ភ្ញាក់ផ្អើល! រកឃើញផ្លែសន្ទូចបុរាណ ចាស់ជាងគេបំផុតក្នុងពិភពលោក នៅកោះអូគីណាវ៉ា ប្រទេសជប៉ុន អាយុកាលជាង២ម៉ឺនឆ្នាំ

ជប៉ុន៖ កាលពីពេលថ្មីៗកន្លងទៅនេះ ផ្លែសន្ទូចបុរាណចំនួនពីរផ្លែ ដែលមានអាយុកាលរាប់ម៉ឺនឆ្នាំ ត្រូវបានជីករកឃើញនៅក្នុងគុហា ឬល្អាងរូងថ្មកំបោរមួយកន្លែង ដែលមានទីតាំងស្ថិតនៅលើ កោះអូគីណាវ៉ា ព្រំប្រទល់រវាងប្រទេសជប៉ុន និងកោះតៃវ៉ាន់ ដែលវាក៏ជាទីតាំងមួយត្រូវបានស្គាល់ថា មនុស្សសម័យដើមរស់នៅទី នោះអស់ជិត ៣០,០០០ឆ្នាំមុនឯណោះ។

បើតាមប្រភពបានឲ្យដឹងថា ផ្លែសន្ទូចបុរាណចំនួន២ផ្លែ ដែលជាឧបករណ៍នេសាទ ដ៏ពេញនិយមមួយនាសម័យដើមទំនើបនោះ មានអាយុកាលរហូតដល់ទៅជិត ២៣,០០០ឆ្នាំ ដោយត្រូវបានក្រុមអ្នកបុរាណវិទូ ជនជាតិជប៉ុន បានជីករកឃើញ នៅក្នុងល្អាងរូងថ្ម Sakitari Cave ដែលវាធ្វើឡើងពីសំបកខ្យងសមុទ្រ ក្នុងនោះមានផ្លែសន្ទូចមួយត្រូវបានធ្វើរួចរាល់ រីឯផ្លែសន្ទូចមួយទៀត មិនទាន់បានធ្វើហើយរួចរាល់នៅឡើយនោះទេ។

គួរឲ្យដឹងថា តាមរយៈអ្នកជំនាញ បានធ្វើការពិនិត្យទៅលើបំណែក នៃធ្យូងដែលបានរកឃើញនៅក្នុងស្រទាប់ ឧបករណ៍នេសាទបុរាណទាំងពីរនេះ បានបញ្ជាក់ប្រាប់ថា ផ្លែសន្ទូចទាំងពីរមានអាយុកាល ចន្លោះពី ២២,៣៨០ឆ្នាំ ដល់ ២២,៧៧០ឆ្នាំ ជាឧបករណ៍ប្រើសម្រាប់ចាប់ក្តាម និងខ្យងដែលរស់នៅក្នុងទឹកសាប។

ការរកឃើញនេះដែរ ត្រូវបានគេចាត់ទុកថា ជារបស់ក្នុងទឹកដែលមានអាយុកាល ច្រើនជាងគេបំផុតក្នុងពិភពលោកថែមទៀតផង។

គួររំលឹកថា ក៏ធ្លាប់មានឧបករណ៍ដែលបានរកឃើញស្រដៀងគ្នានេះដែរ នៅទីម័រខាងកើត ស្ថិតក្នុងតំបន់អាស៊ីអាគ្នេយ៍ មានអាយុកាលប្រមាណត្រឹមតែ ១៦,០០០ឆ្នាំប៉ុណ្ណោះ និងមួយទៀតនៅក្នុងប្រទេសប៉ាពូអាស៊ីនូវែលហ្គីណេ ត្រូវបានរកឃើញមានអាយុកាលចន្លោះពី ១៨,០០០ឆ្នាំ ទៅ ២០,០០០ឆ្នាំមុនផងដែរ។ នេះបើយោងតាមប្រភពសារព័ត៌មាន Science Mag បានផ្សាយ៕ 

ប្រភព ៖

កំណត់ហេតុខ្មែរឡូត៖

គួររំលឹកព័ត៌មានចាស់ដែរថា ។ អ្នកវិទ្យាសាស្រ្ត បានធ្វើការស្រាវជ្រាវរកឃើញថា ព្រះចៅ Tut ធ្លាប់បានប្រើប្រាស់កាំបិតស្នៀតមួយ ដែលធ្វើឡើងពីអាចម៍ផ្កាយ (Meteorite) អំឡុងពេលនៃការគ្រប់គ្រងរបស់ទ្រង់។

បើតាមប្រភពសារព័ត៌មាន បានឲ្យដឹងថា ព្រះចៅ Tutankhamun ដែលគេស្គាល់ថា ជាបរមនាមនៃក្សត្រអេហ្ស៊ីបបុរាណ ឬប្រជានុរាស្រ្តតែងស្គាល់ និងហៅព្រះនាមទ្រង់ថា Tut គឺជាក្សត្រវ័យក្មេង និងល្អអស្ចារ្យបំផុត ក្នុងយុគសម័យកាលនោះ។ តាមរយៈព្រះជីវប្រវត្តិខ្លះៗទាក់ទងទៅនឹងទ្រង់ គេអាចដឹងថា ចាប់តាំងពីទ្រង់មានព្រះជន្ម ៩ព្រះវស្សាមក ទ្រង់មានការសង្វាតខិតខំបំពេញកិច្ចព្រះរាជសិក្សាខ្លាំងណាស់ និងថែមទាំងជាអ្នកចាប់ផ្តើម ចេញច្បាប់គ្រប់គ្រងអេហ្ស៊ីបុរាណផងដែរ។ ក្នុងព្រះជន្មាយុ ១០ព្រះវស្សា ទ្រង់បានឡើងសោយរាជ្យពេញទី គ្រប់គ្រងអេហ្ស៊ីបទាំងមូល រហូតដល់ទ្រង់យាងចូលព្រះទីវង្គត់ ក្នុងព្រះជន្មាយុ ១៩ព្រះវស្សា ទាំងវ័យក្មេងបំផុត។

បច្ចុប្បន្នប្រភពមួយចំនួនបានធ្វើការចេញផ្សាយថា ផ្អែកតាមការសិក្សាថ្មីដោយអ្នកជំនាញផ្នែកទស្សាវដ្តវិទ្យាសាស្រ្តទាក់ទងភពផែនដី និងអាចម៍ផ្កាយ បានបង្ហាញឲ្យឃើញថា ស្តេចវ័យក្មេង Tut ទំនងជាប្រើប្រាស់កូនកាំបិតស្នៀតធ្វើអំពីអាចម៍ផ្កាយ ក្នុងអំឡុងសម័យដែលទ្រង់ឡើងសោយរាជ្យ។

កូនកាំបិតស្នៀតនោះ ត្រូវបានអ្នកវិទ្យាសាស្រ្តជាច្រើនជឿជាក់ថា ជាកាំបិតស្នៀតដែលទ្រង់ប្រើប្រាស់ ធ្វើឡើងពីសារធាតុដែកនៃអាចម៍ផ្កាយ ដែលត្រូវបានបញ្ចុះជាមួយព្រះកាយរបស់ទ្រង់ក្នុងផ្នូរបុរាណនៅពេលសោយទីវង្គត។

គួររំលឹកថា កាលពីមុន តាមរយៈសាកលវិទ្យាល័យ Pisa ក៏ធ្លាប់បានធ្វើការពិភាក្សាដែរ ពីសំណាក់អ្នកប្រាជ្ញល្បីៗជាច្រើន ដើម្បីចង់ដឹងពីប្រភពដើមនៃកូនកាំបិតស្នៀតនោះ។ ប៉ុន្តែជាលទ្ធផល នៅតែមិនអាចទទួលយកជាការបាន។ ទើបតែពេលថ្មីៗនេះ អ្នកស្រាជ្រាវបានប្រើប្រាស់កាំរស្មីអិុច (X) ដើម្បីធ្វើការវិភាគចង់ដឹងពីការពិត នៃកាំបិតស្នៀតមួយនេះ ហើយជាលទ្ធផលបង្ហាញថា មានភាគរយខ្ពស់ ដែលកាំបិតនេះផលិតឡើងពីអាចម៍ផ្កាយ ដោយក្នុងនោះមានលោហៈធាតុគីមីម្យ៉ាង ដែលហៅថានីកែល រួមជាមួយនឹងលោហធាតុម្យ៉ាងទៀតហៅថា កូប័ល និងផូស្វ័រ និងមានលាយបញ្ចូលជាមួយវត្ថុធាតុដើមជាច្រើនប្រភេទទៀត។ កាំបិតនេះ មានអាយុកាលចន្លោះពី ៤,០០០ ទៅ ៣,០០០ ឆ្នាំ​មុនគ្រឹស្ករាជ។

យ៉ាងណាមិញ បើយោងតាមការសិក្សាស្រាវជ្រាវនេះ មិនមែនទើបតែជាករណីមួយ ក្នុងចំណោមវត្ថុបុរាណ របស់អេហ្ស៊ីបបុរាណឡើយ ព្រោះថាក្នុងយុគសម័យនោះ វត្ថុបុរាណមួយចំនួន ក៏ត្រូវបានគេរកឃើញថា ធ្វើឡើងពីដែកនៃអាចម៍ផ្កាយដែរ។

គួរបញ្ជាក់ថា អ្វីដែលគួរឲ្យចាប់អារម្មណ៍ និងកត់សម្គាល់បន្ថែមទៀតនោះ គឺគេបានរកឃើញវត្ថុកប់ក្នុងផ្នូររបស់ទ្រង់ (ស្តេច Tut) ដែលជាខ្សែក មានរូបរាងដូចជាប្រភេទសត្វកំភេមផងដែរ ដែលអ្នកវិទ្យាសាស្រ្តជឿជាក់ថា ធ្វើឡើងពីកញ្ជក់កែវ។

ចំណែកវត្ថុបុរាណកាំបិតស្នៀតវិញ បច្ចុប្បន្នត្រូវបានដាក់តាំងបង្ហាញនៅឯសារមន្ទីរជាតិអេហ្ស៊ីប នៅក្នុងទីក្រុង Cairo ៕

ខ្មែរឡូត

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 093868723 (៨-១១ព្រឹក & ១-៥ល្ងាច) (2) អ៊ីម៉ែល
(3) LINE, VIBER: 093868723 (4)
តាមរយៈទំព័រហ្វេសប៊ុកខ្មែរឡូត

ភ្ញាក់ផ្អើល! រកឃើញផ្លែសន្ទូចបុរាណ ចាស់ជាងគេបំផុតក្នុងពិភពលោក នៅកោះអូគីណាវ៉ា ប្រទេសជប៉ុន អាយុកាលជាង២ម៉ឺនឆ្នាំ

ភ្ញាក់ផ្អើល! រកឃើញផ្លែសន្ទូចបុរាណ ចាស់ជាងគេបំផុតក្នុងពិភពលោក នៅកោះអូគីណាវ៉ា ប្រទេសជប៉ុន អាយុកាលជាង២ម៉ឺនឆ្នាំ