មាន​អចលនទ្រព្យ​ទំនេរ​ចោល​ច្រើន ខណៈ​ដែល​ប្រាក់ និង​តម្រូវការ​របស់​សាធារណរដ្ឋ​ប្រជា​និមិត្ត​បាន​ធ្លាក់​ចុះ ។

ដើម្បី​កែប្រែ​ស្ថានភាព​ទីផ្សារ​អចលនទ្រព្យ​ឲ្យ​ប្រសើរ​ឡើង​ក្នុង​គ្រា​មាន​វិបត្តិ​នេះ វិនិយោគិន​ទាំងឡាយ​គួរតែ​ពិចារណា​លើ​ប្រភេទ​អចលនទ្រព្យ​មួយ​ណា​ដែល​ខ្លួន​ចង់​ធ្វើ និង​ទីតាំង​សាងសង់​អចលនទ្រព្យ​នោះ ។ ឧទាហរណ៍ សម្រាប់​ប្រទេស​ម៉ា​ឡេ​ស៊ី គឺជា​ឱកាសល្អ​ក្នុង​ការ​បង្កើន​ការ​សាងសង់​អចលនទ្រព្យ​ក្នុង​តំបន់​ដែល​មាន​ប្រជាប្រិយភាព​ខ្លាំង ខណៈ​ដែល​វិនិយោគិន​បរទេស​អាច​ទិញ​អចលនទ្រព្យ​ដោយ​ខ្លួនឯង ដោយ​គោរព​លក្ខខណ្ឌ​មួយ​ចំនួន​ប៉ុណ្ណោះ ។

និន្នាការ​នេះ​ទៀត​សោត ក៏​ត្រូវ​បាន​អនុវត្ត​ទូ​ទាំង​តំបន់​ផង​ដែរ ។ ចំណែក​នៅ​ឥណ្ឌា​វិញ ក្រុមហ៊ុន BDO បាន​ប្រតិបត្តិ​លើ​ទ្រព្យសកម្ម​សុទ្ធ ជា​ពិសេស ទៅ​លើ​តម្លៃ​ផ្ទះ​ថោក​ៗ ។ ក្រុមហ៊ុន​ព្យាករ​ថា ប្រតិបត្តិការ​ទាំងនេះ​នឹង​ធ្វើ​ឲ្យ​មាន​កំណើន​អចលនទ្រព្យ​ក្នុង​តំបន់​ដែល​មាន​ប្រជាសាស្ត្រ​អំណោយផល​នៅ​ឆ្នាំ​២០១៦ នៃ​ការ​រីក​លូតលាស់​របស់​ប្រជាជន​ឥណ្ឌា​ថ្នាក់​កណ្តាល ស្រប​នឹង​កំណើនប្រជាជន​នៅ​តំបន់​ទីក្រុង ។ 

និន្នាការ​នេះ និង​ផែនការ​ដែល​កំណត់​បទ​ប្បញ្ញត្តិ​លើ​ឧស្សា​កម្ម​អចលនទ្រព្យ​មិន​ធ្លាប់​មាន​នេះ​បាន​ធ្វើ​ឲ្យ​ឥណ្ឌា​ក្លាយជា​ប្រទេស​ទាក់ទាញ​វិនិយោគិន​ជា​ច្រើន ។ ដូច្នេះ​ហើយ​សហគ្រិន និង​វិនិយោគិន​ទាំងឡាយ​គួរតែ​បន្ត​ធ្វើ​បទ​ប្បញ្ញត្តិ​នេះ​នៅ​ក្នុង​តំបន់​អាស៊ី ខណៈ​ដែល​ឱកាសល្អ​មក​ដល់ ទោះបីជា​មាន​ឧបសគ្គ​មួយ​ចំនួន​ពី​អា​មេ​រិ​ក និង​ចិន នៅ​ដើម​ឆមាស​ឆ្នាំ​២០១៦ នេះ​ក្តី ៕