មេបញ្ជាការរង​កងរាជអាវុធហត្ថ​ខេត្តឧត្ដរមានជ័យ ក្លាយជា​អ្នករត់​ការ​កាង​ឈើ​ប្រណីត​ខុសច្បាប់​គ្មាន​នរណា​ប៉ះពាល់​

ប្រភពពី​សមត្ថកិច្ច​ពា​ក់​ព័ន្ធ និង​មន្ត្រីរាជការ ក៏ដូចជា​ប្រជាពលរដ្ឋ​ក្នុង​ខេត្តឧត្ដរមានជ័យ បាន​ឲ្យ​ដឹងថា​លោក ឡាយ គឹម​ឡេង ហៅ​ស្រ៊ុន ជា​មេបញ្ជាការរង​កងរាជអាវុធហត្ថ​ខេត្តឧត្ដរមានជ័យ នៅតែ​ធ្វើ​សកម្មភាព​រត់ការ​កាង​ឈ្មួញ​ដឹកជញ្ជូន​ឈើ​ប្រណីត​ខុសច្បាប់​ដោយ​គ្មាន​ញញើត​អ្វី​ទាំងអស់​។ រហូតមកដល់​ពេលនេះ​លោក ឡាយ គឹម​ឡេង ហៅ​ស្រ៊ុន នៅតែមាន​ឥទ្ធិពល​ធំធេង​ក្នុងការ​កាង​ក្រុម​ឈ្មួញ​ដឹកជញ្ជូន​ឈើ​គ្រញូង​និង​ឈើ​ប្រណីត​ផ្សេងៗ​ទៀត​នៅក្នុង​ខេត្តឧត្ដរមានជ័យ ចំណែក​មន្ត្រីរដ្ឋបាល​ព្រៃឈើ និង​មន្ត្រីនគរបាល​ប្រឆាំង​បទល្មើស​សេដ្ឋកិច្ច​ជាដើម មិន​ហ៊ាន​ប៉ះពាល់​លោក ឡាយ គឹម​ឡេង ហៅ​ស្រ៊ុន នោះទេ​។ សូម្បីតែ​លោក ស ថា​វី អភិបាលខេត្ត​ឧត្ដរមានជ័យ ក៏​សម្ងំស្ងៀម​បណ្ដោយ​ឲ្យ​លោក ឡាយ គឹម​ឡេង ហៅ​ស្រ៊ុន ធ្វើ​អ្វីៗ​តាម​អំពើ​ចិត្ត​ដែរ​។

ប្រភពពី​សមត្ថកិច្ច​ពា​ក់​ព័ន្ធ​បាន​ឲ្យ​ដឹងថា ថ្មីៗ​កន្លងទៅនេះ​លោក ឡាយ គឹម​ឡេង ហៅ​ស្រ៊ុន បាន​កាង​ឲ្យ​ឈ្មួញ​ដឹកឈើ​ចេញពី​ទឹកដី​សៀម​ចូល​ស្រុក​អន្លង់វែង ខេត្តឧត្ដរមានជ័យ ហើយ​ឈើ​ទាំងនោះ​ត្រូវបាន​គេ​ដឹង​ជញ្ជូន​បន្ត​ចូលទៅ​ខេត្តសៀមរាប យកទៅលក់​នៅ​ស្រុក​យួន​។ ការដែល​លោក ឡាយ គឹម​ឡេង ហៅ​ស្រ៊ុន អាចធ្វើ​អ្វីៗ​តាម​អំពើ​ចិត្ត​គឺមាន​ការឃុបឃិត​ជាមួយ​សមត្ថ​កិច្ចការពា​រ​ព្រំដែន​ផងដែរ ជាពិសេស​មេបញ្ជាការ​យោធា​ផ្នែក​សឹក​រង​ស្រុក​អន្លង់វែង ចំណុះ​ឲ្យ​តំបន់​ប្រតិបត្តិការ​សឹក​រង​ខេត្តឧត្ដរមានជ័យ​។ ដូច្នេះហើយ​ទើប​ឈ្មួញ​អាច​ដឹកជញ្ជូន​ឈើ​គ្រញូង​មានមុខ​កាត់​ធំៗ​ចេញពី​ទឹកដី​សៀម​ចូល​ទឹកដី​ខ្មែរ​តាម​ច្រករបៀង ចំណុច​ជាប់​ជើងភ្នំ​ដងរែក ភូមិ​សាមគ្គី ឃុំ​ត្រពាំង​ប្រី​យ៍ កាលពីពេល​ថ្មីៗ​កន្លងទៅនេះ​។

ប្រភពពី​ប្រជាពលរដ្ឋ​នៅ​ឃុំ​ត្រពាំង​ប្រី​យ៍ ស្រុក​អន្លង់វែង បាន​ឲ្យ​ដឹងថា​លោក ឡាយ គឹម​ឡេង ហៅ​ស្រ៊ុន ជា​អ្នកកាង​ក្រុម​ឈ្មួញ​ក្នុង​ការប្រមូលទិញ​ឈើ​គ្រញូង​ពី​ប្រជាពលរដ្ឋ​ខ្មែរ ដែល​ឆ្លងដែន​ខុសច្បាប់​ចូលទៅ​កាប់​ក្នុង​ទឹកដី​សៀម​។ ហេតុនេះ​ថ្នាក់ដឹកនាំ​កងរាជអាវុធហត្ថ​លើ​ផ្ទៃ​ប្រទេស គួរ​ពិនិត្យឡើងវិញ​ចំពោះ​សកម្មភាព​របស់លោក ឡាយ គឹម​ឡេង ហៅ​ស្រ៊ុន មេបញ្ជាការរង​កងរាជអាវុធហត្ថ​ខេត្តឧត្ដរមានជ័យ ព្រោះ​មន្ត្រី​អាវុធហត្ថ​រូបនេះ កំពុង​ប្រើ​អំណាច​និង​តួនាទី​ការពារ​ឈ្មួញ​ឈើ​គ្រញូង​ដោយ​គ្មាន​ញញើត​អ្វី​ឡើយ​។ ឈ្មួញ​រកស៊ី​ជួញដូរ​ឈើ​គ្រញូង​នៅក្នុង​ខេត្តឧត្ដរមានជ័យ ទាំង​ខ្មែរ​ទាំង​យួន​ត្រូវគេ​ដឹងថា បាន​យក​លោក ឡាយ គឹម​ឡេង ហៅ​ស្រ៊ុន ធ្វើជា​អ្នកកាង​ឬ​អ្នករត់​ការសម្របសម្រួល​ទើប​អាច​គេច​ផុតពី​ការបង្ក្រាប​។ រីឯ​លោក ស ថា​វី អភិបាលខេត្ត​ឧត្ដរមានជ័យ និង​លោក ទៀង ដា​វិ​ទ្យ មេ​រដ្ឋបាល​ព្រៃឈើ​ខេត្តឧត្ដរមានជ័យ ត្រូវ​មជ្ឈដ្ឋាន​នានា​សង្ស័យថា​ទទួលផល​ប្រយោជន៍​ពី​ក្រុម​ឈ្មួញ​ជួញដូរ​ឈើ​ប្រណីត​ខុសច្បាប់ ទើប​បណ្ដោយ​ឲ្យ​ឈ្មួញ​ទាំងនោះ​ធ្វើ​អ្វីៗ​តាម​អំពើ​ចិត្ត​៕

srnews-417 srnews-416 srnews-415