ល្បែងស៊ីសង​អាប៉ោង​និង​បៀ​ដុះ​ស្លែ​ នៅ​ស្រុក​បន្ទាយស្រី​លេង​ដោយ​រលូន

ខេត្តសៀមរាប ៖ ទីតាំង​ល្បែងស៊ីសង​អាប៉ោង​និង​បៀ​មួយ​កន្លែង នៅ​ស្រុក​បន្ទាយស្រី​គេ​លេង​ដុះ​ស្លែ​យូរហើយ និង​មិន​ដែល​ឃើញ​សមត្ថកិច្ច​អើពើ​បង្ក្រាប​ទេ ធ្វើ​ឱ្យ​មានការ​សង្ស័យ​ថា អាច​អាជ្ញាធរ​ពាក់ព័ន្ធ ឬ​ត្រូវ​ថ្នាំ​ដេក​លក់​អស់​ទៅ​ហើយ​ទើប​ធ្វើ​ឲ្យ​មុខរបរ​មួយ​នេះ​រីកមុខ​រីក​មាត់​ដូច​ផ្សិត ។

ជាក់ស្តែង នៅ​រសៀល​ថ្ងៃ​ទី​០២ ខែសីហា ក្រុម​អ្នក​សា​ព័ត៌មាន​ចុះ​ទៅ​ដល់​កន្លែង​លេង​អាប៉ោង​និង​បៀរ​នៅ​ភូមិ​កម្រង​ថ្មី ឃុំ​ខ្នារ​សណ្តាយ ស្រុក​បន្ទាយស្រី ហើយ​ថត​យក​រូបភាព​ពួក​គេ​កំពុង​លេង ក៏​ត្រូវ​ទទួល​រង​ការ​ជេរ​ប្រមាថ និង​គំរាមកំហែង ព្រមទាំង​និយាយ​ថា «​ពួក​អ្ហែង​ចង់​ហៅ​អភិបាលស្រុក ឬ​ក៏​អធិការ​ស្រុក​និង​មេ​ធំ​នៅ​លើ​ក៏​មិន​ខ្វល់​ដែរ​» ។ ម្ចាស់​ល្បែងស៊ីសង​នេះ​មាន​២​នាក់ ម្នាក់​ឈ្មោះ ព្រៃ និង​ម្នាក់​ទៀត​ឈ្មោះ ហ៊ី​ម ហៅ យាយ​ចេក ដែល​អួត​ថា បាន​បង់លុយ​ឲ្យ​សមត្ថកិច្ច​ជា​រៀង​រាល់​ខែ​អស់ហើយ ។

បើ​តាម​ប្រភព​ព័ត៌មាន​ពី​ប្រជាពលរដ្ឋ​ឲ្យ​ដឹង​ថា ការ​លេងល្បែង​បៀ​អាប៉ោង នេះ ចាក់​លុយ​ក្នុង​មួយ​ដង​ៗ អាច​រហូត​ដល់​១​ពាន់​ដុល្លារ​ទៅ​២​ពាន់​ដុល្លារ​។ ជុំវិញ​ករណី​ខាងលើ​នេះ លោក សូ ស៊ុន អភិបាលស្រុក​បន្ទាយស្រី បាន​ឆ្លើយ​តប​តាម​ទូរស័ព្ទ​នៅ​ថ្ងៃ​ទី​០៣ ខែសីហា ឆ្នាំ​២០១៦ ថា «​ខ្ញុំ​មិន​មាន​ពេល​និយាយ​ពី​បញ្ហា​ល្បែងស៊ីសង​បាន​ឡើយ ពីព្រោះ​ខ្ញុំ​កំពុង​ជាប់រវល់​ប្រជុំ​» ។

ចំណែក​លោក មុ​យ ណ​ន អធិការ​នគរបាល​ស្រុក​បន្ទាយស្រី មិន​អាច​សុំ​ទំនាក់ទំនង​បាន​ទេ​នៅ​រសៀល​ថ្ងៃ​ទី​០៣ ខែសីហា ជុំវិញ​ករណី​ខាងលើ​នេះ ដែល​ប្រជាពលរដ្ឋ​បាន​សំណូមពរ​ជា​យូរ​ខែ​មក​ហើយ អំពី​ករណី​ល្បែងស៊ីសង​ដុះ​ស្លែ​នៅ​ក្នុងភូមិ​មួយ​នេះ ។

មជ្ឈដ្ឋាន​នានា​នៅ​ក្នុង​ខេត្តសៀមរាប បាន​រិះគន់​ទៅ​លើ​អាជ្ញាធរ​ស្រុក ក៏​ដូច​ជា​សមត្ថកិច្ច​ពាក់ព័ន្ធ​នៅ​ស្រុក​បន្ទាយស្រី​ថា ប្រហែលជា​ម្ចាស់​ល្បែង​យក​លុយ​ទៅ​សូក​ហើយ ទើប​គ្មាន​ឃើញ​បង្ក្រាប​សោះ ។ ជា​ពិសេស ពួក​គាត់​ជា​ប្រជាពលរដ្ឋ​សំណូមពរ​ដល់​លោក សត ណា​ឌី ស្នងការ​នគរបាល​ខេត្ត សូម​មាន​វិធានការ​ចំពោះ​ករណី​នេះ​ផង ព្រោះ​ល្បែង​ល្បែងស៊ីសង​បង្កើត​ឱ្យ​មាន​ចោរលួច ចោរឆក់ ចោរប្លន់ ជាដើម ដើម្បី​ឲ្យ​ស្រប​ទៅ​តាម​គោលនយោបាយ​របស់​រាជរដ្ឋាភិបាល​ដែល​បាន​បង្កើត​ភូមិ​-​ឃុំ មាន​សុវត្ថិភាព​ជូន​ប្រជាពលរដ្ឋ​នោះ ៕