ពលរដ្ឋខ្មែរ៤នាក់​ចូលកាប់ឈើក្រញូងនៅទឹកដីថៃ តាមច្រកពាមតា ត្រូវបានបញ្ជូនទៅដល់ស្នងការខេត្តត្រាតហើយ

(បាត់ដំបង)៖ ពលរដ្ឋខ្មែរ៤នាក់ ដែលត្រូវបានទាហានឈុតខ្មៅរបស់ថៃ ចាប់ខ្លួនពេលចូលទៅកាប់ឈើក្រញូងកាលពីថ្ងៃម្សិលមិញ ត្រូវបានបញ្ជូនទៅដល់ស្នងការដ្ឋាននគរបាល ខេត្តត្រាតហើយ នៅថ្ងៃទី២៧ ខែសីហា ឆ្នាំ២០១៦ ដើម្បីបន្តការសួរនាំ និងចាត់ការតាមច្បាប់។

សូមបញ្ជាក់ថា ពលរដ្ឋខ្មែរទាំង៤នាក់នេះ ដែលសុទ្ធតែយុវជនពេញកម្លាំង ត្រូវបានទាហានឈុតខ្មៅថៃបានចាប់ខ្លួននៅក្នុងព្រៃភ្នំ នៅរសៀលថ្ងៃទី២៦ ខែសីហា ឆ្នាំ២០១៦ ស្ថិតនៅភូមិថាគុំ ឃុំខៅស្មីង ស្រុកមឿងខេត្តត្រាត ជាទីដែលពួកគេកាប់ និងអារឈើក្រញូង។

ពលរដ្ឋខ្មែរទាំងនេះ បានឆ្លងទៅកាប់ក្រញូងនៅទឹកដីខេត្តត្រាត ប្រទេសថៃ តាមម្តុំច្រកពាមតា ស្រុកសំឡូត ខេត្តបាត់ដំបង។

យោងតាមសមត្ថកិច្ចដែលយាមតាមព្រំដែនបានឲ្យដឹងថា ក្រោយមានករណីនេះកើតឡើង ខាងភាគីកម្ពុជា បានទំនាក់ទំនងទៅភាគីថៃប្រចាំច្រកថាសេន (ទល់មុខច្រកថ្មដា) ហើយពួកគេប្រាប់ថា នៅថ្ងៃអង្គារ៍ខាងមុខនេះ នឹងប្រគល់ឲ្យភាគីកម្ពុជាវិញតាមច្រក400 ស្រុក សំឡូតខេត្តបាត់ដំបង៕ 

ប្រភព ៖
freshnews

កំណត់ហេតុខ្មែរឡូត៖ 

ដោយឡែក ករណីមួយផ្សេងទៀត កាលពីលើកមុន  ក្រុមមន្រ្តីយោធា ដែលឈរជើងនៅជាប់ព្រំដែន ប្រទេសថៃក្នុងទឹកដីខេត្តឧត្តរមានជ័យ ត្រូវគេរាយការណ៍មកថា នៅតែបានបន្តដឹកនាំកម្លាំងរបស់ប្រជាពលរដ្ឋខ្មែរជាច្រើននាក់ ឡើងភ្នំចូលទៅកាប់ និងអូសឈើក្នុងទឹកដីថៃ ដើម្បីយកមកលក់ ឲ្យពួកគេ ក្នុងការនាំចេញទៅក្រៅប្រទេស។

ជាក់ស្តែងកាលពីថ្មីៗនេះប្រជាពលរដ្ឋខ្មែរជាង៤០នាក់ ដែលឡើងភ្នំតាមច្រកអូរខ្សាច់ ក្នុងឃុំទំនប់ដាច់ ស្រុកត្រពាំងប្រាសាទ បានប្រាប់ថា ពួកគាត់ឡើងភ្នំចូលទឹកដីថៃ ដើម្បីអូសឈើក្រញូងឱ្យឈ្មោះ ព្រាប សារិន ជាមន្រ្តីយោធា ដែលឈរជើងនៅតំបន់អូរឬស្សី និងច្រកអូរខ្សាច់ខាងលើនេះ។

ប្រជាពលរដ្ឋម្នាក់ សុំមិនបញ្ចេញឈ្មោះ ដែលរស់នៅ ភូមិទួលចារ ឃុំទំនប់ដាច់ ស្រុកត្រពាំងប្រាសាទ បាននិយាយថា ឈ្មោះ ព្រាប សារិន ជាមេខ្យល់នាំកម្លាំងពលរដ្ឋខ្មែរ ឆ្លងដែន រកកាប់ឈើក្រញូង ក្នុងទឹកដីថៃ ហើយសកម្មភាពនេះ បើគ្មានមន្រ្តីយោធាឈរជើងនៅទីនោះផ្តល់ភ្លើងខៀវនោះទេ ក៏ប្រជាពលរដ្ឋមិនអាចនាំកម្លាំងពលរដ្ឋខ្មែរ ឆ្លងដែនបាននោះទេ។

ប្រជាពលរដ្ឋខ្មែរម្នាក់ទៀត ក៏បានឲ្យដឹងផងដែរ ខ្លួនធ្លាប់ឡើងភ្នំអូសឈើក្រញូងក្នុងទឹកដីថៃចំនួន២ដងមកហើយដោយមានឈ្មោះ ព្រាប សារិន ជាអ្នកនាំផ្លូវ ហើយពេលទម្លាក់ឈើមកដល់ដីកម្ពុជា មានថៅកែស្រីម្នាក់ មិនស្គាល់ឈ្មោះនៅជិតផ្សារទំនប់ដាច់ ឃុំទំនប់ដាច់ ស្រុកត្រពាំងប្រាសាទ ចាំទិញឈើទាំងនោះ។

បើតាមការលួចបង្ហើបពីសមត្ថកិច្ចខ្លះ ថៅកែស្រីជាឈ្មួញចាំទិញឈើក្រញូង នៅចំណុចអូរខ្សាច់ និងអូរឬស្សីនោះ គឺជាប្រពន្ធរបស់មន្ត្រីប្រដាប់អាវុធ ក្នុងស្រុកត្រពាំងប្រាសាទម្នាក់ឈ្មោះ មាស ចន្ថា ដែលកន្លងមកក៏មាន បញ្ហារអ៊ូរទាំ ពីអ្នកដឹកឈើក្រញូងតាមម៉ូតូ និងតាមរថយន្តកាមរី បន្តិចបន្តួច ក៏ត្រូវលោក មាស ចន្ថា ចាប់រឹបអូសទាំងរថយន្ត និងម៉ូតូ ដោយសារតែមិនលក់ឱ្យប្រពន្ធរបស់ខ្លួន។ មានពលរដ្ឋខ្មែរមួយចំនួន ដែលស្ពាយឈើក្រញូងមកពីទឹកដីថៃ តាមច្រកអូរខ្សាច់ ដែលមិនលក់ឱ្យថៅកែស្រីខាងលើនេះ ក៏ត្រូវចាប់រឹបអូសយកឈើផងដែរ។

ជាមួយគ្នានេះ ក៏មានឈ្មួញជាជនជាតិវៀតណាម២នាក់ ទី១.ឈ្មោះ យាយម៉ាយ ដែលឈរជើងចាំទិញឈើក្រញូង ប្រចាំការនៅស្រុកអន្លង់វែង និងឈ្មួញជនជាតិវៀតណាមម្នាក់ទៀតឈ្មោះ ទូ ដែលឈើជើងចាំទិញឈើ នាងនួន និងឈើក្រញូង នៅចំណុចក្បាលទន្សោង ដែលជាភូមិសាស្រ្តឈរជើងរបស់យោធារបស់វរសេនាតូចការពារព្រំដែនគោកលេខ៤០៣ ហើយមិនដែលមានអាជ្ញាធរ និងសមត្ថកិច្ចខាងណាហ៊ានធ្វើការបង្ក្រាប និងទប់ស្កាត់នោះទេ៕

ខ្មែរឡូត

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 093868723 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 093868723 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload