សម្តេច ស ខេង និងឯកឧត្តម កឹម សុខា កំណត់ពេលជួបគ្នា ជាថ្មីនៅថ្ងៃស្អែក

ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តំណាងរាស្រ្តសំឡេងភាគច្រើន និងប្រធានស្តីទី គណបក្សសង្រ្គោះជាតិ ឯកឧត្តម កឹម សុខា ប្រធានក្រុមតំណាងរាស្រ្ សំឡេង ភាគតិចនៃរដ្ឋសភា បានកំណត់ពេលជួបគ្នាម្តងទៀត នៅម៉ោង៥ល្ងាចថ្ងៃទី១៩ ខែកុម្ភៈ ឆ្នាំ២០១៦ នាវិមានរដ្ឋសភា ដើម្បីពិភាក្សាបញ្ហាដែលនៅសេសសល់ ពិសេសរបៀបវារៈនយោបាយ ក៏ជាប្រធានបទសំខាន់ផងដែរ។

លោក យ៉ែម បុញ្ញឫទ្ធិ អ្នកនាំពាក្យ គណបក្សសង្រ្គោះជាតិ បានមានប្រសាសន៍ប្រាប់មជ្ឈ មណ្ឌលព័ត៌មានដើមអម្ពិលនៅព្រឹកថ្ងៃទី១៨ កុម្ភៈថា  “យើងមិនបានកំណត់ពី របៀបវារៈនោះទេ ប៉ុន្តែជាការកំណត់ណាត់ ជួបគ្នាពីមុនយូរមកហើយ ហើយសម្តេច ស ខេង មានពេលវេលាចឹងការណាត់ ជួបគ្នាបានកំណត់ពីមុនមកហើយ”។
លោកបន្តថា ក្រុមតំណាងរាស្រ្តសំឡេងភាគច្រើន និងភាគតិចជួបគ្នានាពេលនេះ ដើម្បីលើកកម្ពស់ក្រុមវប្បធម៌សន្ទនា។

អ្នកនាំពាក្យរូបនេះបន្ថែមថា សមាសភាពនៃការចូលរួម គឺមានម្ខាង៥រូប ដែលដឹកនាំដោយសម្តេច ស ខេង និងឯកឧត្តម កឹម សុខា។
សូមបញ្ជាក់ថា ក្រុមការងារនៃគណបក្សទាំងពីរ បានជួបគ្នាជាច្រើនច្រើនសារមកហើយ ដើម្បីដោះស្រាយបញ្ហាជាមួយគ្នា ប៉ុន្តែជាលទ្ធផលមិនសូវ ទទួលបានជោគជ័យនោះទេ៕

សម្តេច ស ខេង និងឯកឧត្តម កឹម សុខា កំណត់ពេលជួបគ្នា ជាថ្មីនៅថ្ងៃស្អែក