ព័ត៌មាន​អន្តរជាតិ &raquo សេដ្ឋកិច្ច​សាកល

ប្រទេស​ចិន ៖ ការ​ស្ទុះ​ងើបឡើង​ខ្លាំង​នៃ​វិស័យ​អចលនទ្រព្យ​ចិន គឺ​ដោយសារ​តែ​ការ​ខិតខំ​ប្រឹងប្រែង​របស់​រដ្ឋាភិបាល​ក្នុង​ការ​លក់​ផ្ទះល្វែង​ឱ្យ​ដំណើរការ​ទៅ​យ៉ាង​រលូន ។ នេះ​បើ​តាម​ប្រសាសន៍​របស់​អ្នកជំនាញ​ទីផ្សារ​បាន​ឲ្យ​ដឹង​កាលពី​ពេល​ថ្មី​ៗ​នេះ ។

បញ្ជីសារពើភ័ណ្ឌ​អចលនទ្រព្យ​នៅ​ប្រទេស​ចិន បាន​កើនឡើង​៦,២​ពាន់​លាន​ម៉ែត្រការ៉េ​នៅ​ដំណាច់ឆ្នាំ​២០១៥ ។ នេះ​បើ​យោង​តាម​បណ្ឌិតសភា​ចិន ដែល​បាន​កំណត់​ការ​លក់​ផ្ទះល្វែង​ក្នុង​រយៈពេល​៥​ឆ្នាំ​ឲ្យ​បាន​លឿន​បំផុត ។

ប្រធាន​ទីផ្សារ​នៃ​ក្រុមហ៊ុន​អន្តរជាតិ Bocom លោក Hong Hao ឱ្យ​ដឹង​ថា​៖ « ឧបសគ្គ​ចំពោះ​មុខ​មានការ​ពិបាក​ខ្លាំង ខណៈ​ដែល​តួលេខ​នៃ​បញ្ជីសារពើភ័ណ្ឌ​មាន​ចំនួន​តិច»។

ភាព​ជា​ម្ចាស់​អចលនទ្រព្យ​នៅ​ពេល​ថ្មី​ៗ​នេះ គឺ​មាន​ចំនួន​៩០%​នៃ​ប្រជាជន​សរុប ដូច្នេះ លោក Hong Hao បាន​សរសេរ​ក្នុង​របាយការណ៍​ថា ៖ « ប្រជាជន​១០% ប្រមាណ​ជា​៤៦​លាន​នាក់ គឺ​គ្មាន​ផ្ទះ​ផ្ទាល់ខ្លួន​ឡើយ ។ ពួក​យើង​បាន​មើល​រំលង​ពី​តម្រូវការ​ជួល ពីព្រោះ​អចលនទ្រព្យ​មាន​តម្លៃ​ខ្ពស់ ។ ជាង​នេះ​ទៀត ដោយសារ​តែ​តម្លៃ​អចលន​ទ្រព្យ​ឡើងថ្លៃ​បែប​នេះ​ហើយ យើង​ពិបាក​និយាយ​ថា ទីផ្សារ​អចលនទ្រព្យ​មិន​កើនឡើង​ណាស់ ។ ចំពោះ​អចលនទ្រព្យ​នៅ​ក្នុង​ទីក្រុង​ថ្នាក់​ទី​៣ និង​ទី​៤ របស់​ចិន មាន​បរិត្តផរណា​រួច​ទៅ​ហើយ ហើយ​កម្រិត​បញ្ជីសារពើភ័ណ្ឌ​នៃ​ទីក្រុង​ថ្នាក់​ទី​២ និង​ទី​៣ ប្រហែលជា​មិន​អាច​ធ្លាក់​ចុះ​ឡើយ ។ ដូច្នេះ ការ​រើប​ឡើង​វិញ​នៃ​ស​ន្ទ​ស្សន៍​តម្លៃ​អចលនទ្រព្យ​នឹង​អាច​កើនឡើង​ខ្លាំង​ជាក់​ជា​ពុំខាន » ។

ភាព​ខុស​គ្នា​នៃ​ទីផ្សារ​អចលនទ្រព្យ​របស់​ចិន បាន​ពង្រីក​វិសាលភាព​របស់​ខ្លួន​កាន់តែ​ខ្លាំង​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ ខណៈ​ដែល​តម្លៃ​អចលនទ្រព្យ​នៅ​ទីក្រុង​នាំមុខ​របស់​ចិន​កើនឡើង​ខ្ពស់​គួរ​ឲ្យ​កត់សម្គាល់ ។ ចំណែក​តម្លៃ​អចលនទ្រព្យ​នៅ​ទីក្រុង​ថ្នាក់​ទី​២ មាន​ស្ថិរភាព ប៉ុន្តែ​អចលនទ្រព្យ​នៅ​តាម​បណ្តា​ទីក្រុង​តូច​ៗ​វិញ​បាន​ធ្លាក់​ចុះ ដោយសារ​តែ​មានការ​ផ្គត់ផ្គង់​លើស​ស្រប​ពេល​ដែល​សេដ្ឋកិច្ច​ចិន​កំពុង​ធ្លាក់​ចុះ​៦,៩% ជា​អត្រា​ទាប​បំផុត​ក្នុង​រយៈពេល​២៥​ឆ្នាំ ។

រដ្ឋាភិបាល​ចិន​ក៏​បាន​ចាត់វិធានការ​មួយ​ចំនួន​ផង​ដែរ​ដើម្បី​កាត់​បន្ថយ​ការ​ផ្គត់ផ្គង់​ហួសកំណត់​។ សម្រាប់​គោលនយោបាយ​ចុង​ក្រោយ អ្នកបញ្ជា​ទិញ​ផ្ទះ​លើក​ដំបូង​អាច​បង់ប្រាក់​អប្បបរមា​២០% និង​បង់​ជា​បន្តបន្ទាប់​ទៀត​២៥% ។ ប៉ុន្តែ​គោលនយោបាយ​នេះ​មិន​ត្រូវ​បាន​អនុវត្ត​នៅ​ទីក្រុង​នាំមុខ​របស់​ចិន (​ប៉េ​កាំ​ង និង​សៀង​ហៃ​) ឡើយ ។
ទោះជា​យ៉ាងណា មនុស្ស​មួយ​ចំនួន​ថា វិធានការ​ថ្មី​នេះ​នឹង​ផ្តល់​អត្ថប្រយោជន៍​ដល់​បណ្តា​ក្រុង​ថ្នាក់​ទី​២ ពេល​ដែល​តម្រូវការ​កំពុង​កើនឡើង​ខ្លាំង ។ ប៉ុន្តែ​ក្រុម​អ្នកវិភាគ​ឲ្យ​ដឹង​ថា ពួក​គេ​មិន​រីករាយ​នឹង​ការ​លក់​ផ្ទះ​ដ៏​ច្រើន​នេះ​ទេ ។

អគ្គនាយករង​នៃ​សមាគម​ស្រាវជ្រាវ​អចលនទ្រព្យ Guangdong លោក Han Shitong លើក​ឡើង​ថា ៖ « គោលការណ៍​ថ្មី​មិន​ត្រូវ​បាន​អនុវត្ត​តែ​ប្រជាជន​មួយ​ផ្នែក​តូច​នោះ​ទេ ពោល​គឺ​សម្រាប់​អ្នក​ដែល​មាន​លទ្ធភាព​បង់ប្រាក់​២៥% មុន​ប៉ុណ្ណោះ » ។

បើ​យោង​តាម​និន្នាការ​ស្រាវជ្រាវ​មូលធន​ឲ្យ​ដឹង​ថា ទីក្រុង​តូច​ៗ​ទាំងនេះ គឺជា​ទីក្រុង​ដែល​ចូលរួម​ចំណែក​យ៉ាង​ខ្លាំង​ដល់ទី​ផ្សារ​អចលនទ្រព្យ​ទាំងមូល ក៏​ដូច​ជា​ចូលរួម​ដល់​កំណើនសេដ្ឋកិច្ច​ចិន​ទាំងស្រុង​ផង​ដែរ ។ ជាក់ស្តែង ការ​សាងសង់​ផ្ទះ​នៅ​ទីក្រុង​ថ្នាក់​ទី​៣ និង​ទី​៤ មាន​អត្រា​៦៧% នៃ​តម្លៃ​សរុប​របស់​ជាតិ​ក្នុង​ឆ្នាំ​២០១៤ ឬ​ស្មើនឹង​១៧,១% នៃ​ផលិតផល​ក្នុងស្រុក​សរុប ។

ការ​វិនិយោគ​លើ​ផ្នែក​អចលនទ្រព្យ​របស់​ចិន​មាន​កំណើន​ខ្សោយ ពោល​គឺ​មាន​ត្រឹមតែ​១%​ប៉ុណ្ណោះ និង​ទាប​ជាង​ការ​ធ្លាក់​ចុះ​នៅ​ឆ្នាំ​១៩៩៨ ទៅ​ទៀត ។ ហេតុនេះ​ហើយ អ្នក​អភិវឌ្ឍ​ជា​ច្រើន​នឹង​មិន​វិនិយោគ​លើ​គម្រោង​អភិវឌ្ឍន៍​ថ្មី​ៗ​ឡើយ ។

ក្រៅពី​ការ​កាត់​បន្ថយ​លើ​ការ​បង់​អចលនទ្រព្យ អ្នកដឹកនាំ​កណ្តាល​ក៏​បាន​ជំរុញ​ដល់​រដ្ឋាភិបាល​ក្នុងស្រុក​ឱ្យ​សម្រួល​ដល់​ជនអន្តោប្រវេសន៍ និង​កសិករ​នៅ​តាម​ជនបទ​ឱ្យ​មាន​លទ្ធភាព​ទិញ​ផ្ទះល្វែង​នៅ​ក្នុង​ទីក្រុង​ផង​ដែរ ។ ជា​ពិសេស ពួក​គេ​អាច​ទិញ​ផ្ទះ​នៅ​ទីក្រុង​ថ្នាក់​ទី​៣ និង​ទី​៤ តាម​រយៈ​គោលនយោបាយ​កំណែទម្រង់​នៃ​ប្រព័ន្ធ​ចុះ​ឈ្មោះ​ទិញ​អចលនទ្រព្យ និង​ថវិកា​ជំនួយ​អចលនទ្រព្យ​របស់​រដ្ឋាភិបាល​ដែល​ផ្តល់​ជូន​ដល់​កសិករ​របស់​ខ្លួន ។

លោក Han Shitong គូសបញ្ជាក់​ថា ៖ «​គោលនយោបាយ​នេះ គឺជា​គោលនយោបាយ​ដ៏​ត្រឹមត្រូវ ពីព្រោះ​វា​អាច​ទាក់ទាញ​ប្រជាជន​ឱ្យ​ផ្លាស់​ប្តូរ​ទីលំនៅ​ពី​ទីក្រុង​តូច​មក​រស់នៅ​ទីក្រុង​ថ្នាក់​ទី​៣ និង​ទី​៤ ។ ប៉ុន្តែ​គោលនយោបាយ​នេះ​បាន​បង្កើត​ឡើង​យឺត​ពេល​បន្តិច​សម្រាប់​បង្ការ​ការ​ធ្លាក់​ចុះ​ជា​ប្រព័ន្ធ » ៕