មើលចែៗ​ដណ្តើម​គ្នា ​រហូតដល់ជាប់ខ្នោះ

ខេត្តកណ្ដាល ៖ ស្ត្រី​២​នាក់​ក្នុង​ចំណោម​៣​នាក់ បាន​ត្រូវ​នគរបាល​ឃាត់ខ្លួន​ពាក់ព័ន្ធ​នឹង​ករណី​ហិង្សា​ដោយ​ចេតនា​លើ​ស្ត្រី​ម្នាក់​ កាលពី​វេលា​ម៉ោង0​៩​ និង​១០​នាទី​ព្រឹក​ថ្ងៃ​ទី​៣១  កក្កដា ដោយសារ​ទំនាស់​រឿង​កន្លែង​លក់ដូរនៅ​ភូមិ​ទួល​ក្របៅ ឃុំ​គគីរ ស្រុក​កៀន ស្វាយ ដែល​ជា​ផ្សារ​តូច​មួយ​នៅ​ក្នុងភូមិ​ក្បែរផ្លូវ ។

ក្រុម​ស្ត្រី​បង្ក​ហិង្សា​មាន​គ្នា​៣​នាក់​គឺ ១-​ឈ្មោះ សូត្រ សា​វឿ​ន អាយុ​៣៦​ឆ្នាំ លក់ដូរ (​សមត្ថកិច្ច​ឃាត់ខ្លួន​) ២-​ឈ្មោះ ទិ​ត ដា​នី អាយុ​៣១​ឆ្នាំ អ្នក​លក់ដូរ ត្រូវជា​ប្អូនថ្លៃ​របស់​ឈ្មោះ សូត្រ សា​វឿ​ន (​ឃាត់ខ្លួន​) និង​៣-​ឈ្មោះ ធី បញ្ញា អាយុ​១១​ឆ្នាំ ត្រូវជា​កូនស្រី​បង្កើត​របស់​ឈ្មោះ សូត្រ សា​វឿ​ន បាន​រត់គេច​ខ្លួន ។ ស្ត្រី​ទាំង​៣​នាក់​ ដែល​ជា​បងប្អូន​និង​កូន​នេះ មាន​ទីលំនៅ​ក្នុង​ភូមិធំ ឃុំ​ភូមិធំ ស្រុក​កៀនស្វាយ ។

ចំណែក​ស្ត្រី​រង​គ្រោះ​ឈ្មោះ ថា លី​ដា  អាយុ​៣២​ឆ្នាំ មុខរបរ​លក់ដូរ មាន​ទីលំនៅ​ភូមិ​ទួល​ក្របៅ ឃុំ​គគីរ ស្រុក​កៀនស្វាយ ត្រូវ​សន្លប់ និង​ត្រូវ​បាន​ដឹក​យក​ទៅ​សង្គ្រោះ​នៅ​មន្ទីរពេទ្យ​។ ប្រភព​ពី​អ្នក​លក់ដូរ​ជិតខាង​និយាយ​ថា នៅ​មុន​ពេល​កើតហេតុ ស្ត្រី​ឈ្មោះ សូត្រ សា​វឿ​ន ដែល​មាន​កន្លែង​លក់ដូរ​ជាប់​តូប​ស្ត្រី​រង​គ្រោះ បាន​យក​កៅអី​ជ​រ័​ពណ៌​ក្រហម​ដាក់​ចូល​មក​ខាង​កន្លែង​ជន​រង​គ្រោះ​លក់ ដូរ ។

ពេល​នោះ​ជន​រង​គ្រោះ បាន​យក​ជើង​គាស់​កៅអី​ជ​រ័​នោះ​ចេញ ហើយ​ភ្លាម​ៗ​នោះ​ស្ត្រី​ឈ្មោះ សូត្រ សា​វឿ​ន ក៏​ស្ទុះ​មក​ប្រវាយប្រតប់​និង​យក​កៅអី​ជ​រ័​វាយ​ទៅ​លើ​ក្បាល​ជន​រង​គ្រោះ ។ នៅ​ពេល​នោះ​ដែរ ស្ត្រី​ឈ្មោះ ទិ​ត ដា​នី (​ប្អូនថ្លៃ​របស់​ឈ្មោះ សូត្រ សា​វឿ​ន ) និង​ឈ្មោះ ធី បញ្ញា (​កូនបង្កើត របស់​សូត្រ សា​វឿ​ន )​បាន​នាំ​គ្នា​ព្រួត​វាយ​ជន​រង​គ្រោះ បណ្ដាល​ឲ្យ​ស្ត្រី​រង​គ្រោះ​ដួល​ទៅ​លើ​ទូកញ្ចក់​លក់​បង្អែម និង​សន្លប់​នៅ​កន្លែង​កើតហេតុ ។

ពេល​ឃើញ​សភាព​បែប​នេះ អ្នក​ជិតខាង​បាន​រាយការណ៍​ប្រាប់​ទៅ​នគរបាល​ប៉ុស្តិ៍​គគីរ ចុះ​មក​អន្តរាគមន៍​ឃាត់ខ្លួន​ជន​ដៃដល់​បាន​២​នាក់​ នាំ​យក​ទៅ​ប៉ុស្តិ៍ ដើម្បី​កសាង​សំណុំរឿង​បញ្ជូន​ទៅ​អធិការដ្ឋាន​នគរបាល​ស្រុក​ចាត់ការ​បន្ត​តាម​នីតិវិធី ៕