មន្ត្រីរដ្ឋបាល​ព្រៃឈើ​ខេត្តក្រចេះ ដោះលែង​រថយន្ត​ដឹកឈើ​ដើម្បី​ជា​ថ្នូរ​នឹង​ផលប្រយោជន៍​ធ្វើ​ឲ្យ​មានការ​រិះគន់​យ៉ាងខ្លាំង​

មន្ត្រីរាជការ​និង​ប្រជាពលរដ្ឋ​នៅ​ខេត្តក្រចេះ បាន​អំពាវនាវ​ឲ្យ​លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់​និង​នេសាទ ចាត់វិធានការ​ទៅលើ​អំពើពុករលួយ​និង​ភាព​អសកម្ម​របស់​មន្ត្រីរដ្ឋបាល​ព្រៃឈើ​ក្នុង​ខេត្តក្រចេះ​ជាបន្ទាន់ កុំ​ឲ្យ​ពួកគេ​ធ្វើ​អ្វីៗ​តាម​អំពើ​ចិត្ត​តទៅទៀត​។ ដោយហេតុថា​កាលពី​រសៀល​ថ្ងៃទី​១៩ ខែកក្កដា ឆ្នាំ​២០១៦ សមត្ថកិច្ច​ចម្រុះ​ក្នុង​ខេត្តក្រចេះ បាន​ឃាត់​រថយន្ត​ហ៊ីយ៉ាន់ដាយ​ចំណុះ​៥​តោន​ពាក់​ស្លាក​លេខ​កំពង់ចាម​3A-0403 ដែល​ដឹកឈើ​ប្រណីត​ប្រភេទ​សុ​ក្រំ​និង​ឈើ​លេខ​១​ពេញ​រថយន្ត​។ ប៉ុន្តែ​បន្ទាប់មក​ត្រូវបាន​មន្ត្រី​ផ្នែក​រដ្ឋបាល​ព្រៃឈើ​ក្រចេះ ដោះលែង​ស្ងាត់ៗ​ក្រោយពេល​រក្សាទុក​រថ​យន្ត​និង​ឈើ​នៅ​ស្ថានីយ៍​បណ្ដុះ​កូនឈើ​ខ្សា​បាន​មួយ​យប់​។

ទង្វើ​របស់​មន្ត្រី​ផ្នែក​រដ្ឋបាល​ព្រៃឈើ​ក្រចេះ បានធ្វើ​ឲ្យ​មន្ត្រីរាជការ​និង​ប្រជាពលរដ្ឋ​នៅ​ខេត្តក្រចេះ រិះគន់​យ៉ាងខ្លាំង​ហើយ​អំពាវនាវ​ឲ្យ​អង្គភាព​ប្រឆាំង​អំពើពុករលួយ ដែលមាន​លោក ឱម យ៉ិនទៀង ជា​ប្រធាន ចាត់វិធានការ​ស៊ើបអង្កេត​ជាបន្ទាន់​ផងដែរ​។ ការអំពាវនាវ​បែបនេះ​បាន​កើតឡើង​ក្រោយពេល​សមត្ថកិច្ច​អាវុធហត្ថ​និង​នគរបាល​ធ្វើការ​បង្ក្រាប​រថយន្ត​ដឹកឈើ​ជាច្រើនលើក​ប្រគល់​ទៅ​ឲ្យ​មន្ត្រីរដ្ឋបាល​ព្រៃឈើ ហើយ​ត្រូវបាន​មន្ត្រីរដ្ឋបាល​ព្រៃឈើ​ដោះលែង​ស្រួលៗ​ដើម្បី​ជា​ថ្នូរ​នឹង​ផលប្រយោជន៍​។ ចំណែក​លោក សរ ចំ​រ៉ុង អភិបាលខេត្ត​ក្រចេះ និង​មេ​រដ្ឋបាល​ព្រៃឈើ​ខេត្តក្រចេះ ធ្វើ​មិនដឹងមិនឮ​អ្វី​ទាំងអស់​ចំពោះ​ករណី​ឈ្មួញ​បន្ត​ដឹកជញ្ជូន​ឈើ​ខុសច្បាប់​យ៉ាង​ពេញបន្ទុក ហើយ​មន្ត្រីរដ្ឋបាល​ព្រៃឈើ​គ្រប់លំដាប់​ថ្នាក់​គិតគូរ​តែ​រឿង​ផលប្រយោជន៍​។

តាម​ការអះអាង​ពី​ឈ្មួញ​ដឹកជញ្ជូន​ឈើ​ខុសច្បាប់​ឆ្លងកាត់​ខេត្តក្រចេះ បាន​ឲ្យ​ដឹងថា​ពេល​ដឹកឈើ​ម្តងៗ​ពួកគេ​តែងតែ​បង់លុយ​ឲ្យ​មន្ត្រីរដ្ឋបាល​ព្រៃឈើ​និង​សមត្ថកិច្ច​ពាក់ព័ន្ធ​ដទៃទៀត មិនអាច​រំលង​បានឡើយ បើ​មិន​ដូច្នេះ​ទេ​ប្រាកដជា​ត្រូវ​ប្រឈម​នឹង​ការបង្ក្រាប​ចៀស​មិន​ផុត​ឡើយ​។ សកម្មជន​ព្រៃឈើ​និង​មជ្ឈដ្ឋាន​នានា​បាន​រំលឹកថា មន្ត្រីរដ្ឋបាល​ព្រៃឈើ​គ្រប់លំដាប់​ថ្នាក់​ក្នុង​ខេត្តក្រចេះ មិន​យកចិត្តទុកដាក់​បង្ក្រាប​បទល្មើស​ដឹកជញ្ជូន​ឈើ​ខុសច្បាប់​ឲ្យ​ស្របទៅតាម​បទបញ្ជា​របស់លោក​នាយ​ក​រដ្ឋមន្ត្រី ហ៊ុន សែន កាលពី​ខែមករា ឆ្នាំ​២០១៦​នោះទេ ហើយ​ភាគច្រើន​នៃ​ការបង្ក្រាប​គឺធ្វើឡើង​ដោយ​មន្ត្រី​កងរាជអាវុធហត្ថ និង​នគរបាល​។ ដូច្នេះ​លោក វេ​ង សាខុន រដ្ឋមន្ត្រី​ក្រសួងកសិកម្ម មិនត្រូវ​មើលរំលង​អំពើពុករលួយ​និង​ភាព​អសកម្ម​របស់​មន្ត្រីរដ្ឋបាល​ព្រៃឈើ​ក្នុង​ខេត្តក្រចេះ​តទៅទៀត​ទេ ក្នុងខណៈដែល​សកម្មភាព​ដឹកជញ្ជូន​ឈើ​ខុសច្បាប់​នៅតែ​កើតមាន​ឥតឈប់ឈរ​។ លើស​នេះ​ទៅទៀត​ក្រសួងមហាផ្ទៃ ក៏​គួរ​មាន​វិធានការ​ទៅលើ​លោក សរ ចំ​រ៉ុង អភិបាលខេត្ត​ក្រចេះ​ផងដែរ ព្រោះ​ក្នុងនាម​ជា​អភិបាលខេត្ត​លោក សរ ចំ​រ៉ុង មិន​ចាត់វិធានការ​ទប់ស្កាត់​បទល្មើស​បំផ្លាញ​ព្រៃឈើ​និង​ដឹកជញ្ជូន​ឈើ​ខុសច្បាប់​ដែល​កើតឡើង​យ៉ាង​រាលដាល​នោះឡើយ​៕

12822170_1531777843784459_2119981317_nលោក សរ ចំរ៉ុង អភិបាលខេត្តក្រចេះ ses-62