​សម្រាល​ការឈឺចាប់​ត្រង់​ចង្កេះ ត្រគាក និង​ជង្គង់​ជាមួយនឹង​លំ​ហាត់ប្រាណ​លើ​ប្រអប់ជើង ៥​ប្រភេទ​

​សម្រាល​ការឈឺចាប់​ត្រង់​ចង្កេះ ត្រគាក និង​ជង្គង់​ជាមួយនឹង​លំ​ហាត់ប្រាណ​លើ​ប្រអប់ជើង ៥​ប្រភេទ​

​អ្នក​ប្រហែលជា​មិន​គិត​ទេ​ថា ប្រអប់ជើង​ជា​ផ្នែក​មួយ​ដ៏​សំខាន់​ក្នុង​ការរួមចំណែក ទៅកាន់​សុខភាព​ទូទៅ​របស់​រាងកាយ​អ្នក​ទាំងអស់​។ ជា​ការពិត ក្នុងចំណោម​ទិដ្ឋភាព​ខាងក្នុង ប្រអប់ជើង គឺជា​កន្លែង​មួយ​ដែល​ត្រូវ​ធ្វើការ​ធ្ងន់​ជាង​គេ​នៅ​លើ​រាងកាយ ។ អ្នក​អាច​ការពារ​ត្រគាក ជង្គង់ និង​ខ្នង​ពី​ការឈឺចាប់​បាន ដោយ​គ្រាន់តែ​អនុវត្ត​នូវ​ការថែទាំ​ប្រអប់ជើង​របស់​អ្នក​ឲ្យបាន​ត្រឹមត្រូវ ។ ដោយ​ការអនុវត្ត​នូវ​លំ​ហាត់​ទាំង ៥​ប្រភេទ​នេះ នៅលើ​ប្រអប់ជើង​របស់​អ្នក នោះ​វា​នឹង​ជួយ​រក្សា​នូវ​តុល្យភាព​សុខភាព​រាងកាយ និង​ជួយ​បង្ការ​ការឈឺចាប់ និង​ពង្រឹង​សុខភាព​ប្រអប់ជើង​ទាំងពីរ​របស់​អ្នក​។​

១.​សង្កត់​ផ្នែក​ខាងលើ​
មុនពេល​ចាប់ផ្តើម អនុវត្ត​នូវ​លំ​ហាត់ប្រាណ​ណាមួយ អ្នក​គួរ​ធ្វើការ​កម្តៅ​សាច់ដុំ​នៅលើ​ប្រអប់ជើង​របស់​អ្នក​ជាមុនសិន ។​អ្នក​គួរ​អនុវត្ត​នូវ​ប្រភេទ​ចលនា​ស្រាលៗ ដែល​អាច​ផ្តល់​កម្តៅ​ដល់​សាច់ដុំ​ប្រអប់ជើង​ឲ្យបាន​ធូរស្រាល​។ ជាដំបូង អ្នក​ត្រូវ​ឈរ​ឲ្យ​ត្រង់ ហើយ​បត់​ជង្គង់        តិចៗ​។ បង្រួម​មេជើង​របស់​អ្នក​នៅ​លើ​កម្រាល​ឥដ្ឋ ហើយ​រក្សា​ស្ថានភាព​នេះ​ដោយ​រាប់ឲ្យ​៣ ហើយព្រ​លាវា​មកវិញ​ថ្នមៗ ដោយ​ត្រូវ​អនុវត្ត​បែប​នេះ​ឲ្យបាន​១០​ដង​។ ចូរ​ធ្វើ​វា​ឲ្យបាន ៣​ដង​ក្នុង​មួយថ្ងៃ ។​

២.​ការដើរ​ដោយ​ប្រើ​មេជើង​
លំ​ហាត់ប្រាណ​ប្រភេទ​នេះ នឹង​ជួយ​ក្នុង​ការពង្រឹង​សាច់ដុំ​នៅលើ​ប្រអប់ជើង ។ វា​នឹង​ជួយ​ពង្រឹង​សាច់ដុំ និង​ស​សៃ​ចំណង នៅ​ជុំវិញ​ដុំ​មូល​មួយ​នៃ​ប្រអប់ជើង​។ ដើម្បី​អនុវត្ត​លំ​ហាត់ប្រាណ​ប្រភេទ​នេះ អ្នក​ត្រូវ​ឈរ​ផ្ទុច​មេជើង ហើយ​ដើរ​ទៅ​មុខ​ឲ្យបាន​រយៈពេល ២០​វិនាទី​។ បន្ទាប់ពី​បាន​ដើរ​រួច សម្រាក​រយៈពេល​១៥​វិនាទី ហើយ​អនុវត្ត​វា​ម្តងទៀត ឲ្យបាន​៥​ដង​។​

៣.​ចលនា​កជើង​ជា​រង្វង់​
ការ​ធ្វើ​ចលនា និង​ការបត់បែន​របស់​កជើង គឺជា​រឿង​សំខាន់​មួយ​។ កជើង​ដែល​តឹង​ណែន និង​មាន​ដែន​កំណត់​ក្នុងការ​ធ្វើ​ចលនា អាច​បណ្តាល​ឲ្យ​រាងកាយ​រង​នូវ​ការឈឺចាប់​នៅលើ​សាច់ដុំ និង​សន្លាក់ ដែល​នឹង​ធ្វើ​ឲ្យ​ផ្នែក​ទាំងអស់​នៃ​រាងកាយ អាច​មាន​ការឈឹចាប់​។
​ជាដំបូង អ្នក​ត្រូវ​គេង​ផ្ងារ​នៅលើ​ឥដ្ឋ​។ សណ្តូកជើង​ម្ខាង​ឡើង​លើ​ក្បាល រួច​បង្វិល​កជើង នៃ​ជើង​ដែល​បាន​លើ​ក​នោះ​តាម​ចលនា នៃ​ទ្រនិចនាឡិកា​។ អនុវត្ត​ដូចនេះ​ឲ្យបាន​១០​ដង ។ បន្ទាប់មក ធ្វើ​នូវ​ប្រភេទ​លំ​ហាត់ប្រាណ​នេះ​ដដែល ដោយ​ប្តូរ​ទិស​ផ្ទុយ​ពី​ទ្រនិចនាឡិកា​វិញ ។ អនុវត្ត​វិធី​ដដែល​នេះ ចំពោះ​ជើង​ម្ខាង​ទៀត ។​

៤.​ការបត់​ទាញ​ជើង​ដោយ​ប្រើ​ខ្សែ​ជំនួយ​
អ្នក​អាច​ផ្តោត​ជា​ចំបង ទៅលើ​ការធ្វើ​ចលនា​ទៅលើ​សាច់ដុំ​តូចៗ​នៅ​ប្រអប់ជើង ជាមួយ​លំ​ហាត់ប្រាណ​ប្រភេទ​នេះ ។ សាច់ដុំ​ទាំងនេះ​គឺ​មាន​សារៈសំខាន់ នៅ​ក្នុង​ការរក្សា​តុល្យភាព​។ អ្នក​អាច​បង្ការ​ការរង​របួស​ផ្សេងៗ ដោយ​ការពង្រឹង​ទៅលើ​សាច់ដុំ​ទាំងនេះ ។​
​ចំពោះ​លំ​ហាត់ប្រាណ​នេះ វា​តម្រូវ​ឲ្យ​អ្នក​មាន​ខ្សែយឺត ឬ​ក្រណាត់​យឺត​ដើម្បី​ទាញ​ទ្រ​ប្រអប់ជើង​។ ដាក់​ជើង​របស់​អ្នកឲ្យត្រង់​ខណៈពេល ដែល​អ្នក​អង្គុយ​នៅ​លើ​ឥដ្ឋ​។ ចង​ខ្សែយឺត​នេះ​ទៅ​នឹង​កៅអី ឬ​ជើង​គ្រែ ហើយ​យក​វា​មក​ចង​ដាក់​លើ​ប្រអប់ជើង​របស់​អ្នក​។ បន្ទាប់​មក​រក្សា​ការ​អង្គុយ​នេះ នៅ​លើ​ឥដ្ឋ​ដដែល ដោយ​ធ្វើការ​ទាញ​ជើង​មក​ក្រោយ​យឺតៗ​ថ្ន​មៗ​។ ត្រូវ​ឈប់​នៅពេលដែល​មាន​អារម្មណ៍​ថា ខ្សែ​នេះ​មាន​សម្ពាធ​។ ធ្វើការ​បត់​ប្រអប់ជើង​មក​ក្រោយ ។​រក្សា​ស្ថានភាព​នេះ ដោយ​រាប់​ពី​១​ដល់​៥ ហើយ​ធ្វើការ​ព្រលា​មកវិញ​យឺតៗ ។ ធ្វើ​វិធី​នេះ​ឡើង​វិញ​ឲ្យបាន ១០​ដង ។​

៥.​វិធី​ប្រើ​មេជើង​រើសយក​ខ្មៅ​ដៃ​
នេះ​គឺជា​ប្រភេទ​លំ​ហាត់ប្រាណ​ងាយស្រួល​មួយ ដោយ​អ្នក​អាច​ធ្វើ​វា​បាន​គ្រប់​ទីកន្លែង និង​គ្រប់​ពេលវេលា​។ ដូច​ជា​ឈ្មោះ​របស់​វា អ្នកត្រូវការ​ខ្មៅ​ដៃ​មួយ​សម្រាប់​អនុវត្ត​នូវ​វិធី​នេះ ។ ដាក់​ខ្មៅ​ដៃ នៅលើ​កម្រាល​ឥដ្ឋ នៅ​ខាង​មុខ​អ្នក​។ ប្រើ​មេជើង​ដើម្បី​ចាប់​យក​ខ្មៅ​ដៃ ។ លើក​ខ្មៅ​ដៃ​ឡើង ឲ្យ​ផុត​ពី​ដី ហើយ​ទប់​វាឲ្យ​នឹង​រយៈពេល ១០​វិនាទី ។ ទម្លាក់​វា​ចុះ​មកក្រោម​វិញ ហើយ​ធ្វើ​វា​ឡើង​វិញ​ឲ្យបាន​៥​ដង​។ អនុវត្ត​វិធី​ដដែល​នេះ ទៅ​លើ​ជើង​ម្ខាង​ទៀត ៕

ប្រែសម្រួល៖ ម៉ារ៉ាណែត

- ហាមដាច់ខាតការយក​អត្ថបទ ពីវេបសាយ www.health.com.kh ដោយគ្មានការអនុញាតិ បើលោក លោកស្រីត្រូវការអត្ថបទសូមទំនាក់ទំនង 012 267 277

ត្រួតពិនិត្យដោយ www.health.com.kh ថ្ងៃទី02 
ឧសភា ឆ្នាំ
2016

រាល់​ការ​បញ្ចេញ​មតិយោបល់​មិន​ឆ្លុះ​បញ្ចាំង​ពី​ទស្សនៈ​ និង​ការ​ទទួលខុសត្រូវ​របស់​វេ​ប​សាយ​www.health.com.kh​ឡើយ​។