បញ្ជូន​ពលរដ្ឋ​ខ្មែរ​ជា​អ្នក​សុំទាន​-​លក់​ឆ្នោត​26​នាក់​ពី​ប្រទេស​វៀតណាម

រាជធានី​ភ្នំពេញ ៖ យោង​តាម​ការ​ប្រកាស​ឱ្យ​ដឹង​ពី​លោក ជុំ សុន្ទរី អ្នកនាំពាក្យ​ក្រសួងការបរទេស និង​សហប្រតិបត្តិការ​អន្តរជាតិ​ថ្ងៃ​ទី​២៣ កញ្ញា បានឱ្យ​ដឹង​ថា ស្ថាន​អគ្គ​កុងស៊ុល​កម្ពុជា​ប្រចាំ​ទីក្រុង​ហូ​ជី​មិ​ញ ប្រទេស​វៀតណាម បាន​ផ្តល់​ព័ត៌មាន​ថា ពលរដ្ឋ​ខ្មែរ​២៦​នាក់​(​ប្រុស​១១​នាក់ ស្រី្ត​១៥​នាក់​) ក្នុង​នោះ​មនុស្ស​ចាស់​៧​នាក់ និង​កុមារ​១៩​នាក់ ដែល​ចូល​ទៅ​សុំទាន​និង​លក់​ឆ្នោត​ខុសច្បាប់​ក្នុង​ប្រទេស​វៀតណាម ត្រូវ​បាន​អាជ្ញាធរ​វៀតណាម​ឃាត់ខ្លួន ប្រមូលផ្តុំ និង​ផ្គត់ផ្គង់​អាហារ​នៅ​ក្នុង​មជ្ឈមណ្ឌល​សង្គ្រោះ​សង្គមកិច្ច​ទីក្រុង​ហូ​ជី​មិ​ញ ។ ក្នុង​ចំណោម​ពលរដ្ឋ​ទាំងនោះ ២៤​នាក់ មានស្រុក​កំណើត​នៅ​ខេត្តស្វាយរៀង ម្នា​ក់់មក​ពី​ខេត្តកណ្តាល និង​ម្នាក់​ទៀត​មក​ពី​ខេត្តកំពង់ស្ពឺ ។

មន្ត្រី​ស្ថាន​អគ្គ​កុងស៊ុល បាន​សួរសុខទុក្ខ​ពលរដ្ឋ​ខ្មែរ​ទាំង​២៦​នាក់ ហើយ​សហការ​ជាមួយ​មន្ទីរ​សង្គមកិច្ច​ទីក្រុង​ហូ​ជី​មិ​ញ និង​មន្ទីរ​សង្គមកិច្ច​ខេត្តស្វាយរៀង គ្រោង​ធ្វើ​មាតុភូមិនិវត្តន៍​ពួក​គេ​មក​កម្ពុជា​វិញ នៅ​ថ្ងៃ​ទី​២៧ កញ្ញា ឆ្នាំ​២០១៦ តាម​ច្រក​ទ្វារ​ព្រំដែន​អន្តរជាតិ​ម៉ុ​កបាយ​-​បា​វិត ដើម្បី​ប្រគល់​ជូន​មន្ទីរ​សង្គមកិច្ច​ខេត្តស្វាយរៀង ។

សូម​បញ្ជាក់​ថា គិត​ត្រឹម​ខែកញ្ញា ឆ្នាំ​២០១៦​នេះ មាន​ពលរដ្ឋ​ខ្មែរ​ចូល​ទៅ​ប្រកប​របរ​សុំទាន និង​លក់​ឆ្នោត​ខុសច្បាប់​ត្រូវ​បាន​អាជ្ញាធរ​វៀតណាម​ឃាត់ខ្លួន សរុប​ចំនួន​១៦៨​នាក់ (​គិត​ទាំង​លើក​នេះ​ផង​) ។

ចំណែក​នៅ​ប្រទេស​ថៃ​វិញ ស្ថាន​ឯកអគ្គរាជទូត​កម្ពុជា​ប្រចាំ​ប្រទេស​ថៃ បាន​រាយការណ៍​ជូន​ក្រសួងការបរទេស និង​សហប្រតិបត្តិការ​អន្តរជាតិ ពី​ការ​ដោះស្រាយ​បញ្ហា​ពាក់ព័ន្ធ​នឹង​ករណី​ពលករ​ខ្មែរ​១៩​នាក់ ត្រូវ​ចាប់​ឃុំខ្លួន​នៅ​ខេត្ត​ណា​រ៉ា​ធី​វ៉ា​ត់ (Narathiwat) កាលពី​ថ្ងៃ​ទី​៧ មិថុនា ២០១៦ ពី​បទ​ចូល​មក​ប្រទេស​ថៃ និង​ធ្វើការ​ខុសច្បាប់ ។

-​ក្រោយ​ពី​មាន​អន្តរាគមន៍​ពី​ស្ថានទូត​ឲ្យ​ដោះ​លែង​ពលករ​ទាំងនេះ ដោយសារ​ពួក​គាត់​ជា​ជន​រង​គ្រោះ​ចាញ់បោក​មេខ្យល់ ពលករ​១៨​នាក់ ក្នុង​ចំណោម​ពលករ​ខាងលើ ត្រូវ​បាន​ផ្ទេរ​ទៅ​មន្ទីរ​ថែរក្សា​ជន​រង​គ្រោះ​ពី​ការ​ជួញដូរ​មនុស្ស ខេត្ត​ណា​រ៉ា​ធី​វ៉ា​ត់ ។

ដោយឡែក​កាលពី​ថ្ងៃ​ទី​២០ កញ្ញា ២០១៦ ស្ថានទូត​បាន​ចាត់​លោក ជៀម ឡា​ម៉ា​ទី​ន ទីប្រឹក្សា​ពលករ​ទៅ​ជួប​ជាមួយ​លោក​ឧត្តមសេនីយ៍ឯក Sanit Mahathavorn ស្នងការ​ស្តីទី​ប៉ូលិស​ក្រុង​បាងកក ដែល​ជា​អ្នក​ទទួលខុសត្រូវ​ចាត់វិធានការ​លើ​ករណី​ជួញដូរ​មនុស្ស​ខាងលើ​នេះ ដើម្បី​ស្នើ​សុំ​ជំរុញ​ដំណើរការ​កាត់​កី្ត​ឲ្យ​ជន​រង​គ្រោះ​ឆាប់​បាន​វិល​ត្រឡប់​ទៅ​ស្រុក​វិញ ៕

ប្រភព ៖

កំណត់ហេតុខ្មែរឡូត៖ ដោយឡែក ករណីមួយផ្សេងទៀត កាលពីលើកមុន ក បម្រុងលោតឆ័ត្រមកកាន់ ព្រំដែនកម្ពុជានាខេត្តស្រះកែវ។

យោងតាមរបាយការណ៍របស់ក្រុមតម្រួតថៃ ដែលបានប្រាប់យោធាខ្មែរ បានឲ្យដឹងថា នៅវេលាម៉ោង៣ រសៀល ថ្ងៃទី១៧ ខែកញ្ញា ឆ្នាំ២០១៦ អង្គភាពរបស់ស្ថានីយ៍តម្រួតថៃប្រចាំខេត្ត ប្រាជីនបុរី បានទទួលព័ត៌មានមួយពី សំណាក់ទាហានជួរមុខតាមបន្ទាត់ព្រំដែន ស្តីពីការដឹកឈើក្រញូងរបស់រថយន្ត ចំនួន ៣គ្រឿង ដែលកំពុងបើកបរតាមបណ្តោយ ផ្លូវសុវណ្ណាខន ឆ្ពោះទៅកាន់ខេត្តស្រះកែវ ។

ក្រោយពីទទួលបានព័ត៌មាននេះភ្លាម កម្លាំងបានបោះដៃ ទាក់ទង ទៅកាន់ស្ថានីយ៍តម្រួតខ្លងមី ប្រចាំស្រុកមឿង ខេត្តស្រះកែវ ដើម្បីដាក់បារ៉ាស់ស្កាត់ មិនអោយរថយន្តនេះគេចបាន ព្រមទាំងបានផ្តល់សញ្ញា អោយរថយន្តទាំង ៣គ្រឿងនេះ ឈប់ដើម្បីធ្វើការត្រួតពិនិត្យ នៅត្រង់ចំណុចខាងមុខ មន្ទីរពេទ្យវឌ្ឍនាណាក់ខន ។  

ផ្ទុយទៅវិញ គឺមានរថយន្តមួយគ្រឿង ក្នុងចំណោមរថយន្តទាំង ៣គ្រឿងនោះ ម៉ាក Vigo ពណ៌ខ្មៅ ពាក់ស្លាកលេខ បាងកក ៧៣៦៩ បានបើករត់ដោយបានបំពាន ទៅលើបារ៉ាស់ ដែលក្រុមតម្រួតដាក់កាត់ផ្លូវ ធ្វើអោយកង់រថយន្តត្រូវបែកមិនអាចបើកបរទៅមុខទៀតបាន ទើបអ្នកបើកបរដ៏វ័យក្មេង និងទើបតែមានអាយុ ១៨ឆ្នាំ បានបើកទ្វារអោយកម្មករខ្មែរចំនួន៦នាក់ ដែលជិះនៅក្នុងរថយន្ត រត់គេចខ្លួនតែមិនអាចគេខផុតបានទេ គឺត្រូវសមត្ថកិច្ចឃាត់ខ្លួន បានទាំងអស់លើកលែងតែ អ្នកបើកបររថយន្តចំនួន ពីរគ្រឿងដែលឈប់ សំចតត្រឹមត្រូវនោះ បានរត់គេចខ្លួន បាត់ស្រមោល ។

ក្រោយពេលបញ្ចប់កិច្ចប្រតិបត្តិការ ក្រុមតម្រួតបានយកត្រាក់ទ័រ មកអូសយករថយន្ត ដែលបែកកង់ទៅកាន់ស្ថានីយ៍ តម្រួតខេត្តស្រះកែវ ព្រមទាំងបានពិនិត្យឃើញថា រថយន្ត ទាំងនេះមានផ្ទុកឈើគ្រញូង សរុបមានចំនួន ៣៣ កំណាត់ ដោយអ្នកបើកបរវ័យក្មេង រូបនោះបានសារភាពថា ការដឹកឈើគ្រញូងនេះគឺខ្លួនគ្រាន់តែជាអ្នកសុីឈ្នួលបើករថយន្ត អោយថៅកែធំ ដែលជាឈ្មួញឈើតែប៉ុណ្ណោះ គឺបានទទួលកម្រៃក្នុងមួយជើង ១មុឺនបាត ចំណែកកម្មករខ្មែរទាំង៦នាក់ ក៏ជាអ្នកសុីឈ្នួលចូលទៅក្នុង តំបន់ហាមឃាត់ដើម្បីកាប់ឈើ ក្រញូងនោះដែរ ដើម្បីទទួលបានប្រាក់ បន្តិចបន្ទួចគ្រាន់ចិញ្ចឹមជីវិត។

បច្ចុប្បន្នកម្មករខ្មែរទាំង ៦នាក់ ត្រូវបានក្រុមតម្រួតថៃ ប្រគល់ទៅអោយជំនាញ ដើម្បីចាត់វិធានការតាមផ្លូវច្បាប់៕

ខ្មែរឡូត

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 093868723 (៨-១១ព្រឹក & ១-៥ល្ងាច) (2) អ៊ីម៉ែល
(3) LINE, VIBER: 093868723 (4)
តាមរយៈទំព័រហ្វេសប៊ុកខ្មែរឡូត

បញ្ជូន​ពលរដ្ឋ​ខ្មែរ​ជា​អ្នក​សុំទាន​-​លក់​ឆ្នោត​26​នាក់​ពី​ប្រទេស​វៀតណាម

បញ្ជូន​ពលរដ្ឋ​ខ្មែរ​ជា​អ្នក​សុំទាន​-​លក់​ឆ្នោត​26​នាក់​ពី​ប្រទេស​វៀតណាម

បញ្ជូន​ពលរដ្ឋ​ខ្មែរ​ជា​អ្នក​សុំទាន​-​លក់​ឆ្នោត​26​នាក់​ពី​ប្រទេស​វៀតណាម