បើ​ចង់​ក្លាយ​ជា​សហគ្រិន​ជោគជ័យ​អ្នក​ត្រូវ​រៀន​ជំនាញ​មូលដ្ឋាន​មួយ​នេះ​ឲ្យ​ស្ទាត់​ជំនាញ​សិន

នៅ​គ្រប់​សហគ្រិន​ទាំង​អស់​គឺ​ត្រូវ​ការ​ជំនាញ រាប់​មិន​អស់​ដូច​ជា ភាព​ច្នៃ​ប្រឌិត ការ​វិភាគ របៀប​នៃ​ការ​សម្រេច​ចិត្ត ការ​គ្រប់គ្រង និង​បទពិសោធន៍​មួយ​ចំនួន ទៀត​ដើម្បី​ដឹក​នាំ​អាជីវកម្ម​មួយ​ឲ្យ​ដើរ​ទៅ​មុខ​បាន​ល្អ។ ប៉ុន្តែ​មុន​នឹង​មាន​ជំនាញ​ទាំង​នេះ​សហគ្រិន​គ្រប់​រូប​គួរ​មាន​ជំនាញ​មូលដ្ឋាន​មួយ​ដែល​សំខាន់​បំផុត​ ទាំង​ជីវិត​រស់​នៅ​ប្រចាំ​ថ្ងៃ និង ជីវិត​ការងារ នោះ​គឺ​សិល្បៈ​នៃ​ការ​សន្ទនា ព្រោះ​ថា​គ្រប់​អ្វីៗ​ចាប់​ផ្តើម​ពី​ការ​សន្ទនា។

តើ​ការ​សន្ទនា​មាន​សារសំខាន់​អ្វី​ខ្លះ​សម្រាប់​សហគ្រិន​ដែល​ជា​អ្នក​ដឹក​នាំ​អាជីវកម្ម?

ការ​សន្ទនា​ក៏​ជា​សិល្បៈ​មួយ​នៃ​ការ​ធ្វើ​បទ​បង្ហាញ​គម្រោង​អាជីវកម្ម​ដល់​វិនិយោគិន ដោយ​បញ្ចុះបញ្ចូល​ពួក​គេ​ឲ្យ​ព្រម​បណ្ដាក់​ទុន​ជាមួយ​អ្នក។ ការ​សន្ទនា​អាច​ជួយ​ទាក់​ចិត្ត​អតិថិជន​ឲ្យ​ជាប់​ចិត្ត​ដើរ​ចេញ​ពី​ផលិតផល​អ្នក​មិន​រួច។ ការ​ជ្រើស​រើស​ក្រុម​ការងារ​តាម​រយៈ​ការ​សន្ទនា អាច​រក្សា​ពួក​គេ​ឲ្យ​នៅ​ជាមួយ​អ្នក និង​អាច​ធ្វើ​ឲ្យ​ពួក​គេ​កាន់​តែ​មាន​ទឹក​ចិត្ត​ស្មោះ​ត្រង់​ជាមួយ​នឹង​អ្នក។

ដូច្នេះ​តើ​ធ្វើ​ដូចម្តេច​ទើប​ក្លាយ​ជា​មនុស្ស​ដែល​ពូកែ​សន្ទនា? ចូរ​សាកល្បង​អនុវត្ត​ចំណុច​ទាំង​ ៥ ខាង​ក្រោម​នេះ។

១) ផ្ដោត​យក​ចិត្ត​ទុក​ដាក់ ៖ ​អ្នក​ត្រូវ​ផ្ដោត​យក​ចិត្ត​ទុក​ដាក់​ពេល​សន្ទនា​ តាម​រយៈ​ការ​ងក់​ក្បាល ឬ និយាយ​សាឡើងវិញ​នូវ​អ្វី​មួយ​ដែល​នរណា​ម្នាក់​ប្រាប់​អ្នក។ នៅ​ពេល​អ្នក​សន្ទនា​អ្នក​មិន​គួរ​រង​ចាំ​ពេល​ដើម្បី​និយាយ​តប​វិញ​នោះ​ឡើយ ត្រូវ​យក​ចិត្ត​ទុកដាក់​ស្ដាប់​តែ​មួយ​បាន​ហើយ ដោយ​ត្រូវ​ចេះ​ប្រើ​គំនិត​ខ្លួន​ឆ្លុះ​បញ្ចាំង​ពី​អ្វី​ដែល​ពួក​គេ​និយាយ នោះ​អ្នក​នឹង​អាច​យល់​កាន់​តែ​ច្បាស់​ នូវ​អ្វី​ដែល​នរណា​ម្នាក់​និយាយ ដោយ​អ្នក​អាច​ឆ្លើយ​តប​ជាមួយ​ពួក​គេ​វិញ​នូវ​ហេតុ​ផល​សម​រម​បំផុត។

២) សួរ​នូវ​សំនួរ​បើក​ទៅ​កាន់​អ្នក​និយាយ ៖ ដើម្បី​ទទួល​បាន​ដំបូន្មាន​ដ៏​ល្អ​ ពី​ការ​សន្ទនា​គឺ​តាម​រយៈ​ការ​សួរ​សំនួរ ជា​ពិសេស​គឺ​ប្រភេទ​សំនួរ​បើក (Open-ended Questions) ដែល​អាច​ឲ្យ​អ្នក​ឆ្លើយ​តប​បង្ហាញ​ព័ត៌មាន​កាន់​តែ​មាន​ន័យ និង ទូលំទូលាយ​ជាង​សំនួរ​បិទ។ អ្នក​មិន​ត្រូវ​សួរ​អ្វី​ដែល​ទាក់ទង​នឹង​ខ្លួន​ឯង​ផ្ទាល់​ដែល​ធ្វើ​ឲ្យ​ពួក​គេ​បង្ខំ​ចិត្ត​ឲ្យ​ពួក​គេ​ឆ្លើយ បដិសេធ ឬ ព្រម​នោះ​ឡើយ។ ជា​ឧទាហរណ៍​អ្នក​អាច​សួរ​ថា​តើ​អ្នក​យល់​យ៉ាង​ម៉េច​ដែរ​ចំពោះ​ក្រុមហ៊ុន​ពួក​យើង? ជំនួស​ឲ្យ​ការ​សួរ​ថា​តើ​អ្នក​ចូល​ចិត្ត​ក្រុមហ៊ុន​យើង​ដែរ​ឬ​ទេ?

៣) ត្រូវ​ចេះ​ធ្វើ​ឲ្យ​ការ​សន្ទនា​ក្លាយ​រឿង​សាមញ្ញ​ធម្មតា ៖ អ្នក​ត្រូវ​ព្យាយាម​ធ្វើ​ឲ្យ​ការ​សន្ទនា​របស់​អ្នក និង​ដៃ​គូ​ក្លាយ​ជា​លក្ខណៈ​បែប​ធម្មជាតិ​ សាមញ្ញ​មិន​មែន​ជា​ការ​ជជែក​ពិភាក្សា​ប្រកប​ដោយ​ភាព​តាន​តឹង​ឡើយ។ ការ​ធ្វើ​ឲ្យ​ទៅ​ជា​លក្ខណៈ​សាមញ្ញ​វា​ជួយ​ធ្វើ​ឲ្យ​ការ​គិត ឬ ចំណុច​ទាំង​ឡាយ​ដែល​ភាគី​ម្ខាង​ទៀត​និយាយ​ចូល​មក​ក្នុង​ចិត្ត​អ្នក​ ច្រើន​ជាង​ការ​សន្ទនា​គ្នា​ បែប​ប្រជែង​គ្នា។

៤) ជៀសវាង​កំហុស​អចេតនា ៖ ចំពោះ​អ្នក​ស្តាប់​អ្នក​គេ​នឹង​អាច​កាត់​ការ​និយាយ​របស់​អ្នក​ នៅ​ពេល​គេ​មិន​យល់​ត្រង់​កន្លែង​ណា​មួយ ដូច្នេះ​អ្នក​ខ្លួន​ឯង​ត្រូវ​ប្រយ័ត្ន​ថា​ ចំពោះ​កន្លែង​ណា​ដែល​អ្នក​មិន​ច្បាស់​អ្នក​មិន​ត្រូវ​ឆ្លើយ​តប​ភ្លាម​ទេ អ្នក​ត្រូវ​បន្ត​ការ​និយាយ​របស់​អ្នក​ឲ្យ​ចប់​សិន​ មុន​នឹង​អ្នក​នឹង​ឃើញ​ចម្លើយ​ដើម្បី​ឆ្លើយ​តប​ជា​មួយ​ពួក​គេ​វិញ។

៥) រំលង​ចោល​នូវ​ចំណុច​លម្អិត​មិន​សំខាន់ ៖ ការ​សង្ខេប​ទុក​តែ​ចំណុច​សំខាន់​ គឺ​ជា​វិធី​ដ៏​មាន​អានុភាព​ដ៏​ល្អ​បំផុត​ក្នុង​ការ​ធ្វើ​ឲ្យ​ពាក្យពេចន៍​របស់​កាន់​តែ​មាន​អត្ថន័យ។ នេះ​មិន​មែន​មាន​ន័យ​ថា​ឲ្យ​អ្នក​ឆ្លើយ​តប​ជាមួយ​អ្នក​ស្តាប់​តែ​ប៉ុន្មាន​ពាក្យ​នោះ​ឡើយ ពោល​គឺ​ឲ្យ​អ្នក​ឆ្លើយ​តប​នូវ​រាល់​ចំណុច​សំខាន់ៗ​ហើយ​រំលង​ចោល​នូវ​ចំណុច​មិន​សំខាន់៕

ប្រភព៖ thebnews

  • បើ​ចង់​ក្លាយ​ជា​សហគ្រិន​ជោគជ័យ​អ្នក​ត្រូវ​រៀន​ជំនាញ​មូលដ្ឋាន​មួយ​នេះ​ឲ្យ​ស្ទាត់​ជំនាញ​សិន已关闭评论
  • 13 views
  • Hide Sidebar
    A+
Publish on:2016/04/09  Category:ជីវិតនិងសង្គម
Tags: