​ពឹង​លើ​ប្រាក់​ខែ​រោងចក្រ​ចាយ​មិន​គ្រប់​កម្មករ​ជិត​៣០​នាក់​សហការ​គ្នា​បើក​ផ្សារ​តូច​មួយ​រក​ស៊ី​ខ្លួន​ឯង​

​​អាជីវកម្ម៖ ​ស្ថិត​ក្នុង​ជីវភាព​មួយ​ពឹង​ផ្អែក​លើ​ការងារ​រោងចក្រ​ដែល​ទទួល​បាន​ត្រឹមតែ​១៤០​ដុល្លារ​អស់​រយៈ​ពេល​ជា​ច្រើន​ឆ្នាំ​ នៅ​តែ​មិន​អាច​ផ្គត់ផ្គង់​ជីវភាព​គ្រួសារ​ឲ្យ​បាន​សមរម្យ​នៅ​ឡើយ ​ជំរុញ​ឲ្យ​កម្មករ​និង​អតីត​សកម្មជន​សហជីព​ជិត​៣០​នាក់ ​បែក​គំនិត​​សហការ​គ្នា​បើក​ផ្សារ​ម៉ាត​រកស៊ី​ខ្លួន​ឯង​ដោយ​ដាក់​ឈ្មោះ​ថា​«ម៉ាត​កម្មករ​» ​រួម​ជា​មួយ​អាហារដ្ឋាន​នៅ​ព័ទ្ធ​ពី​ខាង​ក្រៅ ​ដើម្បី​ស្វែង​រក​ចំណូល​បន្ថែម​សម្រាប់​ទប់ទល់​នឹង​ការ​ចំណាយ​ក្នុង​ជីវភាព​គ្រួសារ​ប្រចាំថ្ងៃ​។
​ពឹង​លើ​ប្រាក់​ខែ​រោងចក្រ​ចាយ​មិន​គ្រប់​កម្មករ​ជិត​៣០​នាក់​សហការ​គ្នា​បើក​ផ្សារ​តូច​មួយ​រក​ស៊ី​ខ្លួន​ឯង​
​លោក សាន សុផា ​ជា​អតីត​មន្ត្រី​ផ្នែក​ច្បាប់​របស់​សហជីព​ល្បី​ឈ្មោះ​មួយ​នៅ​ក្នុង​ប្រទេស​កម្ពុជា ​និង​ជា​ម្ចាស់​ភាគហ៊ុន​ម្នាក់​ក្នុង​របរ​បើក​ផ្សារ​ម៉ាត​ខាង​លើ​បាន​ឲ្យ​ប្រាប់ ​Kqube.NET ​ថា ​មូលហេតុ​ដែល​ពួក​លោក​មាន​គំនិត​បើក​រកស៊ី​បែប​នេះ ​គឺ​មាន​ពីរ​ចំណុច ​ទី១-​ទាក់ទង​ជា​មួយ​ដើម​ទុន ​ទី២-ទាក់ទង​ជា​មួយ​យុទ្ធសាស្ត្រ​ទីផ្សារ​។ ​ចំណុច​ទី​១ ​លោក​បាន​ពន្យល់​ថា ​ទោះ​បី​ជា​ពួក​លោក​កន្លង​មក​មាន​អ្នក​ខ្លះ​ធ្លាប់​ជា​មន្ត្រី​ផ្នែក​ច្បាប់​សហជីព ​ឬ​បុគ្គលិក​ផ្នែក​សិទ្ធ​មនុស្ស​ក្តី ​ប៉ុន្តែ​ទាំង​អស់​គ្នា ​គឺ​គ្មាន​ដើម​ទុន​រាប់​ពាន់​រាប់​ម៉ឺន​ដុល្លារ ​ដើម្បី​រក​ស៊ី​ម្នាក់​ឯង​នោះ​ទេ ​ដូច្នេះ​ហើយ​គឺ​ពួក​លោក​ត្រូវ​តែ​កៀរគរ​​គ្នា ​អ្នក​ដែល​មាន​បំណង​ចង់​រក​ស៊ី ​ដែល​​ភាគច្រើន​សុទ្ធតែ​ជា​កម្មករ​នោះ ​ឲ្យ​មក​សហការ​គ្នា​ដើម្បី​បើក​ម៉ាត​នេះ​ឡើង​ និង​រកស៊ី​ជា​មួយ​គ្នា​​។
​ពឹង​លើ​ប្រាក់​ខែ​រោងចក្រ​ចាយ​មិន​គ្រប់​កម្មករ​ជិត​៣០​នាក់​សហការ​គ្នា​បើក​ផ្សារ​តូច​មួយ​រក​ស៊ី​ខ្លួន​ឯង​
​ម្ចាស់​ភាគហ៊ុន​រូប​នេះ​បាន​បន្ត​ថា ​ចំពោះ​ចំណុច​ទី​២​ ភាគច្រើន​នៃ​ម្ចាស់​​អាជីវកម្ម​ខាង​លើ​នេះ ​គឺ​សុទ្ធសឹងតែ​ជា​អ្នក​មាន​សក្ដានុពល​ក្នុង​ចំណោម​កម្មករ​តាម​រោងចក្រ​នីមួយៗ ​ដូច្នេះ​ចំណុច​នេះ​ហើយ​ដែល​ពួក​លោក​គិត​ថា​អាច​ទៅ​រួច​នោះ ​ដោយសារ​ក្នុង​ចំណោម​គ្នា​ជិត​៣០​នាក់​នោះ ​គឺ​ម្នាក់​ៗ​មាន​តួនាទី​យ៉ាង​សំខាន់​ដូច​ជា​ មាន​តួនាទី​ជា​អតិថិជន​ផង ​ជា​អ្នក​ទីផ្សារ​​ផង ​និង​ជា​ធ្វើ​ការ​លក់​ដូរ​បម្រើ​អតិថិជន​ដោយ​ខ្លួន​ឯង​ផ្ទាល់​ផង ​ម្ល៉ោះហើយ​​​អតិថិជន​​គោលដៅ​អាជីវកម្ម​របស់​ពួក​លោក​ គឺ​ផ្ដោត​ទៅ​លើ​កម្មករ​ដូចគ្នា ​ដូច្នេះ​លោក​គិត​ថា គំនិត​នេះ​អាច​ជា​របរ​ថ្មី​មួយ​សម្រាប់​ជួយ​ជីវភាព​ខ្លួន​ឯង ​ក៏​ដូច​ជា​ធ្វើ​ការ​លក់​ដូរ​ធូរ​ថ្លៃ​សម្រួល​ដល់​កម្មករ​ដទៃ​ទៀត​ផង​ដែរ​។
​ពឹង​លើ​ប្រាក់​ខែ​រោងចក្រ​ចាយ​មិន​គ្រប់​កម្មករ​ជិត​៣០​នាក់​សហការ​គ្នា​បើក​ផ្សារ​តូច​មួយ​រក​ស៊ី​ខ្លួន​ឯង​

​អតីត​មន្ត្រី​​ច្បាប់​រូប​នេះ​បាន​បន្ត​ថា ​ក្នុង​ការ​កៀរគរ​គ្នា ​ដើម្បី​បង្កើត​មុខរបរ​មួយ​នេះ​ឡើង ​គឺ​មិន​មែន​ងាយ​ស្រួល​នោះ​ទេ ​ជាក់​ស្ដែង​ម្ចាស់​ភាគហ៊ុន​ទាំង​អស់ ​ម្នាក់​ៗ​មាន​ចំណេះដឹង ​និង​កម្រិត​វប្បធម៌​ខុស​ពី​គ្នា​ទាំង​អស់ ​ហើយ​មាន​អ្នក​ខ្លះ​ក៏​យល់​ពី​ការ​រក​ស៊ី​ប្រភេទ​នេះ ​តែ​មាន​អ្នក​ខ្លះ​ទៀត​ក៏​មិន​សូវ​យល់​នៅ​ការងារ​នេះ​ដែរ ​ដូច្នេះ​ហើយ​ទើប​និយាយ​ថា ​ពិត​ជា​មិន​ងាយ​ស្រួល​ឡើយ ​ដើម្បី​ប្រមូល​មនុស្ស​មក​រកស៊ី​ជុំ​គ្នា​នេះ ​ប៉ុន្តែ​លក្ខខ័ណ្ឌ​មួយ​ដែល​ដូច​គ្នា ​គឺ​ម្នាក់ៗ​មិន​ចង់​ធ្វើ​ការងារ​ឲ្យ​គេ​ជា​រៀង​រហូត ​ដោយ​មាន​គំនិត​ចង់​រកស៊ី​ដើម្បី​ខ្លួន​ឯង ​ទោះ​ទទួល​បាន​ចំណូល​តិច​ឬ​ច្រើន ​នោះ​វា​ជា​ការ​ខិតខំ​ដោយ​ខ្លួន​ឯង​ដែរ​។
​លោក សាន សុផា ​បាន​បញ្ជាក់​ថា ​តាម​គម្រោង​នៃ​អាជីវកម្ម​ផ្សារ​ម៉ាត ​និង​អាហារដ្ឋាន​របស់​ពួក​លោក ​គឺ​ត្រូវ​ការ​អ្នក​ចូល​រួម​វិនិយោគ​ចំនួន ​៣០​នាក់ ​ប៉ុន្តែ​បច្ចុប្បន្នភាព​ ​គឺ​ពួក​លោក​មាន​គ្នា​ចំនួន​២៣​នាក់​រួច​ហើយ ​ដែល​ចូល​រួម​ភាគហ៊ុន​នេះ​ចាប់​ពី​១០០​ដុល្លារ​ដល់​៥០០​ដុល្លារ​អាមេរិក ​ដោយ​ឡែក​អាជីវកម្ម​របស់​ពួក​លោក​នៅ​ពេល​នេះ ​ក៏​កំពុង​ដំណើរការ​ទៅ​មុខ​ជា​បណ្ដើរ​ៗ​ផង​ដែរ ​បន្ទាប់​ពី​ចាប់​ផ្ដើម​អស់​រយៈ​ពេល​ជាង​២០​ថ្ងៃ​​រួច​មក​។​

​ពឹង​លើ​ប្រាក់​ខែ​រោងចក្រ​ចាយ​មិន​គ្រប់​កម្មករ​ជិត​៣០​នាក់​សហការ​គ្នា​បើក​ផ្សារ​តូច​មួយ​រក​ស៊ី​ខ្លួន​ឯង​

លោក​បាន​បន្ត​ថា ​ទំនិញ​នៅ​ក្នុង​ផ្សារ​ម៉ាត​កម្មករ​នេះ មាន​ដូច​ជា​ចំណី​អាហារ ​គ្រឿងទេស ​ផលិតផល​ថែទាំ​ស្បែក ​ផលិតផល​ថែទាំ​រាងកាយ ​ភេសជ្ជៈ​គ្រប់​ប្រភេទ ​ចំណែក​ផលិតផល ​ឬ​សេវាកម្ម​លក់​នៅ​ខាង​ក្រៅ​ម៉ាត ​មាន​លក់​ដូច​ជា ​បាយ​ពេល​ព្រឹក ​មីឆុង ​និង​ពេល​រសៀល​មាន​លក់​សាច់​គោ​អាំង ​មឹក​អាំង ​ជា​ពិសេស​គឺ​គ្រឿង​ក្លែង​តែ​ម្ដង​។ ​លោក​ថា ​សេវាកម្ម​ខាង​ក្រៅ​ម៉ាត​នេះ​ហើយ ​ដែល​វា​នឹង​ជំរុញ​ឲ្យ​ភ្ញៀវ​ចូល​ទៅ​ទិញ​ទំនិញ​នៅ​ខាង​ក្នុង​ម៉ាត​ថែម​ទៀត​។

​ពឹង​លើ​ប្រាក់​ខែ​រោងចក្រ​ចាយ​មិន​គ្រប់​កម្មករ​ជិត​៣០​នាក់​សហការ​គ្នា​បើក​ផ្សារ​តូច​មួយ​រក​ស៊ី​ខ្លួន​ឯង​

ទាក់ទង​និង​ការ​គ្រប់គ្រង​ផ្នែក​ហិរញ្ញវត្ថុ លោក សាន សុផា បាន​ប្រាប់​ថា ពួក​លោក​បាន​ទិញ​ប្រព័ន្ធ​ System កម្ម​វិធី​គេ​ស្រាប់​យក​មក​គ្រប់គ្រង​ការ​ចំណូល​ចំណាយ​តែ​ម្ដង ​ដើម្បី​បញ្ជាក់​ពី​ភាព​ស្មោះត្រង់​ជា​មួយ​គ្នា ​ព្រោះ​កម្ម​វិធី​នេះ​មិន​មាន​អ្នក​ណា​អាច​ចូល​ទៅ​កែ​ការ​ចំណូល​ចំណាយ​នោះ​បាន​ទេ ​ហើយ​កម្ម​វិធី​នេះ ​ត្រូវ​បាន​ចំណាយ​លុយ​អស់​ជាង​ ១​ពាន់​ដុល្លារ ​ដើម្បី​ទិញ​ទាំង​កុំព្យូទ័រ ​និង​កម្ម​វិធី​នោះ​ផង ដែល​អាច​ធ្វើ​ការងារ​បាន​តែ​ម្ដង​។
ម្ចាស់​ភាគហ៊ុន​រូប​នេះ​បាន​បញ្ជាក់​ថា ​គម្រោង​ទៅ​អនាគត ​បើ​ម៉ាត​កម្មករ​នេះ​អាច​ទទួល​បាន​ជោគ​ជ័យ​ ពួក​លោក​នឹង​បន្ថែម​ទុន ​ដើម្បី​ពង្រីក​ទីតាំង​ផ្សេង​ទៀត ​ទៅ​តាម​តំបន់​រោងចក្រ​ណា​ដែល​ប្រជុំ​ដោយ​កម្មករ​ច្រើន ប៉ុន្តែ​បច្ចុប្បន្ន​នេះ ​ម៉ាត​កម្មករ​ទើប​តែ​មាន​មួយ​កន្លែង​ប៉ុណ្ណោះ ​គឺ​ស្ថិត​នៅ​ភូមិ​ជម្ពូវ័ន សង្កត់​ចោមចៅ ​ខណ្ឌ​ពោធិ​សែនជ័យ ​រាជធានី​ភ្នំពេញ ​ដែ​ល​ចុះ​ពី​ផ្លូវ​ជាតិ​លេខ​៤ ​មុខ​សាលា​បឋម​សិក្សា​ជម្ពូវ័ន​ ចូល​ទៅ​ក្នុង​ប្រមាណ​៤០០​ម៉ែត្រ ​បត់​ឆ្វេង​ត្រង់​ស៊ីទែន​ទឹក​រោងចក្រ ​QMI និង​ចូល​ទៅ​ត្រង់​ចំនួន ​៥០​ម៉ែត្រ​ទៀត ​ទើប​ដល់​ម៉ាត​កម្មករ​នេះ​។

​ពឹង​លើ​ប្រាក់​ខែ​រោងចក្រ​ចាយ​មិន​គ្រប់​កម្មករ​ជិត​៣០​នាក់​សហការ​គ្នា​បើក​ផ្សារ​តូច​មួយ​រក​ស៊ី​ខ្លួន​ឯង​

ជា​ចុង​ក្រោយ​លោក សាន សុផា បាន​ផ្ញើ​សារ​ដល់​កម្មករ​ទូទៅ ​និង​អ្នក​ដែល​មាន​បំណង​ចង់​បង្កើត​អាជីវកម្ម​ថា ​សូម​កុំ​គិត​ចាំ​ខ្លួន​មាន​លុយ ​មាន​សមត្ថភាព​គ្រប់គ្រាន់​សិន ទើប​យើង​ហ៊ាន​ចេញ​មុខ​រក​ស៊ី​នោះ ​បើ​គិត​ថា​ចាំ​ខ្លួន​មាន​សិន ​មិន​ដឹង​ពេល​ណា​ទេ ​គឺ​យើង​ត្រូវ​តែ​មាន​គំនិត​ស្វែង​រក​ដៃគូ​សហការ​គ្នា ​ដូច​​ជា​បង​ប្អូន ​មិត្តភ័ក្ដិ ​ឬ​អ្នក​ណា​ផ្សេង​ក៏​ដោយ ​ឲ្យ​តែ​យើង​អាច​ជឿ​ទុក​ចិត្ត​ អាច​រក​ស៊ី​ជា​មួយ​គ្នា​បាន ​គឺ​ត្រូវ​តែ​ហ៊ាន​ចាប់​ផ្ដើម​ធ្វើ​វា​ឡើង​ នោះ​យើង​នឹង​ទៅ​មុខ​ជា​បណ្ដើរ​ៗ​ហើយ យ៉ាង​ហោច​ណាស់​ក៏​យើង​ទទួល​បាន​បទ​ពិសោធន៍​មក​វិញ​ដែរ​។ ​ក្នុង​នោះ​ដែរ​លោក​ក៏​បាន​បញ្ជាក់​ពី​ខ្លួន​ឯង​ដែរ​ថា អ្នក​ដទៃ​គេ​ចង់​រកស៊ី ​គេ​អាច​ទៅ​ខ្ចី​ធនាគារ​សិន​បាន ​ព្រោះ​គេ​មាន​ប្លង់​ដី ​ឬ​ប្លង់​ផ្ទះ​យក​ទៅ​ដាក់ ប៉ុន្តែ​ចំពោះ​រូប​លោក ​គឺ​លោក​គ្មាន​ប្លង់​ដី​ប្លង់​ផ្ទះ​យក​ទៅ​ដាក់​ធនាគារ​ទេ ​គឺ​មាន​តែ​កៀរគរ​គ្នា ដើម្បី​បង្កើត​មុខ​របរ​រក​ស៊ី​តែ​ប៉ុណ្ណោះ​៕
(​ប្រិយមិត្ត​អាច​ស្ដាប់​សំឡេង​បទ​សម្ភាស​តែ​ម្ដង ​ដើម្បី​ទទួល​បាន​ព័ត៌មាន​ពិស្ដារ​)

ប្រភព៖​ news.kqube

  • ​ពឹង​លើ​ប្រាក់​ខែ​រោងចក្រ​ចាយ​មិន​គ្រប់​កម្មករ​ជិត​៣០​នាក់​សហការ​គ្នា​បើក​ផ្សារ​តូច​មួយ​រក​ស៊ី​ខ្លួន​ឯង​已关闭评论
  • 2 views
  • Hide Sidebar
    A+
Publish on:2016/03/16  Category:ជីវិតនិងសង្គម
Tags: