សមត្ថកិច្ច​នគរបាល​ប្រចាំ​កាស៊ីណូ​នានា​ក្នុង​ខេត្ត​ប៉ៃលិន បើកដៃ​ឲ្យ​ពលរដ្ឋ​ខ្មែរ​ចូល​លេងល្បែង​ជា​ថ្នូរ​នឹង​ផលប្រយោជន៍​

មន្ត្រី​អាជ្ញាធរ និង​ប្រជាពលរដ្ឋ​នៅ​ខេត្ត​ប៉ៃលិន បាន​អំពាវនាវ​ឲ្យ​លោក នេ​ត សាវឿន អគ្គស្នងការ​នគរបាល​ជាតិ ពិនិត្យមើល​ភាពមិនប្រក្រតី​ដែល​កើតឡើង​ក្នុង​កាស៊ីណូ​នៅ​ខេត្ត​ប៉ៃលិន​ជាបន្ទាន់ ព្រោះ​សមត្ថកិច្ច​នគរបាល​ប្រចាំ​កាស៊ីណូ​ទាំងនោះ​បើកដៃ​ឲ្យ​ជនជាតិខ្មែរ​ចូល​លេងល្បែង​ដើម្បី​ជា​ថ្នូរ​នឹង​ផលប្រយោជន៍​។ មន្ត្រីរាជការ​ក្នុង​ខេត្ត​ប៉ៃលិន បានបង្ហាញ​នូវ​ការសង្ស័យថា​ម្ចាស់​កាស៊ីណូ និង​សមត្ថកិច្ច​នគរបាល​ប្រចាំ​កាស៊ីណូ​នានា​ឃុបឃិត​គ្នា​ដើម្បី​ផលប្រយោជន៍ ទើប​មានការ​បើកដៃ​ឲ្យ​ជនជាតិខ្មែរ​ចូល​ល្បែងស៊ីសង​ក្នុង​កាស៊ីណូ​។ ទង្វើ​បែបនេះ​គឺ​បំពាន​លើ​បម្រាម​របស់​ក្រសួងមហាផ្ទៃ​យ៉ាង​គឃ្លើន ដូច្នេះ​លោក នេ​ត សាវឿន អគ្គស្នងការ​នគរបាល​ជាតិ មិនត្រូវ​មើលរំលង​តទៅទៀត​ទេ​។

ប្រភពពី​មន្ត្រី​អាជ្ញាធរខេត្ត​ប៉ៃលិន បាន​ឲ្យ​ដឹងថា ទាំងថ្ងៃទាំងយប់​នៅតាម​កាស៊ីណូ​ក្នុង​ខេត្ត​ប៉ៃលិន ជាពិសេស​នៅ​ច្រក​អន្តរជាតិ​ព្រំ ភូមិ​ផ្សារ​ព្រំ ឃុំ​ស្ទឹង​កាច់ ស្រុក​សាលា​ក្រៅ គឺ​ថៅកែ​កាស៊ីណូ​បាន​បើកដៃ​ឲ្យ​ជនជាតិខ្មែរ​ចូល​លេងល្បែង​យ៉ាង​គគ្រឹកគគ្រេង ហើយ​សមត្ថកិច្ច​នគរ​បាល​ប្រចាំ​កាស៊ីណូ​ទាំងនោះ មិន​ហាមឃាត់​ឡើយ​។ កាស៊ីណូ​ដែល​បើក​ឲ្យ​ជនជាតិខ្មែរ​ចូល​លេងល្បែង​តាម​អំពើ​ចិត្ត​មានដូចជា កាស៊ីណូ​ក្រោ​ន​វិច​តូ​រី​យ៉ា​, កាស៊ីណូ​កាឡាក់ស៊ី​ហ្គោល​ហូ​ថែ​ល​, កាស៊ីណូ​ប៉ៃលិន​ផ្លា​មីង​ហ្គោល​, កាស៊ីណូ​ចា​ស្មី​ន និង​កាស៊ីណូ​ឡាក់​គី​ដាយ​មីន​ក្រោ​ន​ជាដើម​។ ក្នុង​កាស៊ីណូ​ទាំងនេះ​មាន​ជនបរទេស​ចូល​លេងល្បែង​តែ​ប្រមាណ​៥០​ភាគរយ​ប៉ុណ្ណោះ ក្រៅពីនេះ​គឺជា​ជនជាតិខ្មែរ ដែលជា​ការបំពាន​លើ​បទបញ្ជា​របស់​ក្រសួងមហាផ្ទៃ​យ៉ាង​គឃ្លើន ហើយ​កំពុង​ធ្វើ​ឲ្យ​ប៉ះពាល់​ដល់​សន្តិសុខ​សង្គម​ផងដែរ​។

ប្រភពពី​ប្រជាពលរដ្ឋ​នៅ​ខេត្ត​ប៉ៃលិន មួយចំនួន​បាន​ឲ្យ​ដឹងថា លោក ជា ចាន់​ឌិន ស្នងការ​នគរបាល​ខេត្ត​ប៉ៃលិន បានដឹង​យ៉ាងច្បាស់​អំពី​ករណី​កាស៊ីណូ​តាម​ព្រំដែន​ក្នុង​ខេត្ត​ប៉ៃលិន បើកដៃ​ឲ្យ​ជនជាតិខ្មែរ​ចូល​លេង​យ៉ាង​ពេញបន្ទុក ប៉ុន្តែ​លោកស្នងការ​មិន​ចាត់វិធានការ​ទប់ស្កាត់​នោះទេ​។ បញ្ហា​នេះ​បានធ្វើ​ឲ្យ​ពលរដ្ឋ​ខ្មែរ​មួយចំនួន​ចាញ់ល្បែង​ក្នុង​កាស៊ីណូ​ទាំងនោះ អ្នកខ្លះ​លក់​អស់ទ្រព្យ​សម្បត្តិ​ដីធ្លី​ផ្ទះសម្បែង រថយន្ត​និង​ម៉ូតូ ដោយសារតែ​ចាញ់ល្បែង និង​កើតមាន​អំពើហិង្សា​ក្នុង​គ្រួសារ​ទៀតផង​។ ហេតុនេះហើយ​ទើប​ពលរដ្ឋ​ក្នុង​ខេត្ត​ប៉ៃលិន អំពាវនាវ​ឲ្យ​ថ្នាក់ដឹកនាំ​ក្រសួងមហាផ្ទៃ ក៏ដូចជា​លោក នេ​ត សាវឿន អគ្គស្នងការ​នគរបាល​ជាតិ ចាត់វិធានការ​ទប់ស្កាត់​ជាបន្ទាន់ ធ្វើយ៉ាងណា​កុំ​ឲ្យ​មាន​ពលរដ្ឋ​ខ្មែរ​ចូល​លេង​ល្បែងស៊ីសង​ក្នុង​កាស៊ីណូ​តាម​តំបន់​ព្រំដែន​ក្នុង​ខេត្ត​ប៉ៃលិន​យ៉ាង​ពេញបន្ទុក​តទៅទៀត​៕

image901លោក នេត សាវឿន អគ្គស្នងការនគរបាលជាតិ aes-1-13