ទូកបុរាណ ដែលរកឃើញ​កាលពីខែមេសា នៅខេត្តសៀមរាប ធ្វើឡើងក្នុងរាជ្យព្រះ​បាទជ័យវរ្ម័ន​ទី៧ ឆ្នាំ១២០៧

(សៀមរាប)៖ ទូកបុរាណ ដែលបានប្រទះឃើញនៅក្នុងការដ្ឋានបូមខ្សាច់ ស្ថិតក្នុងភូមិបំពេញរាជ្យ ឃុំលាងដៃ ស្រុកអង្គរធំ ខេត្តសៀមរាប កាលពីថ្ងៃទី៨ ខែមេសា ឆ្នាំ២០១៦ កន្លងមក ត្រូវបានបញ្ជាក់ថា មានអាយុកាលប្រមាណជា៨០៩ឆ្នាំ ​ត្រូវបានផលិតឡើងនៅក្នុងឆ្នាំ១២០៧ ក្នុងរាជ្យព្រះបាទជ័យវរ្ម័នទី៧។

ក្នុងឱកាសកិច្ចប្រជុំបច្ចេកទេសលើកទី២៦ នៃគណៈកម្មាធិការអន្តរជាតិសម្របសម្រួល ការគាំពារ និងអភិវឌ្ឍន៍តំបន់ប្រវត្តិសាស្ត្រអង្គរ (ICC-Angkor) នាថ្ងៃទី២៣ ខែមិថុនា ឆ្នាំ២០១៦ លោកសា​ស្ត្រាចារ្យ Azedine Bechaouch លេខាធិការវិទ្យាសាស្ត្រនៃគណៈកម្មាធិការអាយស៊ីស៊ី-អង្គរ បានឲ្យដឹងថា អាយុកាលនេះ បានមកពីលទ្ធផល នៃការវិភាគនៅមន្ទីរពិសោធន៍ប្រទេសញូវហ្សេឡែន ដោយប្រព័ន្ធវិទ្យាសាស្ត្រកាបូន១៤ ដែលមានភាពសុក្រឹត និងច្បាស់បំផុត ហើយមានការទទួលស្គាល់ជាលក្ខណៈសកល។

លទ្ធផល ដ៏គួរឲ្យភ្ញាក់ផ្អើលនេះ ត្រូវបានអ្នកជំនាញជាតិ និងអន្តរជាតិសម្តែងការអបអរសាទរ និងគាំទ្រយ៉ាងខ្លាំង ចំពោះការប្រទះឃើញនូវទូកបុរាណដ៏កម្រដំបូងបំផុត ដែលមានអាយុ​កាល​ចាស់ជាងគេក្នុងតំបន់អង្គរ។ បើតាមទម្រង់រូបរាងជាក់ស្តែងបានបញ្ជាក់ថា ទូកបុរាណដែលបានកប់ក្នុងដីជម្រៅ ៧ម៉ែត្រនេះ ជាប្រភេទទូកឃ្លោង ធ្វើពីដើមគគីរមួយដើមទាំងមូល មានប្រវែង ១២.៨៣​ម៉ែត្រ។ ចំពោះទីតាំងដែលរកឃើញវិញ គឺជាអតីតស្ទឹងពួកចាស់ ជាប់និងស្ទឹងសៀមរាប ហូរទៅកាន់ស្រុកពួក។

លោក សុខ សង្វារ អគ្គនាយករងអាជ្ញាធរជាតិអប្សរាបានបញ្ជាក់បន្ថែមថា លទ្ធផល ដែលទទួលបាននេះ ជាទិន្នន័យដ៏សំខាន់ ដែលមានគុណតម្លៃយ៉ាងខ្ពស់ ចំពោះសាធារណជននិងអ្នកស្រាវជ្រាវ ដើម្បីឱ្យយល់កាន់តែច្បាស់អំពីអាណាចក្រខ្មែរ ជាពិសេសក្នុងរាជ្យព្រះបាទជ័យវរ្ម័នទី៧។ អាជ្ញាធរជាតិអប្សរា នឹងពិភាក្សាជាមួយអ្នកជំនាញជាតិនិងអន្តរជាតិ ដើម្បីធ្វើយ៉ាងណារកមធ្យោបាយ​តាំង​ពិព័រណ៍ឱ្យសាធារណជន ក៏ដូចជាភ្ញៀវទេសចរជាតិ-អន្តរជាតិ បានទស្សនា និងទទួលព័ត៌មានលម្អិតអំពីទូកបុរាណនេះ។

អាជ្ញាធរជាតិអប្សរានឹងពិចារណារកទីកន្លែង ដើម្បីតាំងបង្ហាញនៅ​សារមន្ទីរថ្មីដោយឡែក ឬសារមន្ទីរដែលមានស្រាប់ ដូចជាសារមន្ទីរព្រះនរោត្តម​សីហនុ-អង្គរ និងសារមន្ទីរវាយនភណ្ឌប្រពៃណីអាស៊ី ឬតាំងចល័តឆ្លាស់គ្នាដើម្បីឱ្យភ្ញៀវទាំងអស់​បានទស្សនាទូកបុរាណផង បានទស្សនាពិព័រណ៍ផ្សេងៗក្នុងសារមន្ទីរទាំងនោះផង។ ក្នុងនោះដែរក៏ត្រូវបង្កលក្ខណៈងាយស្រួល ក៏ដូចជាកិច្ចការរក្សាសុវត្ថិភាព និងសន្តិសុខល្អដើម្បីអភិរក្ស រក្សាទម្រង់រូបរាងដើមរបស់ទូកឱ្យបាន​យូរអង្វែងទុកជាមត៌កបេតិកភណ្ឌ​ដ៏មានតម្លៃរបស់ជាតិ៕

ទូកបុរាណ ដែលរកឃើញ​កាលពីខែមេសា នៅខេត្តសៀមរាប ធ្វើឡើងក្នុងរាជ្យព្រះ​បាទជ័យវរ្ម័ន​ទី៧ ឆ្នាំ១២០៧

ទូកបុរាណ ដែលរកឃើញ​កាលពីខែមេសា នៅខេត្តសៀមរាប ធ្វើឡើងក្នុងរាជ្យព្រះ​បាទជ័យវរ្ម័ន​ទី៧ ឆ្នាំ១២០៧

ទូកបុរាណ ដែលរកឃើញ​កាលពីខែមេសា នៅខេត្តសៀមរាប ធ្វើឡើងក្នុងរាជ្យព្រះ​បាទជ័យវរ្ម័ន​ទី៧ ឆ្នាំ១២០៧

ទូកបុរាណ ដែលរកឃើញ​កាលពីខែមេសា នៅខេត្តសៀមរាប ធ្វើឡើងក្នុងរាជ្យព្រះ​បាទជ័យវរ្ម័ន​ទី៧ ឆ្នាំ១២០៧

ទូកបុរាណ ដែលរកឃើញ​កាលពីខែមេសា នៅខេត្តសៀមរាប ធ្វើឡើងក្នុងរាជ្យព្រះ​បាទជ័យវរ្ម័ន​ទី៧ ឆ្នាំ១២០៧

ទូកបុរាណ ដែលរកឃើញ​កាលពីខែមេសា នៅខេត្តសៀមរាប ធ្វើឡើងក្នុងរាជ្យព្រះ​បាទជ័យវរ្ម័ន​ទី៧ ឆ្នាំ១២០៧

ផ្តល់សិទ្ធិដោយ ៖ ហ្រ្វេសញ៉ូវអាសុី