វិធីជួយឱ្យគេងលក់បានស្កប់ស្កល់

6 Videos


ដំណេកគឺជារឿងសំខាន់បំផុតសម្រាប់សុខភាព និង ផាសុកភាពប្រចាំថ្ងៃ ។ ប្រសិនបើអ្នកគេងពុំស្រួល ឬ ពុំគ្រប់គ្រាន់ទេនោះ អ្នកអាចនឹងមិនមានកម្លាំងកំហែងសម្រាប់បំពេញការងារ ឬ អារម្មណ៍មិនជ្រះស្រលះពេញមួយថ្ងៃ ហើយអាចនឹងមានសភាពភាំងៗ មិនរវាសរវៃ រហូតដល់កើតជាស្ត្រេស៍ទៀតក៏មាន ។ ហេតុនេះហើយ យើងសូម
ណែនាំវិធី ៥ យ៉ាងដើម្បីកែខៃបញ្ហាដំណេកឱ្យបានប្រសើរឡើង ។

វិធីទី១ ៖ វិធីជួយឱ្យគេងឆាប់លក់
– ងូតទឹកក្តៅនៅពេលល្ងាច ដើម្បីឱ្យរាងកាយធូរស្រាលពីការនឿយហត់ក្រោយពេលបំពេញការងារពេញមួយថ្ងៃ
– គេងដោយមិនស្លៀកពាក់ខោអាវ ៖ ការគេងបែបនេះ ជួយរក្សាសីតុណ្ហភាពរាងកាយបានល្អ ហើយមានផាសុកភាពជាមួយនឹងខ្នើយ ពូក ភួយ ជាងគេងមានសម្លៀកបំពាក់ ។ ប្រសិនបើអាកាសធាតុមិនត្រជាក់ពេកទេនោះ ពេលគេងគួរដាក់ដៃក្រៅភួយ ហើយដណ្តប់ភូយពាក់កណ្តាលខ្លួនចុះក្រោម ។
– ប្រែប្រួលខ្លួនចុះឡើង កុំគេងតែមួយកន្លែង ៖ ធ្វើបែបនេះ អ្នកនឹងអាចគេងឆាប់លក់ជាងសព្វមួយដង ប៉ុន្តែកុំគេងផ្កាប់មុខ ។ ប្រសិនបើអ្នកឈឺខ្នង អាចសាកល្បងកុំកើយខ្នើយ ហើយយកខ្នើយមកល់ចង្កេះវិញ ។
– ប្រើខ្នើយដែលស្រួលកើយ មិនស្បតពេក មិនប៉ោងពេក ហើយមានខ្នើយឱប ឬ ខ្នើយកល់ជើង ឬ ផ្អែកខ្នង ។
– បិតភ្លើង ឬ ប្រើភ្លើងព្រឹមៗនៅពេលចូលគេង ឬ ពាក់ម៉ាសបិតភ្នែកតែម្តង ។
– សំឡេងក៏ជាជំនួយដែរ ដូចនេះ គួរស្តាប់ភ្លេង ឬ បើកបង្អួចស្តាប់សូរសត្វរាត្រីយំនៅពេលយប់ នោះអ្នកនឹងឆាប់គេងលក់ ។

វិធីទី ២ ៖ ការទទួលទាន
– គួរទទួលទានអាហារពេលល្ងាចយ៉ាងតិចណាស់ ៣ ម៉ោងមុននឹងចូលគេង ពីព្រោះប្រសិនបើអាហារនៅកិនមិនទាន់អស់ពីក្រពះទេនោះ អ្នកអាចនឹងគេងលក់មិនស្រួល ។
– ប៉ុន្តែក៏មិនត្រូវចូលគេងដោយគ្មានអីទ្រាប់ពោះដែរ មានន័យថាគួរញ៉ាំអីបន្តិចបន្តួច ដូចជាចំណីចំណុក ទឹកដោះគោជូរ សណ្តែកដី ជាដើម ។
– កុំញ៉ាំកាហ្វេ ឬភេសជ្ជៈមានជាតិកាហ្វេអ៊ីន នៅពេលរសៀល និង ល្ងាច
– គួរទទួលទានភេសជ្ជៈក្តៅៗ ជំនួសកាហ្វេវិញ ដូចជាទឹកដោះគោក្តៅ ឬ តែរុក្ខជាតិ
– កុំទទួលទានទឹក ឬ ភេសជ្ជៈផ្សេងៗក្នុងអំឡុងពេល ១ ម៉ោងមុនចូលគេង
– កុំញ៉ាំគ្រឿងស្រវឹងមុនចូលគេង ទោះជាវាអាចជួយឱ្យអ្នកឆាប់គេងលក់ តែការគេងលក់នោះគឺពុំស្កប់ស្កល់ទេ ។

វិធីទី៣៖ ទម្លាប់មុនគេង
– ប្រើបន្ទប់គេងជាកន្លែងគេងតែម្យ៉ាង មានន័យថាមិនត្រូវយកការងារ លេងហ្គេមមើលទូរទស្សន៍ និយាយទូរស័ព្ទ ញ៉ាំ ហាត់ប្រាណ ឬ ធ្វើរឿងផ្សេងក្រៅពីគេងឡើយ
– ប៉ុន្តែការអានសៀវភៅ ឬ គេងលេងបន្តិចបន្តួច សរសរអក្សរ ឬ សំបុត្រខ្លី ពិតជាមិនអីទេ
– រៀបចំគ្រែគេងឱ្យមានសណ្តាប់ធ្នាប់ និង គួរឱ្យចង់គេង
– សម្អាតបន្ទប់គេងឱ្យមានអនាម័យ និង កម្ចាត់រាល់សត្វចង្រៃឱ្យអស់
– តុបតែងបន្ទប់គេងដោយបិតរូប បិតសន្ទះការពារកម្តៅ លាបពណ៌ដែលអ្នកចូលចិត្ត ជាដើម ទើបធ្វើឱ្យអ្នកស្រលាញ់បន្ទប់ និង បង្កលក្ខណៈស្រស់ស្រាយគួរឱ្យចង់គេង
– ថែរក្សាពូក និង ផ្លាស់ប្តូរថ្មីរៀងរាល់៥ទៅ៧ឆ្នាំម្តង

វិធីទី៤៖ កែទម្លាប់អាក្រក់ បង្កើតទម្លាប់ល្អ
– ចូលគេង និង ភ្ញាក់ពីគេងឱ្យបានទៀងទាត់ជារៀងរាល់ថ្ងៃ ។ ប្រសិនបើពិបាកសម្រាប់អ្នក គួរប្រើនាឡិការោទិ៍ជាជំនួយ
– ប្រសិនបើអ្នកគេងច្រើនជាង ៨ ម៉ោង គួរកាត់បន្ថយម៉ោងគេងខ្លះ ពីព្រោះរយៈពេលគេងយូរ មិនប្រាកដថាគេងបានស្កប់ស្កល់ ដូចនេះដើម្បីបង្កើនគុណភាពម៉ោងគេង អ្នកគួរកាត់បន្ថយម៉ោងគេងខ្លះ ដោយប្រើកំណត់ម៉ោងរោទិ៍មុនម៉ោងភ្ញាក់ធម្មតា ១៥ នាទី ហើយចូលគេងយឺតជាងសព្វដង ១៥ នាទី ។
– ទម្លាប់មុនចូលគេង គួរធ្វើរឿងដដែលជារៀងរាល់ពេលមុនចូលគេង ដូចជា តាំងសមាធិ ស្តាប់ភ្លេង លំហាត់ដង្ហើម។ ធ្វើបែបនេះរាងកាយនឹងទម្លាប់ឯកឯងថា ដល់ពេលត្រូវគេងហើយ ។
– ហាត់ប្រាណជាទៀងទាត់ អាចជួយឱ្យរាងកាយងាយនឹងគេងលក់ ហើយគេងលក់បានស្កប់ស្កល់ស្រួលខ្លួនជាងមិនហាត់ ។ ប៉ុន្តែមិនត្រូវហាត់ប្រាណមុនចូលគេងទេ ។
– ប្រសិបើអាច គួរឆ្លៀតគេងថ្ងៃមួយភ្លែតៗ ប្រមាណជា ១៥ នាទី ។

វិធីទី៥៖ ការលេបថ្នាំងងុយគេង
– សាកប្រើថ្នាំ មេឡាតូនីន (Melatonin) ប្រសិនបើអ្នកមានការនឿយហត់ផ្លូវកាយច្រើន ។
– ប្រើថ្នាំ អង់ទីអ៊ីស្តាមីន (Antihistamine) ៖ ជាប្រភេទថ្នាំងងុយគេង ប៉ុន្តែមិនគួរទទួលទានជារៀងរាល់ថ្ងៃរហូតទេ គឺគួរប្រើមួយរយៈតាមវេជ្ជបញ្ជារបស់គ្រូពេទ្យ ។
– គួរជួបផ្ទាល់ជាមួយគ្រូពេទ្យ ដើម្បីពិភាក្សារកដំណោះស្រាយសមស្រប ។
លក្ខិណា