យុវជនម្នាក់ ចេះតែឈឺពោះ តាមពិតរស់នៅស្ពាយសាកសព បងប្អូនភ្លោះ នៅក្នុងពោះ អស់១៥ឆ្នាំ

ម៉ាឡេស៊ី៖ កាលពីពេលថ្មីៗនេះ រឿងហេតុដ៏គួរឲ្យភ្ញាក់ផ្អើល និងមិនគួរឲ្យជឿមួយ បានកើតឡើង ចំពោះយុវជនម្នាក់បន្ទាប់ពីរូបគេ ចេះតែត្អូញត្អែរឈឺពោះ មិនបាត់សោះ រហូតទាល់តែទៅជួបគ្រូពេទ្យ និងពិនិត្យមើលទើបដឹងពីការពិត។

យោងតាមប្រភពព័ត៌មានបានឲ្យដឹងថា យុវជនរូបនេះ មានឈ្មោះថា Mohd Zul Shahril Saidin អាយុ១៥ឆ្នាំ បានទទួលការវះកាត់ បន្ទាប់ពីក្រុមគ្រូពេទ្យ រកឃើញសាកសពគត៌ ដែលត្រូវជាបងប្អូនភ្លោះរបស់គេ នៅក្នុងពោះ។ ជាមួយគ្នានេះ បានឲ្យដឹងទៀតថា យុវជនរូបនេះ បានរស់នៅដោយស្ពាយសាកសពគត៌នៅក្នុងខ្លួន តាំងពីកើតមកម្ល៉េះ ពោលគឺអស់រយៈពេល ១៥ឆ្នាំមកហើយ ប៉ុន្តែទើបតែមានអាការៈមិនស្រួល ក្នុងរយៈពេល ៤ខែចុងក្រោយនេះប៉ុណ្ណោះ។  

សម្រាប់យុវជន Saidin ត្រូវបានគេជឿជាក់ថា គឺជាមនុស្សដំបូងគេបង្អស់ ដែលកើតមានអាការៈ «គត៌នៅក្នុងគត៌» បែបនេះក្នុងប្រទេសម៉ាឡេស៊ី ហើយវាក៏ជា បាតុភូតដ៏កម្រ ដែលអាចកើតមានឡើង ១ក្នុងចំណោម ៥០០,០០០នៃការចាប់កំណើតផងដែរ។

បើតាមសម្តី អ្នកស្រី Hasmah Ahmad ដែលត្រូវជាម្តាយបង្កើត របស់យុវជន Saidin បានប្រាប់ឲ្យដឹងថា «សាកសពគត៌ ដែលបានវះកាត់ យកចេញពីក្នុងខ្លួនរបស់ Saidin គឺមានទម្រង់ដូចជា ទារកអីចឹង ដោយមាន សក់ ជើង ដៃ និងប្រដាប់ភេទ ប៉ុន្តែ ច្រមុះ និងមាត់ គឺមិនពេញលក្ខណៈឡើយ»។

គួរបញ្ជាក់ផងដែរថា ពិធីបុណ្យសពសម្រាប់គត៌នោះ ត្រូវបានរៀបចំរួចជាស្រេច ខណៈយុវជន Saidin កំពុងតែសម្រាកព្យាបាល នៅក្នុងមន្ទីរពេទ្យនៅឡើយ៕

ប្រភព ៖

កំណត់ហេតុខ្មែរឡូត

ទាក់ទឹននឹងករណី បងប្អូនភ្លោះ នៅក្នុងខ្លួនស្រដៀងគ្នានេះដែរ នៅឯប្រទេសឥណ្ឌា  ។

បើតាមប្រភពព័ត៌មាន បានឲ្យដឹងថា Narendra ដែលមានអាយុ ១៨ឆ្នាំ ត្រូវបានក្រុមគ្រូពេទ្យ រកឃើញរបស់ ដ៏ធំសម្បើមម្យ៉ាង មានទំងន់ប្រហែលជា ១៩គីឡូក្រាម ដែលវាជា ឆ្អឹង សក់ និងធ្មេញ ក្នុងពោះរបស់យុវជនរូបនេះ។ ក្នុងនោះ គេបានដឹងថា មូលហេតុដែលបង្កឲ្យ កើតមានអាការ:ឈឺពោះបែបនេះ ដោយសារតែមាន ទារកនៅក្នុងទារក ដែលជាករណីកម្រកើតមានបំផុត និងទើបតែមាន ២០០ករណីប៉ុណ្ណោះ ដែលត្រូវបានរាយការណ៍ នៅក្នុងពិភពលោកកន្លងមកនេះ។

បន្ថែមពីនេះ ប្រភពព័ត៌មានឲ្យដឹងទៀតថា លក្ខខណ្ឌបែបនេះកើតឡើង នៅក្នុងដំណាក់កាលដំបូង នៃការពរពោះកូនភ្លោះ។ នៅក្នុងនោះ ទារកមួយ បានចូលទៅក្នុងទារកមួយទៀត តាមរយៈទងផ្ចិត។ ស្របពេលនោះ វានឹងវិវត្តន៍ក្លាយជាប៉ារ៉ាស៊ីត ហើយរស់នៅក្នុងខ្លួនបងប្អូនវានោះ ដើម្បីតស៊ូបន្ដជីវិតរស់នៅ។

បើតាមសម្ដីលោកវេជ្ជបណ្ឌិត ដែលធ្វើការនៅក្នុងមន្ទីរពេទ្យ Swaroop Narayan នៃរដ្ឋ Uttar Pradesh បានបញ្ជាក់ថា វា (ទារក) រស់នៅដូចជា ប៉ារ៉ាស៊ីត នៅក្នុងខ្លួន យុវជន Narendra តាំងពីចាប់កំណើតមកម្ល៉េះ។

ជាមួយគ្នានោះដែរ លោកវេជ្ជបណ្ឌិតរូបនេះ បានបន្ថែមឲ្យដឹងទៀតថា អ្នកជំងឺរបស់គាត់ (Narendra) មានអាការៈ ក្អួតចង្អោរ និងស្រកទំងន់ផងដែរ ប៉ុន្ដែក្រុមគ្រួសាររបស់គេ មិនយល់ថាមកពីមូលហេតុអ្វីនោះទេ និងទើបតែកាលពីថ្ងៃច័ន្ទមុននេះ ក្រោយពីធ្វើការវះកាត់រួច ទើបប្រទះឃើញ របស់ចម្លែកខាងលើនៅក្នុងពោះ ដែលវាជាមូលហេតុបង្កឲ្យ Narendra កើតមានជំងឺមួយនេះ។ ហើយវាកំពុងតែលូតលាស់ និងមានប្រវែង ២០សង់ទីម៉ែត្រ រួមនឹងសក់រុំចូលគ្នា បើសិនជាពន្លាវិញមាន ប្រវែងប្រហែលជា ២ម៉ែត្រ។ យ៉ាងណាមិញ ទាំងនេះមានន័យថា ទារកដែលរត់ចូលទៅក្នុងទារកមួយទៀតនេះ គឺមានសក់ ធ្មេញ និងមានក្បាលទៅហើយ។

យ៉ាងណាមិញ ក្រោយពីការវះកាត់រួច Narendra ដែលមានឪពុកជាកសិករ អាចនឹងជាសះស្បើយ ក្នុងពេលឆាប់ៗនេះ និងអាចវិលត្រលប់ទៅសិក្សាជាធម្មតា ហើយនឹងមានសុខភាពល្អឡើងវិញផងដែរ៕

ខ្មែរឡូត

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 093868723 (៨-១១ព្រឹក & ១-៥ល្ងាច) (2) អ៊ីម៉ែល
(3) LINE, VIBER: 093868723 (4)
តាមរយៈទំព័រហ្វេសប៊ុកខ្មែរឡូត

យុវជនម្នាក់ ចេះតែឈឺពោះ តាមពិតរស់នៅស្ពាយសាកសព បងប្អូនភ្លោះ នៅក្នុងពោះ អស់១៥ឆ្នាំ
រូបភាព៖ យុវជន Mohd Zul Shahril Saidin

យុវជនម្នាក់ ចេះតែឈឺពោះ តាមពិតរស់នៅស្ពាយសាកសព បងប្អូនភ្លោះ នៅក្នុងពោះ អស់១៥ឆ្នាំ
រូបភាព៖ សាកសពគត៌ ដែលត្រូវបានវះកាត់យកចេញ

យុវជនម្នាក់ ចេះតែឈឺពោះ តាមពិតរស់នៅស្ពាយសាកសព បងប្អូនភ្លោះ នៅក្នុងពោះ អស់១៥ឆ្នាំ
រូបភាព៖ យុវជន Narendra