កម្លាំងសមត្ថកិច្ចចំរុះ ចុះដកហូត ទឹកអាសីុត រូបទន្សាយ ជំនួសទឹកខ្មេះ និងទំនិញខូចគុណភាព​ នៅតាមផ្សារជាប់ ព្រំដែនថៃ

(បន្ទាយមានជ័យ)៖ មន្រ្តីសាខាកាំកុងត្រូលខេត្តបន្ទាយមានជ័យ ដឹកនាំដោយលោក ហុង លាង អនុប្រធានសាខាទទួលបន្ទុកស្ថិតិ និងទីផ្សារ សហការជាមួយមន្ទីរពាណិជ្ជកម្មខេត្ត និងកម្លាំងនគរបាលប្រឆាំងបទល្មើស​ សេដ្ឋកិច្ចខេត្ត-ក្រសួង នៅថ្ងៃទី២៨ ខែឧសភា ឆ្នាំ២០១៦នេះ បានបន្តយុទ្ធនាការចុះទៅដកហូតទឹកអាសីុតរូបទន្សាយ ប្រើជំនួសទឹកខ្មេះ ព្រមទាំងទំនិញខូចគុណភាពនៅតាមផ្សារចំនួន២គឺផ្សារបឹងត្រកួន និងផ្សារអូរ៣ជាន់ នៅតាមព្រំដែន ក្នុងស្រុកអូរជ្រៅ ខេត្តបន្ទាយមានជ័យ។

លោក ហុង លាង បានឲ្យដឹងថា ក្រោមការណែនាំរបស់លោក ស៊ាន សីុណាត ប្រធានសាខាខេត្ត លោកបានដឹកនាំមន្រ្តីជំនាញ សហការជាមួយមត្ថកិច្ចពាក់ព័ន្ធ ចុះទៅកាន់ផ្សារ២ ដែលដាច់ស្រយាលជាប់ព្រំដែន ខ្មែរ-ថៃ ដើម្បីត្រួតពិនិត្យទំនិញខូចគុណភាព និងហួសកាលបរិច្ឆេទ ដែលកំពុងដាក់តាំងលក់នៅតាមទីផ្សារ។

លោកបានបន្តទៀតថា នាឱកាសនេះដែរ ក្រុមការងារ បានផ្សព្វផ្សាយ និងពន្យល់ណែនាំដល់ អាជីវករឲ្យលក់ដូរទំនិញដែលមានគុណភាព ចេះមើលកាលបរិច្ឆេទ នៃអាយុកាល របស់ទំនិញហូបចុក។

បើតាមលោក ហុង លាង ក្រោយការចុះត្រួតពិនិត្យ កម្លាំងសមត្ថកិច្ចចំរុះ បានដកហូត ត្រីខ៣៨កំប៉ុង, ទឹកអាសុីត ដបជ័រ រូបទន្សាយ ១០ដប, ទឹកក្រូច ១៩៨ដប, ទឹកដោះគោ ខ្លាឃ្មុំ ៤កំប៉ុង និងទឹកដោះគោ ឆៅ៥ប្រអប់។

មន្រ្តីរូបនេះ បានបញ្ជាក់ថា មន្រ្តីរបស់លោក សហការជាមួយមន្រ្តីពាក់ព័ន្ធ បាននិងកំពុងបន្តយុទ្ធនាការជាបន្តបន្ទាប់ លើការចុះត្រួតពិនិត្យមុខទំនិញតាមទីផ្សារ និងតាមតូបលក់ដូរ ដើម្បីរកឲ្យឃើញទំនិញខូចគុណភាព និងជាពិសេសទឹកអាសីុតដែលកំពុងយកមកចែកចាយ នៅពេលនេះ៕

ប្រភព ៖

កំណត់ហេតុខ្មែរឡូត៖

ពាក់ព័ន្ធនឹងករណីនេះដែរ  ទៅលើផលប៉ះពាល់សុខភាពរបស់ពួកគាត់ ដោយសារតែនៅតាមហាងបាយ ហាងគុយទាវ និងក្នងផលិតកម្មឧស្សាហកម្មមួយចំនួន បាននិងកំពុងប្រើប្រាស់ទឹកអាសីុតរូបទន្សាយ ជំនួសទឹកខ្មេះ ដែលលួចនាំចូលពីប្រទេសថៃ មកចែកចាយនៅខេត្តមួយចំនួនជាប់ព្រំដែន ជាពិសេសនៅខេត្តបន្ទាយមានជ័យ និងខេត្តបាត់ដំបង។

ការលួចនាំចូលទឹកអាសីុតរូបទន្សាយ មកចរាចរជំនួសទឹកខ្មេះ ដែលធ្វើឲ្យប៉ះពាល់យ៉ាងធ្ងន់ធ្ងរដល់សុខភាព របស់អ្នកបរិភោគខាងលើនេះ បានកើតមានឡើងដោយសារតែ មានការឃុបឃិតគ្នាជាប្រព័ន្ធ នៅតាមច្រករបៀងជាប់ព្រំដែនប្រទេសថៃ ដោយមិនគិតលើបញ្ហាសុខភាព​ របស់រាស្រ្តទាល់តែសោះ។

យ៉ាងណាក៏ដោយ សម្រាប់ខេត្តបន្ទាយមានជ័យវិញ ត្រូវបានមន្រ្តីកាំកុងត្រូលខេត្ត បញ្ជាក់ថា កម្លាំងជំនាញ បានបើកប្រតិបត្តិការជាបន្តបន្ទាប់ ទាំងការផ្សព្វផ្សាយ អប់រំ និងចុះដកហូតតាមនៅតាមផ្សារ នៅតាមទីលក់ដូរ តែការលួចនាំចូលនៅតែកើតមាន ជាហេតុនាំឲ្យពិបាកលើការគ្រប់គ្រង។

ប្រជាពលរដ្ឋ បានលើកឡើងនូវបញ្ហានេះតាមបណ្តាញសង្គម Facebook យ៉ាងដូច្នេះថា «អ្នកលក់បាយ និគុយទាវ នៅខេត្តបាត់ដំបង និងខេត្តបន្ទាយមានជ័យ បានប្រាប់ឱ្យដឹងថា ហាងលក់បាយ និងគុយទាវខេត្តទាំង២នេះ ភាគច្រើនប្រើទឹកអាសីត រូបទន្សាយនាំពីប្រទេសថៃ ជំនួសទឹកខ្មេះសម្រាប់ឱ្យុភ្ញៀវពិសារពីព្រោះទឹកអាសីុតរូបទន្សាយវាងាយនិងជូស្រស់»។

ប្រជាពលរដ្ឋនិយាយថា «ទឹកអាសីុតរូបទន្សាយដែលនាំពីប្រទេសថៃ ត្រូវបានខ្មែរយើងកំពុងពេញនិយមប្រើប្រាស់ជំនួសទឹកខ្មេះលាយផ្សំ ធ្វើជាម្ជូសម្រាប់ធ្វើអាហារ។ ទឹកអាស៊ីតរូបទន្សាយត្រូវបានច្បាប់ប្រទេសកម្ពុជា ហាមឃាត់មិនឱ្យនាំចូល វាបង្កប៉ះពាល់សុខភាពធ្ងន់ ដល់អ្នកបរិភោគ ប៉ះពាល់ក្រពះ ពោះវៀន ថ្លើម ប្រម៉ាត់ តម្រងនោម និងអាចឈានដល់កើតជម្ងឺមហារីក។​ បងប្អូនមានការប្រុងប្រយ័ត្ន»។

ជុំវិញបញ្ហានេះ លោក ហុង លាង អនុប្រធានទី១ ទទួលបន្ទុកស្ថិតិ និងទីផ្សារ បានប្រាប់អង្គភាព Fresh News នៅព្រឹកថ្ងៃទី២៥ ខែឧសភា ឆ្នាំ២០១៦នេះថា ពិតជាមានការដាក់លក់ និងយកទៅប្រើប្រាស់មែន ទឹកអាសីុតរូបទន្សាយដែលនាំចូលពីប្រទេសថៃ តែកម្លាំងរបស់លោក បានចុះបង្ក្រាប និងដកហូតជាច្រើនដងហើយ នៅតាមទីផ្សារនានានាពេលកន្លងទៅ។

លោក ហុង លាង បានបញ្ជាក់ពីផលលំបាកថា មូលហេតុដែលនាំឲ្យផលិតផលហាមឃាត់ នៃការនាំចូលនេះនៅតែកើតមាន ក៏ព្រោះតែក្រុមឈ្មួញលួចនាំចូលតាមច្រករបៀង ជាប់ព្រំដែនពីព្រោះចក្ររបៀង មានរហូតទៅដលជិត៦០ច្រកឯណោះ នោះហើយទើបនាំឲ្យមានការលំបាកលើការគ្រប់គ្រង។

បើតាមមន្រ្តីជំនាញរូបនេះ ទឹកអាសីុតរូបទន្សាយដែលប្រើសម្រាប់ការបោក គក់ ញាុំ ទឹកជ្រលក់នេះ គឺបានបណ្តាលឲ្យមានការប៉ះពាល់យ៉ាងធ្ងន់ធ្ងរ ដល់បេះដូង គ្រលៀន ក្រពះ និងការដកដង្ហើមថប់ៗ ជាដើម។

យ៉ាងណាក៏ដោយមន្រ្តីកាំកុងត្រូល ក្រោមការដឹកនាំរបស់លោក ស៊ាន សុីណាត ប្រធានសាខាកាំកុងត្រូលខេត្ត សហការជាមួយសមត្ថកិច្ចពាក់ព័ន្ធនោះ នឹងបន្តខ្លាំងឡើងសម្រាប់ករណីមួយនេះ ដើម្បីកាត់បន្ថយផលប៉ះពាល់សុខភាព របស់ប្រជាពលរដ្ឋទូទៅ។

សម្រាប់ខេត្តបាត់ដំបងវិញ ត្រូវបានមន្រ្តីកាំកុងត្រូល ប្រាប់ថា កន្លងទៅមានការចុះបង្ក្រាប និងដកហូតយ៉ាងច្រើននាពេលកន្លងទៅ៕

ខ្មែរឡូត

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 093868723 (៨-១១ព្រឹក & ១-៥ល្ងាច) (2) អ៊ីម៉ែល
(3) LINE, VIBER: 093868723 (4)
តាមរយៈទំព័រហ្វេសប៊ុកខ្មែរឡូត

កម្លាំងសមត្ថកិច្ចចំរុះ ចុះដកហូត ទឹកអាសីុត រូបទន្សាយ ជំនួសទឹកខ្មេះ និងទំនិញខូចគុណភាព​ នៅតាមផ្សារជាប់ ព្រំដែនថៃ

កម្លាំងសមត្ថកិច្ចចំរុះ ចុះដកហូត ទឹកអាសីុត រូបទន្សាយ ជំនួសទឹកខ្មេះ និងទំនិញខូចគុណភាព​ នៅតាមផ្សារជាប់ ព្រំដែនថៃ

កម្លាំងសមត្ថកិច្ចចំរុះ ចុះដកហូត ទឹកអាសីុត រូបទន្សាយ ជំនួសទឹកខ្មេះ និងទំនិញខូចគុណភាព​ នៅតាមផ្សារជាប់ ព្រំដែនថៃ

កម្លាំងសមត្ថកិច្ចចំរុះ ចុះដកហូត ទឹកអាសីុត រូបទន្សាយ ជំនួសទឹកខ្មេះ និងទំនិញខូចគុណភាព​ នៅតាមផ្សារជាប់ ព្រំដែនថៃ