បាល់ទាត់កម្ពុជា ប៉ះ ស៊ីរី ម៉ោង ១១៖០០នាទីយប់ស្អែក ក្នុងវគ្គជម្រុះ World Cup 2018

(ភ្នំពេញ)៖ ក្រុមបាល់ទាត់ឈុតធំជម្រើសជាតិកម្ពុជា ដែលដឹកនាំដោយគ្រូបង្វឹកជនជាតិកូរ៉េខាងត្បូងលោក Lee Tae Hoon នឹងត្រូវធ្វើការប្រកួត បង្រ្គប់កិច្ច ទល់នឹងក្រុមជម្រើសជាតិស៊ីរី ក្នុងទឹកដីកណ្តាលនៃប្រទេសអូម៉ង់ នាម៉ោង ១១៖០០នាទីយប់ (ម៉ោងនៅកម្ពុជា) ខណៈដែលនៅអូម៉ង់ម៉ោង ៨៖០០នាទីយប់ថ្ងៃទី២៤ មីនា នៅកីឡដ្ឋាន Al-Seeb Stadium ដែលមានលោកអាជ្ញាកណ្តាលជនជាតិអូស្រ្តាលី Chris Beath ជាអ្នកកាត់ក្តី នេះបើយោងតាមគេហទំព័រ FIFA ។

បាល់ទាត់កម្ពុជា ប៉ះ ស៊ីរី ម៉ោង ១១៖០០នាទីយប់ស្អែក ក្នុងវគ្គជម្រុះ World Cup 2018

នេះជា១ប្រកួតចុងក្រោយសម្រាប់ជម្រើសជាតិកម្ពុជា ដែលបានចាកចេញពីមាតុប្រទេសទៅកាន់អូម៉ង់ព្រឹកម្សិលមិញ ដើម្បីបញ្ចប់ជើងទី២ វគ្គជម្រុះក្នុងពូល E នៃព្រឹត្តិការណ៍ FIFA World Cup 2018 នៅប្រទេសរុស្ស៊ី ក្រោយពីជើងទី១ បានលេងចាញ់ស៊ីរី ៦-០ នៅកីឡដ្ឋានអូឡាំពិកកម្ពុជា នាថ្ងៃទី០៨ ខែកញ្ញា ឆ្នាំ២០១៥ ។

កម្ពុជា ធ្វើមិនបានល្អសោះ ក្នុងវគ្គជម្រុះជុំទី២ ប្រចាំតំបន់អាស៊ី ក្នុងចំណោម៥ក្រុមចាប់ឆ្នោតស្ថិតក្នុងពូល E ជាមួយគ្នា រួមមាន កម្ពុជា សិង្ហបុរី អាហ្វហ្គានីស្ថាន ស៊ីរី និងជប៉ុន ដោយធ្លាប់ចាញ់គ្រប់ក្រុមទាំងអស់ សូម្បីតែស្មើក៏គ្មាន ឈរនៅបាតតារាងក្នុងពូល និងអាចស៊ុតបញ្ចូលទីគេបានតែ១គ្រាប់ប៉ុណ្ណោះ ពេលលេងចាញ់ម្ចាស់ផ្ទះសិង្ហបុរី ២-១ កាលពីអំឡុងថ្ងៃភ្ជុំបិណ្ឌ ថ្ងៃទី១៣ ខែតុលា ឆ្នាំ២០១៥ ក្នុងជើងទី២ បន្ទាប់ពីបរាជ័យ ៤-០ នៅកីឡដ្ឋានអូឡាំពិក នាថ្ងៃបើកឆាក ។

«ការពារ វាយសម្រុក និងខិតខំលេងឲ្យអស់ពីសមត្ថភាព» ជាយុទ្ធសាស្រ្តចុងក្រោយដែលលោក Lee បានប្រាប់ភ្នាក់ងារ Fresh News មុនចេញដំណើរព្រឹកម្សិលមិញនេះ បើទោះបីជាគ្មានវត្តមានកីឡាករសំខាន់ៗដូចជា រស់ សំអឿន, ទូច បញ្ចរ៉ុង, កុក បូរីស អ្នកចាំទី ស៊ូ យ៉ាទី និងខ្សែប្រយុទ្ធជួរមុខ ចាន់ វឌ្ឍនាកា ក៏ដោយ៕
បាល់ទាត់កម្ពុជា ប៉ះ ស៊ីរី ម៉ោង ១១៖០០នាទីយប់ស្អែក ក្នុងវគ្គជម្រុះ World Cup 2018

ប្រភពៈ freshnewsasia